కృష్ణవంశీ సినిమా.. ఏమైందసలు?

‘గోవిందుడు అందరివాడేలే’ హిట్ కాకున్నా.. కృష్ణవంశీ అంతకుముందు తీసిన సినిమాల్లాగా డిజాస్టర్ అయితే కాలేదు. దీంతో ఆయన కొంచెం కొంచెం కుదురుకునేలాగే కనిపించాడు. ఆ సినిమా పూర్తయిన వెంటనే మళ్లీ తనదైన స్టయిల్లో ‘నక్షత్రం’ అనే సినిమా మొదలుపెట్టి తన అభిమానుల్లో ఆసక్తి రేకెత్తించాడు కృష్ణవంశీ. ఈ సినిమా షూటింగ్ మొదలైన కొన్ని రోజులకే ప్రమోషన్ మొదలుపెట్టి.. జనాల దృష్టిని ఆకర్షించే ప్రయత్నం చేశాడు. మళ్లీ ‘ఖడ్గం’.. ‘సముద్రం’ స్టయిల్లో కృష్ణవంశీ నుంచి ఓ వెరైటీ సినిమా రాబోతోందని అనుకున్నారు జనాలు. ఐతే ఈ సినిమా అనివార్య కారణాల వల్ల వాయిదా ఆలస్యమవుతూ వచ్చి అసలు విడుదలవుతుందా లేదా అన్న సందేహాలు రేకెత్తించింది.

ఐతే గత నెలలో ఉన్నట్లుండి ఈ చిత్రాన్ని వార్తల్లోకి తీసుకొచ్చారు. మేలో రిలీజ్ అంటూ హడావుడి చేశారు. టీజర్ కూడా లాంచ్ చేశారు. కానీ ఆ తర్వాత చప్పుడే లేదు. మే వెళ్లిపోయి జూన్ కూడా వచ్చేసింది. ఇప్పుడు బాక్సాఫీస్ దగ్గర సినిమాల జోరు పెద్దగా కనిపించట్లేదు. పెద్దగా పోటీ లేకుండా సినిమాలు రిలీజ్ చేసుకోవడానికిది మంచి తరుణం. ఈ అవకాశాన్ని ‘నక్షత్రం’ సద్వినియోగం చేసుకోవట్లేదు. ‘ఆరడుగుల బుల్లెట్’ తరహాలోనే దానికీ ఫైనాన్స్ సమస్యలున్నాయని.. అందుకే సినిమాకు మోక్షం కలగట్లేదని అంటున్నారు. ‘నక్షత్రం’ విడుదలై మంచి ఫలితాన్నందుకుంటే.. బాలయ్యతో ‘రైతు’ చేసే అవకాశం దక్కుతుందేమో అని ఆశిస్తున్న కృష్ణవంశీకి సినిమా విడుదలకు నోచుకోకపోతుండటం నిరాశ కలిగిస్తోంది. తన సినిమాకు ఎప్పుడు మోక్షం లభిస్తుందో కృష్ణవంశీకైనా క్లారిటీ ఉందో లేదో మరి.

Like Us on Facebook : https://www.facebook.com/Tupakidotcom/