సైజ్ జీరో.. తెలుగు సినిమా కాదు

ఇంకో రెండు రోజుల్లో తెలుగు ప్రేక్షకుల ముందుకు రాబోతున్న తెలుగు సినిమా గురించి ఇవేం మాటలు అంటారా? ఈ సినిమా తెలుగులో తెరకెక్కిన మాట వాస్తవమే కానీ.. నిజానికిది బాలీవుడ్ లో తీయడం కోసం రాసుకున్న కథ అట. ప్రకాష్ కోవెలమూడి భార్య కాకముందే కనిక ధిల్లాన్ ఈ కథ రాసి బాలీవుడ్ లో ప్రయత్నాలు కూడా చేసిందట. ప్రకాష్ భార్యగా మారాక కూడా ఆమెకు ఈ కథను హిందీలో తెరకెక్కించాలన్నే కోరికట. నిర్మాత పొట్లూరి వరప్రసాద్ ను కలిసి కథ చెప్పినపుడు కూడా బాలీవుడ్ లో ఎవరితో ఈ సినిమా తీద్దామన్న చర్చే వచ్చిందట. ఐతే వరప్రసాదే ఈ సినిమాను తెలుగు - తమిళ భాషల్లో అనుష్కతో తీద్దామని చెప్పి అనుష్కను సంప్రదించాడట.

‘‘సైజ్ జీరో యూనివర్శల్ కాన్సెప్ట్. దీన్ని దేశంలోని అన్ని ప్రేక్షకులకూ చూపించాలని కనిక ఆశపడింది. నన్ను ఈ కథతో కలిసినపుడు హిందీలో తీద్దామనే చెప్పింది. అసలు సౌత్ లో ఈ క్యారెక్టర్ ఎవరూ చేయరన్నది ఆమె అభిప్రాయం. ఐతే నేను అనుష్కతో చేద్దామంటే.. తను స్టార్ హీరోయిన్ కదా, ఇలా లావుగా కనిపించడానికి ఇష్టపడదేమో. బడ్జెట్ కూడా వర్కవుట్ కాదేమో అని కనిక అనుమానంగా మాట్లాడింది. కానీ అనుష్కతో పెద్ద స్థాయిలో సినిమా చేద్దామని నేనే ఒప్పించా. అప్పటికప్పుడు అనుష్కతో మాట్లాడించా. ఐతే నేను అనుష్కకు ఇది మంచి కథ అని, లావుగా కనిపించాలని ఏమీ చెప్పలేదు. ముందు కథ వినమన్నా. విన్నాక తనే సినిమా చేయడానికి, బరువు పెరగడానికి సంతోషంగా ఒప్పుకుంది. ఐతే ఇది లేడీ ఓరియెంటెడ్ ఫిలిం అయినప్పటికీ భారీ స్థాయిలోనే చేయాలని బాగా ఖర్చుపెట్టాం, భారీ తారాగణాన్ని ఎంచుకున్నాం’’ అని వరప్రసాద్ చెప్పారు.