ఆ డైరెక్టర్ మూణ్నెల్లు దయ్యంతో ఉన్నాడట

హార్రర్ సినిమాలు తీసేవాళ్లంతా దయ్యాల్ని నమ్ముతారనేం లేదు. ఒకప్పుడు వరుసగా దయ్యం సినిమాలు తీసిన రామ్ గోపాల్ వర్మ సంగతి మనకు తెలిసిందే. దయ్యాల మీద జోకులేస్తూ.. దేవుళ్ల విషయంలో ఎటకారాలు చేస్తుంటాడు వర్మ. ఐతే ‘గీతాంజలి’ లాంటి హార్రర్ కామెడీతో దర్శకుడిగా అరంగేట్రం చేసి.. మళ్లీ రెండో ప్రయత్నంలోనూ మరో హార్రర్ నేపథ్యమున్న సినిమా చేస్తున్న రాజ్ కిరణ్ మాత్రం దయ్యాలున్నట్లు బాగా నమ్ముతాడట. తన యూనిట్ సభ్యులకు కూడా దయ్యాలున్నాయని గట్టిగా చెప్పాడట. ఇందుకు సంబంధించిన కథలు కూడా చెప్పాడట.

ఈ సంగతి హీరోయిన్ స్వాతి స్వయంగా వెల్లడించింది. మీరు దయ్యాల్ని నమ్ముతారా.. ఎప్పుడైనా అలాంటి అనుభవాలున్నాయా అని స్వాతిని అడిగితే.. ‘‘అలాంటి అనుభవాలేమీ లేవు. నేను ఇలాంటి వాటిని అస్సలు నమ్మను. కానీ మా డైరెక్టర్ మాత్రం ఎప్పుడూ దయ్యాలున్నాయనే చెబుతారు. గట్టిగా నమ్ముతారు. తాను మూడు నెలల పాటు ఓ దయ్యంతో సహవాసం చేసినట్లు కూడా చెప్పాడు’’ అని స్వాతి వెల్లడించింది. ఊరికే ప్రచారం కోసం చెప్పిందా లేక నిజంగానే రాజ్ కిరణ్ దయ్యాలున్నట్లు నమ్ముతున్నాడో కానీ.. ఓ డైరెక్టర్ గురించి ఇలాంటి మాట వినడం మాత్రం ఇదే తొలిసారి.