పెళ్లిపై పవన్ హీరోయిన్ అభిప్రాయమిది!

పవర్ స్టార్ పవన్ కళ్యాణ్ సినిమాలో హీరోయిన్ అవకాశం, అది కూడా తొలి సినిమాతోనే.. అంతకు మించిన లాంచింగ్ ఎవరి కెరీర్ లో అయినా ఏముంటుంది? అయినా కూడా టాలీవుడ్ లో అవకాశాలు - అదృష్టం అరకొరే. ఆమే.. ఇండో-బ్రిటీష్ బ్యూటీ నికీషా పటేల్. 2010లో విడుదలయిన పవన్ సినిమా "కొమరం పులి" తో టాలీవుడ్ రంగప్రవేశం చేసినా ఈమెకు ఏమాత్రం కెరీర్ ఆశాజనకంగా సాగలేదనే చెప్పాలి. అయితే ఈమె పర్సనాలిటీకో ఏమో కానీ కోలీవుడ్ - శాండిల్ వుడ్ లలో ఉన్నంతలో బాగానే సక్సెస్ అయ్యింది. తాజాగా సాయిరాం శంకర్ హీరోగా వచ్చిన "అరకు రోడ్డులో" సినిమాతో మరోసారి అదృష్టాన్ని పరీక్షించుకున్నా... అది కూడా నిరాశనే మిగిల్చింది. ఆ సంగతులు కాసేపు పక్కనపెడితే తాజాగా ప్రేమ - పెళ్లి వంటి విషయాలపై స్పందించింది ఈ బొద్దుగుమ్మ.

ప్రేమ పెళ్లి విషయాలపై మాట్లాడిన నికీషా... తనకు భారతీయ సాంప్రదాయ వివాహ వ్యవస్థపై నమ్మకం లేదని తేల్చేసింది. ఇదే సమయంలో అసలు పెళ్లి అనే వ్యవస్థనే తాను నమ్మనని, తన వరకూ తనకు నచ్చిన వ్యక్తితో సహజీవనం చేయడమే సౌకర్యంగా ఉంటుందని తేల్చిచెప్పేసింది. అక్కడితో ఆగని ఆమె... భవిష్యత్తులో ప్రేమ - పెళ్లి వంటి విషయాలపై ప్రిడిక్షన్ కూడా చెబుతుంది. ఈమె లెక్కల ప్రకారం 2030నాటికి భారతదేశంలో మెజారిటీ ప్రజలు సాంప్రదాయ వివాహ వ్యవస్థకు ప్రత్యామ్నాయాలు వెతుక్కుంటారట. ఏమిటో ఈమెకు భారతీయుల మీద, భారతీయ సమాజం, వివాహ వ్యవస్థ మీద అంత నమ్మకం!!

Like Us on Facebook : https://www.facebook.com/Tupakidotcom/