జూనియర్ కు సాయం చేస్తున్న నాని

యంగ్ హీరో నాని ఉన్నాడు చూడండి.. మనోడిలో చెప్పుకోవాల్సిన చాలా మంచి క్వాలిటీలు చాలానే ఉన్నాయి. ప్రొడ్యూసర్లకు నష్టాలు రాకుండా చెప్పిన బడ్జెట్లో సినిమాను ఫినిష్‌ చేసి వారిని ప్రాఫిట్స్ లో నడిపించడం మనోడికి వెన్నతో పెట్టిన విద్య. అదే అతనిలోని టాప్ క్వాలిటీ. అలాగే మనోడు తనకు తెలిసిన ఎవరైనా కూడా తమ సినిమాను ప్రమోట్ చేయమని అడిగితే.. వెంటనే రంగంలోకి దూకేస్తాడు. అస్సలు వెనకాడడు.

ఈ మధ్యకాలంలో చాలా సినిమాల ఆడియో ఫంక్షన్లకు చీఫ్‌ గెస్టుగా వచ్చిన నాని.. ఇప్పుడు మరో సినిమాను కూడా ప్రమోట్ చేయనున్నాడు. అప్పట్లో తన జూనియర్ అంటూ నాని తెలుగు ప్రేక్షకులకు విజయ్ దేవరకొండను పరిచయం చేశాడు. ఇద్దరూ కలసి 'ఎవడే సుబ్రమణ్యం' సినిమాలో కలసి నటించిన సంగతి తెలిసిందే. ఈ సినిమాలో చేసిన తరువాత మాంచి దోస్తులుగా కూడా అయిపోయారట. అందుకే ఇప్పుడు విజయ్ తదుపరి సినిమా అయిన ''అర్జున్ రెడ్డి'' సినిమా ట్రైలర్ ను రేపు నాని స్వయంగా లాంచ్ చేయనున్నాడు. ఆగస్టు 25న రిలీజ్ అవ్వుతున్న ఈ సినిమా ప్రమోషన్లను ఇలా నాని చేత్తో మొదలుపెట్టిస్తున్నారనమాట.

ఆల్రెడీ టీజర్ తో పాపులార్టీ వచ్చిన అర్జున్ రెడ్డి సినిమాకు ఇప్పుడు నాని సాయం అందుతుందంటే ఇంకాస్త అటెన్షన్ రావడం ఖాయం. అయితే టీజర్లో బూతులు ఉన్నట్లు ఇప్పుడు ట్రైలర్లో ఇంకెన్ని బూతులు పెట్టారో అంటూ నెటిజన్లు కూడా ఆత్రంగా వెయిట్ చేస్తున్నారు. మరి ఇంటర్నెట్ కు టివి లకు ఒకటే ట్రైలర్ ఇవ్వాలంటే మాత్రం.. సెన్సార్ చేయించి వదలాల్సిందే. అప్పుడు రెడ్డి చెప్పే బూతులన్నీ వారు లేపేస్తారు.