టీజర్ టాక్: సిద్దార్ధ్ గృహం!!
'ది హౌస్ నెక్ట్స్ డోర్' అంటూ ఒక సినిమాతో రాబోతున్నాడు మాజీ లవ్వర్ బాయ్ సిద్దార్ధ్. ఈ సినిమా గురించి ఆల్రెడీ చెప్పుకున్నాం. అయితే ఇప్పటివరకు అనేక ప్రయోగాలు చేసి బాగా ఫెయిల్ అయిన ఈ బొమ్మరిల్లు హీరో.. ఇప్పుడు మాత్రం హిట్టు కొట్టడానికి పక్కాగా కావల్సిన జానర్ నే ఎంచుకున్నాడు. అదే 'హారర్' అండ్ 'థ్రిల్లర్' జానర్లో మనోడు కూడా ఈ సినిమాను దింపేశాడు.
తెలుగులో 'గృహం' అంటూ వస్తున్న ఈ సినిమా టీజర్ ను టివిలో లాంచ్ చేశారు. మిలింద్ డైరక్షన్లో రూపొందుతున్న ఈ సినిమాకు కథ అండ్ స్ర్కీన్ ప్లే సిద్దార్ద్ కూడా అందించాడు. ఈ సినిమా టీజర్ ను చూస్తుంటే.. ఇదో ఆత్మల సినిమా అని అర్ధమవుతోంది. జెన్నీ అనే అమ్మాయి ఇప్పుడున్న ప్రపంచం నుండి తన పాత ప్రపంచానికి వెళుతుందా లేదా అనేదే కథ. అయితే ఇందులో సిద్దార్ధ్ పాత్ర ఏంటి.. ఆండ్రియా జెరీమియా పాత్ర ఏంటి.. అలాగే ఇతర నటీనటుల పాత్రలు.. అన్నీ క్లారిటీగా లేవు కాని.. టీజర్ చూస్తే మాత్రం ఇంటెన్సిటీ బాగుంది. పక్కింట్లో జరిగే సంఘటనలు అంటూ సిద్దూ కూడా హారర్ థ్రిల్లర్ ను నమ్ముకుని హిట్టుకొట్టేస్తాడా మరి?
నిజానికి సిద్దార్ధ్ తన మార్కెట్ ను తానే స్వయంగా నాశనం చేసుకున్నాడు. తెలుగు ప్రేక్షకులు నన్ను పట్టించుకోవడం మానేశారు అంటున్నాడు. కాని ఒక్క హిట్టు కొడితే ప్రేక్షకులు ఆటోమ్యాటిక్ గా లైక్ చేస్తారు. మరి ఆ హిట్టేదో కొట్టేసి మళ్లీ ఫాములోకి వచ్చేయి సిద్దూ!!