టాలెంటెడ్ డైరెక్టర్ పై బెల్లంకొండ ఫోకస్

టాలీవుడ్ ఫేమస్ ప్రొడ్యూసర్ బెల్లంకొండ సురేశ్ తనయుడిగా ఇండస్ట్రీకి పరిచయమైన బెల్లంకొండ శ్రీనివాస్.. తనదైన యాక్షన్, కమర్షియల్ సినిమాలతో ఇండస్ట్రీలో రాణిస్తున్నారు. ప్రస్తుతం భీమ్లా నాయక్ డైరెక్టర్ సాగర్ చంద్ర దర్శకత్వంలో టైసన్ నాయుడు సినిమాలో నటిస్తున్నారు. రీసెంట్ గా టైసన్ నాయుడు నుంచి పవర్ ఫుల్ గ్లింప్స్ రిలీజ్ అవ్వగా.. ఫ్యాన్స్ నుంచి అదిరిపోయే రెస్పాన్స్ వచ్చింది.

ఇక ఖిలాడీ డైరెక్టర్ రమేశ్ వర్మతో రాక్షసుడు 2 సినిమాను త్వరలో సాయి శ్రీనివాస్ చేయనున్నారు. రాక్షసుడు వంటి క్రైమ్ థ్రిల్లర్ కథతో ఆయన మంచి సక్సెస్ అందుకున్నారు. ఇప్పుడు రాక్షసుడు 2 వస్తుండటంతో మరోసారి హిట్ అందుకోవడం కన్ఫర్మ్ అనేలా అంచనాలున్నాయి. వీటితోపాటు శ్రీనివాస్ మరో రెండు చిత్రాలకు కమిట్ అయినట్లు సమాచారం. వాటిల్లో ఒక మూవీ షూటింగ్ త్వరలోనే స్టార్ట్ చేయనున్నట్లు తెలుస్తోంది.

నాంది సినిమాతో విభిన్నమైన డైరెక్టర్ గా పేరు తెచ్చుకున్న విజయ్ కనకమేడల దర్శకత్వంలో సాయి శ్రీనివాస్ ఓ సినిమా చేయనున్నట్లు గత కొద్ది రోజులుగా టాక్ వినిపిస్తోంది. ఇప్పుడు ఈ మూవీ కన్ఫర్మ్ అయినట్లు తెలుస్తోంది. సామాజిక ఇతివృత్తంతో కూడిన స్టోరీని విజయ్.. బెల్లంకొండకు చెప్పగా గ్రీన్ సిగ్నల్ ఇచ్చారట. త్వరలోనే ఈ సినిమా పట్టాలెక్కనుందట.

ఈ మూవీ ద్వారా డైరెక్టర్ విజయ్ కనకమేడల.. ఆరోగ్య శాఖలో ఉన్న లోపాలను చూపించబోతున్నట్లు టాక్ వినిపిస్తోంది. బెల్లంకొండ డాక్టర్ గా కనిపించబోతున్నట్లు సమాచారం. మెహ్రీన్ హీరోయిన్‌ గా నటించనుందని టాక్. అయితే ఈ బ్యూటీకి కొన్ని నెలలుగా అవ‌కాశాలు బాగా త‌గ్గిపోయాయి. దీంతో ఈ సినిమాతో మెహ్రీన్ రీ లాంఛ్ అయిన‌ట్టే.

తొలి సినిమా నాందితో ఓ రేంజ్ లో ఆకట్టుకున్నారు దర్శకుడు విజయ్ కనకమేడల. అక్రమ నేరారోప‌ణ‌తో జైల్లో మ‌గ్గుతున్న ఓ యువ‌కుడి కథను చూపించారు. అల్లరి నరేశ్ సినీ కెరీర్‌ లో ఈ చిత్రం మంచి విజయంగా నిలిచింది. కానీ రెండో సినిమాగా విజయ్, నరేశ్ కలిసి చేసిన ఉగ్రం మాత్రం ఆశించిన ఫలితాన్ని అందుకోలేకపోయింది. ఇప్పుడు తన మూడో సినిమా కోసం రూటు మారుస్తున్నారు విజయ్. తొలి రెండు చిత్రాలకు భిన్నంగా ఓ క‌మ‌ర్షియ‌ల్ ఎలిమెంట్స్‌ తో బెల్లంకొండ సినిమా ఉండబోతుందని టాక్. మరి ఈ మూవీ ఎలాంటి విజయం సాధిస్తుందో చూడాలి.