‘శమంతకమణి’లో హీరోయిన్ల సంగతేంటి?

శమంతకమణి.. ఈ పేరుతో సినిమా మొదలైనప్పటి నుంచి జనాల్లో దానిపై మంచి ఆసక్తి నెలకొంది. మల్టీస్టారర్లు అరుదైన టాలీవుడ్లో నలుగురు యువ కథానాయకులు కలిసి ఓ సినిమా చేయడం.. పైగా దానికి ‘శమంతకమణి’ అనే పేరు పెట్టడం.. ‘భలే మంచి రోజు’తో మంచి పేరు సంపాదించిన శ్రీరామ్ ఆదిత్య ఈ చిత్రానికి దర్శకుడు కావడమే ఆ ఆసక్తికి కారణం.

ఈ ఆసక్తికి తగ్గట్లే వైవిధ్యమైన మోషన్ పోస్టర్.. ఫస్ట్ లుక్ పోస్టర్లు..  టీజర్.. ట్రైలర్లతో ప్రేక్షకుల దృష్టిని మరింతగా ఆకర్షించింది ‘శమంతకమణి’. ఈ మధ్యే విడుదలైన ‘శమంతకమణి’ ట్రైలర్ సినిమాపై అంచనాల్ని బాగా పెంచింది. ఐతే ఈ సినిమాకు సంబంధించి ముందు నుంచి హీరోలు మాత్రమే డిస్కషన్లో ఉన్నారు. నారా రోహిత్.. సుధీర్ బాబు.. సందీప్ కిషన్.. ఆది.. వీళ్లతో పాటు రాజేంద్ర ప్రసాద్ గురించి కూడా చాలా చర్చ జరిగింది. టీజర్.. ట్రైలర్లలో ఈ ఐదుగురూ బాగా హైలైట్ అయ్యారు.

కానీ ఇందులో లేడీ క్యారెక్టర్ల గురించే జనాలకు ఏ ఐడియా లేదు. అసలు ఇందులో హీరోయిన్లు ఉన్నారా అన్న డౌట్ కూడా ఉంది. కానీ ‘శమంతకమణి’లో ఒకరికి ముగ్గురు హీరోయిన్లుండటం విశేషం. కానీ ఆ ముగ్గురూ అంత పేరున్న వాళ్లు కాదు. ప్రోమోల్లో వారికి పెద్దగా చోటు దక్కలేదు. ట్రైలర్లో ఈ ముగ్గురు ఒక ఫ్లాష్ లాగా మెరిసి మాయమైపోయారు. ఆ ముగ్గురి పేర్లు.. చాందిని చౌదరి.. అనన్య.. జెన్నీ.

చాందిని ‘కుందనపు బొమ్మ’తో పాటు ఒకట్రెండు సినిమాల్లో హీరోయిన్ గా నటించింది. ‘బ్రహ్మోత్సవం’ లాంటి సినిమాల్లో క్యారెక్టర్ రోల్స్ లోనూ నటించింది. అనన్య కొత్తమ్మాయి. జెన్నీ టీవీ రంగం నుంచి వచ్చింది. ఈ ముగ్గురూ మొన్నటి ఆడియో వేడుకలో బాగానే సందడి చేశారు. మరి సినిమాలో ఈ ముగ్గురికి ఇలాంటి పాత్రలుంటాయో.. వాళ్లెలా మెప్పిస్తారో ఈ నెల 14న తేలుతుంది. ఆ రోజే ‘శమంతకమణి’ రిలీజ్.