తెగ వాడేస్తోన్న తెలంగాణ ఆర్టీసీ.. ఈసారి మహేష్ వంతు

అక్రమార్కుల సింహస్వప్నంలా మారి ఎన్ కౌంటర్ స్పెషలిస్ట్ గా పేరు తెచ్చుకున్న సజ్జనార్.. తన బాధ్యత మారినా.. తన స్టైల్ మార్క్ మాత్రం మారడం లేదు. ఆర్టీసీ ఎండీగా సజ్జనరాల్ నియమితులైన తర్వాత ఆర్టీసీలో విప్లవాత్మక మార్పులు వస్తున్నాయి.

ఇప్పటికే బస్సులపై ప్రకటనలు తొలగించాలని.. పెళ్లి బస్సులకు రాయితీతోపాటు, వివాహ జంటలకు బహుమతులు ఇవ్వడం లాంటి నిర్ణయాలతో ఆర్టీసీని లాబాల పాట పట్టించేందుకు కృషి చేస్తున్నారు. ఇక ఆర్టీసీని ఎక్కువమంది ప్రయాణికులకు చేరువ చేసే క్రమంలో ఏ చిన్న అవకాశం దొరికినా వదలడం లేదు.

ముఖ్యంగా సోషల్ మీడియాను ఉపయోగించుకుంటూ పెద్ద ఎత్తున ప్రచారం చేస్తున్నారు. ఇందులో భాగంగానే పలు రకాల మీమ్స్ ను క్రియేట్ చేస్తూ సోషల్ మీడియాలో పోస్ట్ చేస్తున్నారు. ఇందులో భాగంగానే తెలంగాణ ఆర్టీసీ ఎండీ సజ్జనార్ చేసిన ఓ ట్వీట్ ఆసక్తి రేకెత్తిస్తోంది.

సంక్రాంతి పండుగకు గాను సొంతూళ్లకు వెళ్లడానికి ఆర్టీసీ బస్సులనే ఉపయోగించుకోవాలంటూ ఓ మీమ్ ను రూపొందించారు. ఈ విషయాన్ని ప్రయాణికులకు చెప్పేందుకు టీఎస్ ఆర్టీసీ హీరో మహేష్ బాబు డైలాగ్ ను వాడుకున్నారు. ‘సీతమ్మ వాకిట్లో సిరిమల్లె చెట్టు’ సినిమాలో మహేష్, ఫృథ్వీరాజ్ ల మధ్య జరిగిన సంభాషనను మీమ్ గా మార్చేశారు. సంక్రాంతికి టీఎస్ ఆర్టీసీలో టికెట్ బుక్ చేసుకొని తక్కువ ధరతో భద్రతతో కూడిన ప్రయాణం చేసేయ్ అని మహేష్ చెప్పినట్టుగా మీమ్ రూపొందించారు. ప్రస్తుతం సజ్జనార్ చేసిన ఈ ట్వీట్ నెట్టింట్లో వైరల్ అవుతోంది.

ఈ ట్వీట్ వైరల్ కావడంతో కొందరు నెటిజన్లు ఆర్టీసీ ప్రమోషన్ చూసి ఫిదా అవుతున్నారు.