కబడ్డి కూతకు ముహూర్తం ఖరారు

యాక్షన్‌ స్టార్‌ గోపీచంద్ హీరోగా మిల్కీ బ్యూటీ తమన్నా హీరోయిన్ గా సంపత్ నంది దర్శకత్వంలో రూపొందిన 'సీటీమార్‌' విడుదలకు ముహూర్తం ఖరారు అయ్యింది. కరోనా కారణంగా చాలా కాలంగా వాయిదా పడుతూ వస్తున్న సినిమాల్లో సీటీమార్ ముందు వరుసలో ఉంటుంది అనడంలో సందేహం లేదు. సీటీమార్ సినిమా ను ఓటీటీ లో రిలీజ్ చేయబోతున్నారు అనే పుకార్లు షికార్లు చేశాయి. కాని మేకర్స్‌ ఎన్ని ఇబ్బందులు ఎదురైనా కూడా సినిమా పై చాలా నమ్మకంతో థియేటర్‌ రిలీజ్ కు సిద్దం అయ్యారు. గోపీచంద్ తో పాటు తమన్నాల పాత్రలు ప్రతి ఒక్కరికి నచ్చే విధంగా ఉంటాయి అంటూ మేకర్స్ చాలా నమ్మకంగా చెబుతున్నారు. ప్రతి ఒక్కరిని ఆకట్టుకునే విధంగా ఉండే సీటీమార్ సినిమా సెప్టెంబర్‌ 3వ తారీకున ప్రేక్షకుల ముందుకు రాబోతుంది అంటూ యూనిట్‌ సభ్యులు అధికారికంగా ప్రకటించారు.

మొదటగా ఈ సినిమాను సెప్టెంబర్‌ రెండవ లేదా మూడవ వారంలో విడుదల చేయాలని భావించారు. కాని రెండవ వారంలో లవ్‌ స్టోరీ సినిమా విడుదలకు సిద్దంగా ఉంది. మూడవ వారంలో కూడా ఇతర సినిమాలు క్యూ కట్టి ఉన్నాయి. దానికి తోడు కరోనా థర్డ్‌ వేవ్‌ అంటూ ఉన్నారు. కనుక సెప్టెంబర్‌ మొదటి వారంలోనే ప్రేక్షకుల ముందుకు తీసుకు వస్తే సాధ్యం అయినంత వరకు సినిమాకు వసూళ్లు వస్తాయనే నమ్మకంతో మేకర్స్ సెప్టెంబర్‌ 3 ను ఖరారు చేశారు అంటూ వార్తలు వస్తున్నాయి. ఇక ఈ సినిమా విడుదల నేపథ్యంలో ఇండస్ట్రీ వర్గాల్లో సినిమాపై ఆసక్తికర చర్చ జరుగుతోంది.

ఈ సినిమాలో గోపీచంద్‌ మరియు తమన్నాలు కబడ్డీ జట్ల కెప్టెన్ లుగా వ్యవహరించబోతున్నారు. తెలంగాణ అమ్మాయిల కబడ్డీ జట్టు కోచ్ గా తమన్నా కనిపించబోతున్నట్లుగా ఇప్పటికే చిత్ర యూనిట్‌ సభ్యులు లీడ్ ఇచ్చారు. గోపీచంద్‌ ఆంద్రా అమ్మాయిల జట్టు కెప్టెన్ గా కనిపించబోతున్నాడు. మొదట వీరిద్దరి మద్య పోటీ ఉంటుంది. ఆ తర్వాత ఇద్దరు కలిసి తెలుగు జట్టు ను జాతీయ స్థాయికి తీసుకు వెళ్తారు అనేది కథ అంటూ ప్రచారం జరుగుతోంది. కథ చాలా ఇంట్రెస్టింగ్‌ గా కబడ్డీ ఆట అంటే ఇష్టపడే వారికి నచ్చే విధంగా ఉంది. సినిమా లో చాలా ఎక్కువ శాతం కబడ్డీ ఉంటుంది. కనుక ఆట ప్రియులకు ఖచ్చితంగా కబడ్డి  నేపథ్యంలో తెరకెక్కిన ఈ సినిమా వినోదాన్ని అందిస్తుంది అనే నమ్మకంను ఇండస్ట్రీ వర్గాల వారు వ్యక్తం చేస్తున్నారు.

కమర్షియల్‌ సక్సెస్ కోసం గోపీచంద్‌ చాలా రోజులుగా వెయిట్‌ చేస్తున్నాడు. ఎట్టకేలకు ఈ సినిమా తో అయినా గోపీచంద్‌ కమర్షియల్‌ సక్సెస్ ను దక్కించుకుంటాడా అనేది చూడాలి. సినిమా షూటింగ్‌ పూర్తి అయినప్పటి నుండి అదుగో ఇదుగో అంటూ వాయిదాలు వేస్తూ వచ్చిన సీటీమార్ ఎట్టకేలకు విడుదల కాబోతున్న నేపథ్యంలో తమన్నా అభిమానులు కూడా చాలా ఆసక్తిగా ఎదురు చూస్తున్నారు. ఈమద్య కాలంలో తమన్నాకు కూడా మంచి బ్లాక్‌ బస్టర్ పడలేదు. అందుకే ఈ సినిమా తో ఆమె అభిమానుల కోరిక తీరుతుందేమో చూడాలి.