#చిరు152: మహేష్ క్యామియో చేస్తున్నాడా లేదా?

మెగాస్టార్ చిరంజీవి ప్రస్తుతం కొరటాలశివ దర్శకత్వంలో #చిరు152 సినిమాలో నటిస్తున్నారు. ఈ సినిమాలో మరో కీలక పాత్రలో రామ్ చరణ్ నటిస్తారని మొదట్లో అన్నారు.  అయితే 'RRR' పూర్తయ్యేవరకూ చరణ్ మరో సినిమాలో నటించే అవకాశం లేదట.  నిజానికి ఈ మార్చికే 'RRR' షూటింగ్ పూర్తవుతుందని.. వెంటనే #చిరు152 లో నటిస్తారని అనుకున్నారు కానీ షూటింగ్ డిలే కావడంతో చరణ్ ఈ సినిమాలో నటించడంపై సందిగ్ధత నెలకొంది.  దీంతో ఈ పాత్రలో నటిస్తారంటూ పలువురు ఇతర టాలీవుడ్ స్టార్ హీరోల పేర్లు వినిపిస్తున్నాయి. అందులో మహేష్ బాబు పేరు కూడా ఉంది.

ఈ సినిమాలో మహేష్ క్యామియో ఫిక్స్ అయిందని కూడా ఇప్పటికే వార్తలు వచ్చాయి.  కానీ అది నిజం కాదని సమాచారం. మహేష్ కు ఈ సినిమాలో క్యామియో చేసే ఆసక్తి ఉందా లేదా అని కొరటాల శివ క్యాజువల్ గా కనుక్కున్నారట. అంతకు మించి ఇంకేమీ లేదని..  ఈ సినిమాలో క్యామియో పాత్రను రామ్ చరణ్ చేస్తారని.. ఒకవేళ చరణ్ కు కుదరనిపక్షంలో ఆ పాత్రలో అల్లు అర్జున్ నటిస్తారని సమాచారం. ఈ సినిమాలో ఎవరు ప్రత్యేక పాత్రలో నటిస్తారనే విషయంలో త్వరలోనే కొరటాల శివ క్లారిటీ ఇస్తారట.  ఈ సినిమాలో ప్రత్యేక పాత్రలో స్టార్ హీరోలలో ఎవరు నటించినా అది ప్రేక్షకులను ఆకట్టుకోవడం ఖాయం.  మెగాస్టార్ సినిమాలో మరో స్టార్ హీరో నటించడం ప్రేక్షకులకు ఓ ప్రత్యేక అనుభూతినిస్తుందని చెప్పడంలో ఎటువంటి సందేహం లేదు.

కొరటాల శివ టాలీవుడ్ లో 100% సక్సెస్ రేట్ ఉన్న దర్శకుడు. ఆయన మొదటిసారిగా మెగాస్టార్ ను డైరెక్ట్ చేస్తూ ఉండడంతో ఈ సినిమాపై భారీ అంచనాలు ఉన్నాయి.  ఎప్పటిలాగే ఈ సినిమాను కూడా కొరటాల ఒక సామాజిక కథాంశంతో తెరకెక్కిస్తున్నారట. ఈ సినిమాలో చిరంజీవి సరసన త్రిష హీరోయిన్ గా నటిస్తోంది.