బాలీవుడ్ మిస్టర్ పర్ఫెక్ట్ కొడుకు సినీ అరంగేట్రం!

బాలీవుడ్ మిస్టర్ పర్ఫెక్ట్ అమీర్ ఖాన్ కుమారుడు జునైద్ ఖాన్ 'మహారాజా' అనే సినిమాతో బాలీవుడ్‌ ఇండస్ట్రీలో హీరోగా అడుగుపెట్టబోతున్నాడు. ఈరోజు ముంబైలో స్టార్ కొడుకు తన ఫస్ట్ డే మూవీ షూటింగ్ కిక్-స్టార్ట్ చేసినట్లు సమాచారం. తాజా నివేదికల ప్రకారం.. జునైద్ గత ఐదు నెలలుగా తన లుక్స్ మరియు క్యారెక్టర్ పై పనిచేస్తున్నాడు. దర్శకుడు సిద్ధార్థ్ పి మల్హోత్రా, అతని ప్రొడక్షన్ బృందం గతనెల నుండి గ్రౌండ్ వర్క్ పూర్తిచేస్తున్నాయి. ఈ సినిమాకోసం ముంబైలోని విజయ్ నగర్ ప్రాంతంలో భారీ సెట్ నిర్మించబడింది. పీరియడిక్ డ్రామాగా తెరకెక్కనున్న ఈ సినిమాలో జునైద్ ఓ జర్నలిస్ట్ పాత్రలో కనిపించనున్నాడు. అయితే ఈ మహారాజా సినిమా 1862లో జరిగిన ఓ మహారాజ్ పరువు కేసు ఆధారంగా రూపొందించనున్నట్లు తెలుస్తుంది.

అప్పట్లో మత నాయకుడు జదునాథ్జీ బ్రిజ్రాతంజీ మహారాజ్ కు తన శిష్యులకు సంబంధించిన సబ్జెక్టు ఆధారంగా ఈ సినిమా నడుస్తుంది. మత అధిపతి తన మహిళా భక్తులతో లైంగిక సంబంధాలను బహిర్గతం చేసిన వార్తాపత్రికపై కేసు నమోదు చేస్తాడు. ఈ చిత్రంలో జర్నలిస్ట్ కర్సాండస్ ముల్జీ పాత్రలో జునైద్ ఖాన్ నటించనున్నాడు. మహారాజా జర్నలిస్ట్ కర్సాండస్ ముల్జీని కోర్టుకు ఎలా తీసుకెళ్లారో చూపనున్నారట. బాలీవుడ్ బడా ప్రొడక్షన్ హౌస్ యష్ రాజ్ ఫిలిమ్స్ నిర్మిస్తున్న ఈ సినిమాకు సిద్ధార్థ్ పి మల్హోత్రా దర్శకత్వం వహిస్తుండగా.. జునైద్ తో పాటు అర్జున్ రెడ్డి ఫేమ్ షాలిని పాండే, షార్వారి వాగ్, జైదీప్ అహ్లవత్ ఇతర కీలకపాత్రలలో నటిస్తున్నారు. చూడాలి మరి మిస్టర్ పర్ఫెక్ట్ కొడుకు తన సత్తా చాటుతాడేమో!