విల‌క్ష‌ణ న‌టుడితో మెగా డాట‌ర్ బిగ్ డీల్

మెగాస్టార్ పెద్ద కుమార్తె సుస్మిత కొత్త జాబ్ గురించి తెలిసిందే. ఆమె నిర్మాత‌గా మారి వెబ్ సిరీస్ లు.. సినిమాల నిర్మాణానికి ప్లాన్ చేస్తున్న సంగ‌తి తెలిసిందే. భర్త విష్ణు తో క‌లిసి సొంతంగా `గోల్డ్ బాక్స్ ఎంటర్ టైన్ ‌మెంట్స్` పేరుతో ఓ ప్రొడక్షన్ హౌస్ ని ప్రారంభించారు. ఈ నిర్మాణ సంస్థ తొలిగా వెబ్ సిరీస్ ని నిర్మించ‌నుంది. ఇటీవ‌లే క్లాప్ కొట్టి లాంఛ‌నంగా సిరీస్ ని ప్రారంభించారు.

ఈ వెబ్ సిరీస్ గురించి వాక‌బు చేస్తే చాలా ఆస‌క్తిక‌ర సంగ‌తులే తెలిశాయి. ఈ సిరీస్ కి సిద్ధార్థ్ - షామిలీ జంట‌గా న‌టించిన‌ ఓయ్ (2009) మూవీకి దర్శకత్వం వహించిన ఆనంద్ రంగా దర్శకత్వం వహించనున్నారు. చాలా గ్యాప్ త‌ర్వాత అత‌డికి ఇది స‌ద‌వ‌కాశం అనే చెప్పాలి. తాజా స‌మాచారం ప్ర‌కారం.. ఈ సిరీస్ ‌ఇది యాక్షన్ ప్యాక్డ్ కాప్-డ్రామా. విల‌క్ష‌ణ నటుడు.. మెగా ఫ్యామిలీ స‌న్నిహితుడు అయిన‌ ప్రకాష్ రాజ్ ప్ర‌ధాన పాత్ర పోషిస్తుండ‌గా.. మ‌రో సీనియ‌ర్ సంపత్ రాజ్ ఇతర ప్రధాన పాత్ర‌లో క‌నిపిస్తారు. జీ 5లో ఇది ప్రసారం అవుతుంది. `ఎక్స్ ఛేంజ్ ఆఫ్ ఫైర్` అనే ఉప‌శీర్షిక‌ను నిర్ణ‌యించార‌ని తెలుస్తోంది.

ఇది ఓ సీరియ‌స్ పోలీస్ డ్రామా .. నేర‌ పరిశోధనలు.. వ‌రుస‌ నేరాలు.. కొన్ని మలుపులతో ఆద్యంతం ర‌క్తి క‌ట్టించ‌నుందిట‌. మెగా డాట‌ర్ సుస్మిత నిర్మాత‌గా రాణించాల‌నే త‌హ‌త‌హ‌లో ఉన్నారు. ఆ క్ర‌మంలోనే ఈ బ్యాన‌ర్ అధినేత్రి ఆరంభ‌మే ఆస‌క్తిక‌ర‌మైన అడుగులు వేస్తున్నారు. ప్ర‌కాష్ రాజ్ లాంటి సీనియ‌ర్ తో వెబ్ మూవీ కం సిరీస్ ప్లాన్ చేశారు కాబ‌ట్టి వైర‌ల్ గా చ‌ర్చ సాగ‌డం ఖాయం.