శోభనం కోసం మహేష్ ని వాడాడు

క్రియేటివిటీకి హద్దులు లేని మాట నిజమే కాని కొన్ని పరిమితులు ఉంటేనే దానికైనా అందం. కాని కొందరి అత్యుత్సాహం పుణ్యమా అని తెలివి కొత్త పుంతలు తొక్కుతోంది. దానికి తోడు సోషల్ మీడియా వాడకం విపరీతంగా పెరిగిపోవడంతో ఏది జరిగినా వైరల్ కావడానికి క్షణాల కంటే తక్కువ సమయమే పడుతోంది. పైన ఫోటో చూస్తున్నారుగా. ఒక యువకుడు తన శోభనానికి ఫ్లెక్సీ బ్యానర్ చేయించి ఏకంగా శపధం లాంటిది చేసేసాడు. అది కూడా మామూలుగా కాదండోయ్. భరత్ అనే నేనులో మహేష్ బాబు సిఎంగా ప్రమాణ స్వీకారం చేసిన స్టైల్ లో బ్రహ్మచర్యానికి స్వస్తి పలుకుతూ మొదటి యుద్ధానికి సిద్ధ పడుతున్నాను అంటూ ఇక్కడ రాయలేని పదాలు అందులో పెట్టేసి అమ్మనాన్నలను త్వరలో నానమ్మ తాతయ్యలను చేస్తానని సవాల్ కూడా చేసేసాడు. ఇది ఇప్పుడు సోషల్ మీడియా విపరీతంగా షేర్ అవుతోంది.

అయినా ఇది సంప్రదాయాలను ఎగతాళి చేయటమే తప్ప మరొకటి కాదని విరుచుకుపడుతున్న వాళ్ళు కూడా లేకపోలేదు. పవిత్రమైన సృష్టి కార్యాన్ని ఏదో ఘన కార్యం లాగా ఏ మాత్రం మొహమాటపకుండా ఇలా ఊరందరిని ప్రచారానికి పిలవడం గురించి పేలుతున్న కామెడీ మామూలుగా లేదు. పైగా ఇప్పుడు ట్రెండింగ్ లో ఉన్న భరత్ అనే నేను ఓత్ ని ఇలా హాస్యానికి వాడుకోవడం పట్ల మహేష్ ఫాన్స్ కోపంగా ఉన్నారు. ఈ బ్యానర్ లో పెళ్లి కొడుకు ప్రమాణం చేస్తున్నట్టు ప్రత్యేకంగా ఫోటో దిగి మరీ ఫోజివ్వడం చూసి నవ్వుకోని వారు లేరు. అతను ఎక్కడి వాడో ఈ శోభనం ఎప్పుడో వివరాలు తెలియవు కాని ఇప్పుడు ఇతగాడు ఉన్న ప్రాంతంలో బాగా పాపులర్ అయ్యుంటాడు అనడంలో మాత్రం అనుమానం అక్కర్లేదు. సినిమా ప్రభావం ఈ రేంజ్ లో ఉంటుందని వాళ్ళు వీళ్ళు మాట్లాడుకోవడం తప్ప ఇంతలా ఉంటుందని ఇలా సాక్ష్యాలతో సహా బయటపడినప్పుడు కాదనగలమా.