పొడగరి సుందరి పోటీకి దిగిపోయినట్టే!

ఆ మధ్య థియేటర్లకు వచ్చిన 'జాతిరత్నాలు' సినిమా చూసినవాళ్లందరి మనసులు ఫరియా అబ్దుల్లాపైకి వెళ్లాయి. ఈ జాతిరత్నం ఎవరబ్బా? అనుకుంటూ అంతా ఆశ్చర్యపోయారు. ఇంత అందం ఇప్పటివరకూ ఎక్కడ వుంది? అంటూ నోరెళ్లబెట్టారు. హైదరాబాద్ అమ్మాయి అని తెలిసి 'ఔనా' అంటూ షాక్ అయ్యారు. చందమామ వంటి ఫేసు .. నక్షత్రాల్లాంటి కళ్లు .. ఇంద్రధనుస్సు వంటి కనుబొమలు .. సన్నజాజి మొగ్గలతో చేసినట్టుగా అనిపించే నాజూకైన నాసిక ఈ అమ్మాయి మనసులన్నింటినీ ఎడా పెడా దోచేసింది.

పాలపిట్టకి పడుచుదనం వచ్చేసినట్టుగా అమ్మాయి భలేగా ఉందని కుర్రాళ్లంతా అనుకున్నారు. తెలుగు తెరపై ఈ బ్యూటీ తన జోరు చూపడం ఖాయమని చెప్పుకున్నారు. ప్రభాస్ .. మహేశ్ .. నాగశౌర్య .. గోపీచంద్ వంటి పొడగరి హీరోల సరసన ఈ అమ్మాయి బాగా నప్పుతుందని అనుకున్నారు. అయితే ఆశించిన స్థాయిలో అవకాశాలు వచ్చి పడిపోలేదుగానీ, ఇప్పుడిప్పుడే అందుకుంటోంది. 'బంగార్రాజు' కోసం ఒక స్పెషల్ సాంగ్ చేసిన ఈ సుందరి, సంతోష్ శోభన్ తో ఆడిపాడటానికి రెడీ అవుతోంది.

'ఏక్ మినీ కథ' .. 'మంచి రోజులు వచ్చాయి' వంటి సినిమాలతో సంతోష్ శోభన్ హీరోగా నిలదొక్కుకుంటున్నాడు. 'ఏక్ మినీ కథ' సినిమాకి రచయితగా పని చేసిన మేర్లపాక గాంధీ, ఈ సినిమాకి దర్శకత్వం వహించనున్నాడు. ఆయన దర్శకత్వంలో ఇంతకుముందు 'వెంకటాద్రి ఎక్స్ ప్రెస్' .. 'ఎక్స్ ప్రెస్ రాజా' .. 'కృష్ణార్జున యుద్ధం' వంటి హిట్స్ వచ్చాయి. ఒక్క 'మాస్ట్రో' మాత్రమే ఆశించిన స్థాయిలో ఆడలేదు. ఇప్పుడు ఆయన సంతోష్ శోభన్ తో కలిసి సెట్స్ పైకి వెళుతున్నాడు.

ఈ సినిమాకి వెంకట్ బోయనపల్లి నిర్మాతగా వ్యవహరిస్తున్నాడు.

'శ్యామ్ సింగ రాయ్' సినిమాతోనే వెంకట్ బోయినపల్లి నిర్మాతగా తెలుగు తెరకి పరిచయమయ్యాడు. ఆ సినిమా మంచి వసూళ్లు రాబడుతోంది. ఈ నేపథ్యంలో రెండో సినిమాగా తన సొంత బ్యానర్లో ఆయన ఈ సినిమాను మొదలుపెడుతున్నాడు. ఈ సినిమాలో సంతోష్ శోభన్ జోడీగా ఫరియా అబ్దుల్లాను తీసుకున్నారు. ఈ సినిమాలో ఆమె పాత్రలో గ్లామర్ పాళ్లు ఎక్కువగా ఉండనున్నట్టుగా తెలుస్తోంది. గ్లామర్ పరంగా ఈ బ్యూటీ పోటీకి దిగుతోంది కనుక, ఇప్పటి వరకూ హాట్ అనిపించుకున్న ముద్దుగుమ్మలంతా ఇక కూల్ గా ఉండటం కష్టమే.