తెలుగు కన్నడ 'DTS' లో సూరజ్ దేవ్ గా సునీల్..!

ప్రముఖ హాస్యనటుడు కమ్ హీరో సునీల్ ప్రధాన పాత్రలో తెరకెక్కుతున్న తాజా చిత్రం ''డీటీఎస్'' (DTS). 'డేర్ టు స్లీప్' అనేది దీనికి ఉపశీర్షిక. ఒకేసారి తెలుగు కన్నడ భాషల్లో రూపొందుతున్న ఈ బైలింగ్వల్ లో శాండిల్ వుడ్ యంగ్ హీరో చేతన్ కీలక పాత్రలో కనిపిస్తున్నాడు. ఇందులో డోనల్ - నటాషా అనే కొత్తమ్మాయిలు కథానాయికలుగా నటిస్తున్నారు. అభిరామ్ పిల్ల ఈ చిత్రానికి దర్శకత్వం వహిస్తున్నాడు.

'డీటీఎస్' సినిమాతో మ్యూజిక్ డైరెక్టర్ సాయి కార్తీక్ ప్రొడ్యూసర్ గా మారుతున్నాడు. శ్రీమతి దివిజ సమర్పణలో ఎస్ఎస్ స్టూడియోస్ బ్యానర్ పై సాయి కార్తీక్ ఈ చిత్రాన్ని నిర్మిస్తున్నారు. దీనికి సంగీతం కూడా ఆయనే సమకూరుస్తున్నాడు. శ్రీకాంత్ దీపాల సహ నిర్మాతగా వ్యవహరిస్తున్నారు. ఇటీవలే ఈ సినిమా షూటింగ్ ప్రారంభించి శరవేగంగా చిత్రీకరణ జరుపుతున్నారు. అయితే ఉగాది సందర్భంగా సునీల్ పాత్రను పరిచయం చేస్తూ ఓ పోస్టర్ ని చిత్ర యూనిట్ విడుదల చేసింది.

ఈ హై వోల్టేజ్ యాక్షన్ థ్రిల్లర్ లో సూరజ్ దేవ్ అనే పవర్ ఫుల్ పాత్రలో సునీల్ నటిస్తున్నాడు. తాజాగా రిలీజ్ చేసిన పోస్టర్ లో సునీల్ వైలెంటుగా కనిపిస్తున్నాడు. చరణ్ మాధవనేని సినిమాటోగ్రఫీ అందిస్తున్న ఈ చిత్రానికి చోటా కె ప్రసాద్ ఎడిటింగ్ వర్క్ చేస్తున్నారు. ఓ వైపు హీరోగా మరోవైపు క్యారక్టర్ ఆర్టిస్టుగా బిజీగా గడుపుతున్న సునీల్.. 'డీటీఎస్' సినిమాతో కన్నడ మార్కెట్ ని కూడా టార్గెట్ చేస్తున్నాడు. మరి 'డీటీఎస్' హీరోగా అతడికెలాంటి ఫలితాన్నిస్తుందో చూడాలి.