కొరియర్ మళ్లీ లేటా?

ఇప్పటికే కొరియర్ డెలివరీ రెండేళ్లు ఆలస్యమైంది. అయ్యిందేదో అయ్యింది.. ఈ శుక్రవారం డెలివరీ ఖాయం అనుకుంటుంటే.. అంతలోనే ట్విస్టు అంటున్నారు. మళ్లీ వాయిదా అంటున్నారు. నితిన్ సినిమా ‘కొరియర్ బాయ్ కళ్యాణ్’కి ఈ శుక్రవారం కూడా మోక్షం కలిగే అవకాశం లేదంటూ టాలీవుడ్ లో గుసగుసలు వినిపిస్తున్నాయి. సడెన్ గా రిలీజ్ డేట్ పోస్టర్ల ప్రింటింగ్ ఆపినట్లు సమాచారం. నిజంగానే వాయిదా పడుతుందా? పడేట్లయితే కారణాలేంటన్నది ఎవరూ చెప్పడం లేదు. మొన్నా మధ్య ఈ వారం విడుదల అని యాడ్స్ ఇచ్చినపుడే కొంచెం డౌటొచ్చింది. ఈ శుక్రవారం ఖాయం అన్నపుడు.. నేరుగా డేటివ్వొచ్చు కదా.. ఈ వారం విడుదల అని  సస్పెన్స్ ఏంటి అనుకున్నారు. కానీ ఇంతలోనే వాయిదా వార్తలు వినిపిస్తున్నాయి.

కొరియర్ బాయ్ కళ్యాణ్ డౌటనేసరికి తేజ సినిమా ‘హోరాహోరీ’ని హడావుడిగా రిలీజ్ చేయడానికి ప్రయత్నాలు జరుగుతున్నట్లు తెలుస్తోంది. నితిన్ సినిమా ఉందనేసరికి పోటీ ఎందుకులే.. తర్వాతి వారం చూసుకుందాం అని ముందు కొంచెం ఆలోచనలో పడ్డారు. ఐతే ఇప్పుడు కొరియర్ బాయ్ సంగతి తెలిసి ఎట్టి పరిస్థితుల్లోనూ ఈ శుక్రవారం రిలీజ్ చేసేద్దామని చూస్తున్నారు. లేక లేక విడుదలవుతుందనుకుంటున్న ‘కొరియర్ బాయ్ కళ్యాణ్’ మళ్లీ వాయిదా పడుతోందంటే నితిన్ అభిమానులు నీరసించిపోవడం ఖాయం. రెండేళ్లు లేటైనా ట్రైలర్ చూస్తే ఫ్రెష్ గా ఉండటంతో సినిమా మీద అంచనాలు బాగానే ఉన్నాయి. నిర్మాత గౌతమ్ మీనన్ ఆర్థిక సంక్షోభంలో చిక్కుకోవడం వల్లే ఇన్నాళ్లు సినిమా లేటైంది. ఐతే ఆ వివాదాలన్నీ సమసిపోయినట్లే అనుకుంటుండగా ఈ కొత్త ట్విస్టేంటో అర్థం కావడం లేదు.