కమల్ సినిమా దర్శకుడికి ఏమైంది?

కమల్ హాసన్ కొత్త సినిమా ‘శభాష్ నాయుడు’ షూటింగ్ అమెరికాలో ఈ మధ్యే మొదలైన సంగతి తెలిసిందే. ఐతే స్క్రిప్టు పక్కాగా రెడీ చేసుకుని.. అమెరికన్ షెడ్యూల్స్ కు సంబంధించి అన్ని సమకూర్చుకుని.. అక్కడ ల్యాండవ్వగానే.. ఇక షూటింగ్ మొదలుపెడదాం అనుకుంటుండగా అనుకోని అవాంతరం వచ్చి పడింది కమల్ బృందానికి. ఈ చిత్ర దర్శకుడు రాజీవ్ కుమార్ అమెరికాకు వెళ్లగానే అనారోగ్యానికి గురయ్యాడు. షూటింగ్ మొదలైన రోజే ఆయనకు ఛాతీ నొప్పి రావడంతో వెంటనే ఆసుపత్రికి తరలించారు. ఐతే ఆయనొచ్చే వరకు వెయిట్ చేసే పరిస్థితి లేకపోవడంతో.. చాలామంది కాల్ షీట్స్ వేస్టయిపోతాయన్న కారణంతో షూటింగ్ యధావిధిగా కంటిన్యూ చేసేశారు.

కమలే కొన్ని సన్నివేశాలకు.. ఓ పాటకు దర్శకత్వం వహించాడట. ఈ సంగతి కమలే స్వయంగా వెల్లడించాడు. నిజానికి గత కొన్నేళ్లుగా కమల్ ఏ సినిమా చేసినా.. అందులో ఆయన ప్రమేయమే ఎక్కువగా ఉంటోంది. ఉత్తమ విలన్.. చీకటి రాజ్యం సినిమాలకు దర్శకులు వేరే వాళ్లయినా.. కమలే వాటికి అన్నీ తానై వ్యవహరించాడు. ‘శభాష్ నాయుడు’ దర్శకుడు రాజీవ్ మిత్రుడే. ఆయన టేస్టుకు తగ్గవాడే. ఒకవేళ రాజీవ్ సెట్లో ఉన్నా కమల్ ఆలోచనల ప్రకారమే షూటింగ్ సాగుతుంది. కాబట్టి రాజీవ్ అనారోగ్యం పాలవడంతో కమల్ అండ్ కో ఏమీ ప్యానిక్ అయిపోలేదు. రాజీవ్ తిరిగి షూటింగుకి వచ్చినా పెద్దగా తేడా ఏమీ ఉండదంటున్నారు కమల్ గురించి తెలిసినవాళ్లు.