తుగ్లక్ కాదు.. వేరే పవర్ ఫుల్ టైటిల్!

'118' చిత్రం నందమూరి కళ్యాణ్ రామ్ కు మంచి పేరే తీసుకొచ్చింది. ఆ సినిమా తర్వాత కళ్యాణ్ రామ్ సినిమా ఒకటి గుట్టుచప్పుడు కాకుండా షూటింగ్ జరపుకుంటోంది.  ఈ కొత్త సినిమా షూటింగ్ పూర్తయ్యేలోపే మరో సినిమాకు రెడీ అవుతున్నాడట కళ్యాణ్ రామ్.  ఈ సినిమాకు ఆయన ఎప్పుడో పచ్చజెండా ఊపాడు కానీ ఇప్పుడు స్క్రిప్ట్ చివరిదశకు వచ్చిందట.

మల్లిడి వశిష్ట అనే నూతన దర్శకుడు రూపొందించనున్న ఈ సినిమాకు మొదట్లో 'తుగ్లక్' అనే టైటిల్ ను పరిశీలించారట.  కానీ ఆ టైటిల్ ను ఇప్పుడు పక్కన పెట్టి కొత్త టైటిల్ ను ఫైనలైజ్ చేసుకున్నారట.  'తుగ్లక్' అనేది పవర్ ఫుల్ గా లేదని.. కామెడీ అనే అభిప్రాయాన్ని కలిగించేలా ఉందని ఆ టైటిల్ ను వద్దనుకున్నారట.  ఇప్పుడు 'రావణ' అనే టైటిల్ ను లాక్ చేసినట్టు సమాచారం.  'రావణ' పేరే పవర్ ఫుల్ వైబ్రేషన్స్ తో ఉంటుంది కదా.  ఎన్టీఆర్ సినిమా 'జై లవకుశ' లో రావణుడి ఛాయలుండే జై పాత్ర అందరినీ ఆకట్టుకుంది. అంతే కాకుండా 'రావణ.. రావణ' సాంగ్ చార్ట్ బస్టర్ గా నిలిచింది.  ఇప్పుడు కళ్యాణ్ రామ్ అదే టైటిల్ ను తన కొత్త సినిమాకు పెట్టుకోవడం విశేషమే.

ఈ సినిమాను హై బడ్జెట్ తోనే నిర్మించేందుకు ప్లాన్ చేస్తున్నారని.. మాస్ ప్రేక్షకులను మెప్పించే విధంగా ఒక పవర్ ఫుల్ కథతో ఈ సారి కళ్యాణ్ రామ్ ప్రేక్షకుల ముందుకు వస్తాడని సమాచారం.  త్వరలోనే ఈ సినిమాను అధికారికంగా లాంచ్ చేస్తారట.