అను రాయ‌పాటి @ అందాల రాక్ష‌సి

అందాల రాక్ష‌సి అంటే మ‌న లావ‌ణ్య త్రిపాఠి అని కాస్త సినీ ప‌రిజ్ఞానం ఉన్న ఏ తెలుగు ప్రేక్ష‌కుడైనా ఇట్టే  చెప్పేస్తాడు. మ‌రి ఈ అను రాయ‌పాటి ఎవ‌రు?  నిజంగా ఈ పేరు కొత్త‌గా వినిపిస్తోంది క‌దూ!  త్వ‌ర‌లోనే తెలుగు తెర‌పై సంద‌డి చేయ‌బోతున్న పాత్ర పేర‌ది. ఆ పేరుతోనే అందాల రాక్ష‌సి లావ‌ణ్య త్రిపాఠి క‌నిపించ‌బోతోంది. ఆ విష‌యాన్ని క‌థానాయ‌కుడు అల్లు శిరీష్ బ‌య‌ట‌పెట్టాడు.

సోలో ఫేమ్ ప‌ర‌శురామ్ ద‌ర్శ‌క‌త్వంలో అల్లు శిరీష్ క‌థానాయ‌కుడిగా  ఓ చిత్రం తెర‌కెక్కుతోంది. అందులో క‌థానాయిక‌గా లావ‌ణ్య న‌టిస్తోంది. సినిమాలో ఆమె పాత్ర పేరు అను రాయ‌పాటి అట‌. బాగా అల్ల‌రి చేసే పాత్ర అని స‌మాచారం. కాలేజ్ గోయింగ్ గాళ్‌ గా క‌నిపించ‌బోతోంద‌ట‌. లావ‌ణ్య ఈ రోజు త‌న పుట్టిన‌రోజును జ‌రుపుకుంటోంది. ఈ సంద‌ర్భంగా ఆమె పాత్ర పేరును బ‌య‌ట‌పెడుతూ అల్లు శిరీష్ ట్వీట్ చేశాడు. ఈ పేరులో మంచి రైమింగే క‌నిపిస్తోంది. అదే రైమింగ్ పాత్ర‌లోనూ వ‌ర్క‌వుట్ అయితే లావ‌ణ్య‌కి మ‌రో హిట్టు ద‌క్కిన‌ట్టే. 

అయితే లావ‌ణ్య త‌న బ‌ర్త్ డే ఇంట‌ర్వ్యూల్లో శిరీష్ సినిమాలోని  పాత్ర గురించి చెప్ప‌లేదు కానీ... ల‌చ్చిందేవికి ఓ లెక్కుంది అనే సినిమాలోని పాత్ర  గురించి మాత్రం చాలా చెప్పింది. ఇంత‌కీ అందులో లావ‌ణ్య పాత్ర పేరేంటో తెలుసా? ఆంకాళ‌మ్మ. లావ‌ణ్య‌లాంటి అంద‌గ‌త్తెకి అదేం పేరంటారా?  అదే విష‌యాన్ని అడిగితే ``అందులోనే ఉంది గ‌మ్మ‌త్తు`` అంటూ న‌వ్వేసింది లావ‌ణ్య‌. ఆ సినిమాలో మొత్తం మూడు ర‌కాల పాత్ర‌ల్లో క‌నిపిస్తాన‌ని చెప్పుకొచ్చిందామె.