వాటే కామెంట్: కెమెరాకు నాని అంటే అసహ్యం

కెమెరాకే మాటలొస్తే నానిని చూసి అది కచ్చితంగా అసహ్యించుకుంటుంది అంటున్నాడు అతడితో ‘కృష్ణగాడి ప్రేమ గాథ’ సినిమా తీసిన డైరెక్టర్ హను రాఘవపూడి. నాని లాంటి నటుణ్ని తానెక్కడా చూడలేదని.. అతడితో పని చేసిన ఏ దర్శకుడైనా మైకంలో పడిపోతాడని అన్నాడు హను. కెమెరాకు ఏమాత్రం రెస్పెక్ట్ ఇవ్వని నటుడు నాని అని.. ముందు కెమెరా ఉందన్న విషయమే అతడికి గుర్తుండదని.. నాని లాంటి నటుడితో ఎన్ని సినిమాలైనా చేయాలనిపిస్తుందని హను అన్నాడు. ఓ ఇంటర్వ్యూలో తన హీరో మీద ప్రశంసల జల్లు కురిపించాడు హను.

‘‘ఒక అందమైన ప్రకృతి దృశ్యం ఏదైనా చూస్తే అది అంత సులువుగా మన మనసును వదిలిపోదు. నాని నటన కూడా అలాంటిదే. అతడి నటన, హావభావాలు అంత సులువుగా మనల్ని వీడిపోవు. నాని లాంటి నటుణ్ని నేనెక్కడా చూడలేదు. ఉన్నట్లుండి ఓ స్టన్నింగ్ ఎక్స్ ప్రెషన్ ఇస్తాడు. అది చూసి మతి పోతుంది. ‘కృష్ణగాడి వీర ప్రేమ గాథ’ సినిమా చేస్తూ అతడి హావభావాలు చూసి ఎన్నిసార్లు షాకయ్యానో.. ఎంత ఆశ్చర్యపోయానో మాటల్లో చెప్పలేను.

మన ముందు కెమెరా ఉందంటే కచ్చితంగా కొంచెం తడబడతాం. ఓ ఫొటో తీస్తున్నా సరే మన బాడీ లాంగ్వేజ్ మారిపోతుంది. కానీ నాని మాత్రం తన ముందు కెమెరా ఉందన్న సంగతే గుర్తించడు. అసలు కెమెరాకు అతను రెస్పెక్ట్ ఇవ్వడు. ఒకవేళ కెమెరాకే గనక మాటలొస్తే అతణ్ని అది అసహ్యించుకుంటుంది. నానికి ఇదంతా పుట్టుకతో వచ్చిందా.. లేదా అతనే డెవలప్ చేసుకున్నాడా తెలియదు కానీ.. అతను అసాధారణమైన నటుడు. భవిష్యత్తులో ఇంకా చాలా గొప్ప స్థాయికి వెళ్తాడు. అద్భుతాలు చేస్తాడు’’ అంటూ నానిని ఆకాశానికెత్తేశాడు హను.