భోజనం కూడా చేయనివ్వరా

హైదరాబాదీ టెన్నీస్‌ స్టార్‌ ను ఇటు ఇండియన్‌ మీడియా అటు పాకిస్తాన్‌ మీడియా ఎప్పటికప్పుడు టార్గెట్‌ చేస్తూనే ఉంది. తాజాగా ఒక పాకిస్తానీ టీవీ ఛానెల్‌ లో ఒక కథనం వచ్చింది. తాజా మ్యాచ్‌ ముందు రోజు సానియా మీర్జా మరియు ఆమె భర్త షోయబ్‌ మాలిక్‌ లు బయటకు వెళ్లారు. ఆ సమయంలో వారితో పాటు పాకిస్తాన్‌ బ్యాట్స్‌ మన్‌ ఇమాముల్‌ హక్‌ కూడా ఉన్నాడు. వీరు బయట తిరుగుతున్న వీడియోను ఒక పాకిస్తాన్‌ జర్నలిస్ట్‌ షూట్‌ చేశాడు.

ఆ వీడియోకు కీలక మ్యాచ్‌ సమయంలో షోయబ్‌ మాలిక్‌ మరియు ఇమాముల్‌ హక్‌ లు ఇలా బయట తిరుగుతున్నారు. ప్రాక్టీస్‌ మానేసి ఇలా తిరగడం ఏంటీ అంటూ కథనంలో అతడు అసహనం వ్యక్తం చేయడం జరిగింది. ఆ వీడియోపై సానియా మీర్జా తీవ్ర ఆగ్రహం వ్యక్తం చేసింది. తమ వ్యక్తిగత ఏకాంతంకు భంగం కలిగించడం మాత్రమే కాకుండా వద్దని వారించినా వీడియో తీసి దానికి ఒక చెత్త కథనం జోడించి ప్రసారం చేయడం ఏంటంటూ సానియా మీర్జా ట్విట్టర్‌ ద్వారా ప్రశ్నించింది.

మాతో పిల్లాడు ఉన్నాడు అనుమతి లేకుండా వీడియో తీయకూడదనే కనీస జ్ఞానం లేకుండా వీడియోను తీశావు అంటూ అసహనం వ్యక్తం చేసింది. మేము వెళ్లింది ఏమైనా జాలీగా తిరగడానికా.. భోజనం చేయడానికే కదా. కనీసం భోజనం కూడా చేయనివ్వరా అంది. మీడియా వారు మరీ శృతి మించుతున్నట్లుగా సానియా అభిప్రాయ పడింది. ఇటీవలే పాకిస్తాన్‌ మీడియా భారత వింగ్‌ కమాండర్‌ అభినందన్‌ ను అవమానించే విధంగా యాడ్‌ ను చేయడం పట్ల కూడా సానియా అభ్యంతరం వ్యక్తం చేసింది. హాయిగా క్రికెట్‌ ను ఆశ్వాదిస్తున్న సానియాకు మీడియా వారు ఇలా చిరాకు తెప్పిస్తున్నారు.