దేవిశ్రీ మోత మొదలైందిగా..

కొన్ని రోజులుగా తెలుగు ప్రేక్షకులు ఎంతో ఉత్కంఠగా ఎదురు చూస్తున్న విశేషం బయటికి వచ్చేసింది. నిన్న సాయంత్రమే ‘రంగస్థలం’ టీజర్ విడుదలైంది. ఇది అంచనాలకు ఏమాత్రం తగ్గని విధంగా ఆసక్తికరంగా ఉండటంతో సోషల్ మీడియాలో సెన్సేషన్ క్రియేట్ చేసింది. కేవలం ఆరు గంటల్లోనే ఈ టీజర్‌ కు 5 మిలియన్ వ్యూస్ రావడం విశేషం. దీన్ని బట్టే టీజర్ ఎంతగా జనాల దృష్టిని ఆకర్షించిందో అర్థం చేసుకోవచ్చు. టీజర్ మొత్తం రామ్ చరణ్ చుట్టూనే తిరిగింది. నెవర్ బిఫోర్ లుక్.. మేనరిజమ్స్ తో చరణ్ ఆకట్టుకున్నాడు. చెవిటి వాడిగా అతడి పాత్ర భలే ఆసక్తి రేకెత్తించింది. టీజర్లో సుకుమార్ ముద్ర స్పష్టంగా కనిపించింది.

టీజర్లో చరణ్.. సుకుమార్ తర్వాత బాగా హైలైట్ అయింది దేవిశ్రీ ప్రసాదే. అతడి బ్యాగ్రౌండ్ స్కోర్ టీజర్ కు ప్రత్యేక ఆకర్షణగా నిలిచింది. తన స్టైల్ విడిచి పెట్టకుండానే.. సినిమా నేపథ్యానికి తగ్గట్లుగా కొంచెం కొత్తగా ట్రై చేశాడు దేవి. బ్యాగ్రౌండ్ స్కోర్లో కొంచెం తమిళ టచ్ కూడా ఉంది. ఇలాంటి బ్యాక్ డ్రాప్ లో తమిళంలో చాలా సినిమాలే తెరకెక్కడం వల్ల ఆ ప్రభావం కూడా కొంత ఉండి ఉండొచ్చేమో. ఓవరాల్ గా చూస్తే టీజర్ కు బ్యాగ్రౌండ్ స్కోర్ పెద్ద బలంగా నిలిచింది. సినిమాలోనూ మ్యూజిక్ చాలా బాగుండొచ్చన్న అంచనాలు పెంచింది. గత ఏడాది దేవిశ్రీ చాలా సినిమాలే చేశాడు కానీ.. క్రమంగా అతను టచ్ కోల్పోతున్నాడని.. అతడి మ్యూజిక్ రొటీన్ అయిపోతందని విమర్శలు వచ్చాయి. ఈ నేపథ్యంలో కొత్త ఏడాదిలో తనేంటో రుజువు చేసుకోవాల్సిన స్థితిలో ఉన్నాడు దేవి. మరి ముందుగా దేవి నుంచి రాబోయే పెద్ద సినిమా ‘రంగస్థలం’తో తన ముద్ర ఎలా ఉంటుందో చూడాలి.