దసరా బరిలో దిగుతున్న 'ఎనిమీ'

కోలీవుడ్ స్టార్ హీరోలు విశాల్ - ఆర్య కలిసి నటిస్తున్న హై వోల్టేజ్ యాక్షన్ ఎంటర్టైనర్ ''ఎనిమీ''. ఆనంద్‌ శంకర్‌ దర్శకత్వంలో తెరకెక్కుతున్న ఈ చిత్రంలో ‘గద్దల కొండ గణేష్‌’ ఫేమ్ మృణాళిని రవి హీరోయిన్‌ గా నటిస్తోంది. ఇప్పటికే విడుదలైన ప్రచార చిత్రాలు - ఇటీవల వచ్చిన టీజర్ - సాంగ్స్ ఆకట్టుకున్నాయి. ఇప్పటికే అన్ని కార్యక్రమాలు పూర్తి చేసుకున్న ఈ చిత్రాన్ని మేకర్స్ రిలీజ్ కు రెడీ చేస్తున్నారు.

''ఎనిమీ'' చిత్రాన్ని దసరా పండుగ కానుకగా ప్రపంచ వ్యాప్తంగా విడుదల చేయనున్నట్లు చిత్ర బృందం అధికారికంగా ప్రకటించారు. ఈ సందర్భంగా వదిలిన అనౌన్స్ మెంట్ పోస్టర్ ఆసక్తికరంగా ఉంది. విశాల్ - ఆర్య ఇద్దరూ తీవ్ర గాయాలతో క్రూరంగా కనిపిస్తున్నారు. ఒకరిపై ఒకరు కోపంతో రగిలిపోతూ యుద్ధానికి సిద్ధం అవుతున్నట్లు ఈ పోస్టర్ చూస్తే అర్థం అవుతుంది.

'వాడు - వీడు' సినిమా వచ్చిన పదేళ్ల తర్వాత ''ఎనిమీ'' చిత్రంలో విశాల్ - ఆర్య స్క్రీన్ షేర్ చేసుకుంటున్నారు. ఇది శత్రువులుగా మారిన ఇద్దరు స్నేహితుల కథ అని తెలుస్తోంది. ఇందులో హీరో ఎవరు, విలన్ ఎవరనేది తెలియాలంటే సినిమా విడుదలయ్యే వరకు ఆగాల్సిందే. తెలుగు తమిళ హిందీ భాషల్లో రూపొందుతున్న ఈ సినిమా రిలీజ్ డేట్ ని త్వరలోనే వెల్లడించనున్నారు.

'ఎనిమీ' చిత్రాన్ని మినీ స్టూడియోస్‌ పతాకంపై ఎస్. వినోద్‌ కుమార్‌ భారీ బడ్జెట్ తో నిర్మిస్తున్నారు. ఆర్‌డి రాజశేఖర్ ఈ చిత్రానికి సినిమాటోగ్రఫీ అందించగా.. రేమాండ్ డేర్రిక్ ఎడిటింగ్ వర్క్ చేశారు. ఎస్ ఎస్ థమన్ సంగీతం సమకూర్చగా.. శ్యామ్ సీఎస్ బ్యాగ్రౌండ్ స్కోర్ అందించారు. ఈ చిత్రంలో ప్రకాష్‌ రాజ్‌ - మమతా మోహన్ దాస్ - తంబి రామయ్య - కరుణాకరన్ ఇతర పాత్రల్లో నటించారు.