ఫ్రెంచ్ ఓపెన్‌లో సంచలనం.. టాప్ ప్లేయర్‌ను మట్టికరిపించిన నెల్లూరు కుర్రాడు.. ఎవరీ నిషేశ్ బసవరెడ్డి?

ఫ్రెంచ్ ఓపెన్ 2026 వేదికగా టెన్నిస్ ప్రపంచంలో ఒక పెను సంచలనం నమోదైంది. ఎలాంటి అంచనాలు లేకుండా వైల్డ్ కార్డ్ ఎంట్రీతో బరిలోకి దిగిన ఒక భారత సంతతి యువకుడు.. ప్రపంచ మేటి ఆటగాడికి షాకిచ్చి అందరి దృష్టిని ఆకర్షించాడు. అతడే 21 ఏళ్ల నిషేశ్ బసవరెడ్డి. క్లే కోర్టుపై పారిస్ వేదికగా జరుగుతున్న ఈ గ్రాండ్‌స్లామ్ టోర్నీలో ప్రపంచ టాప్ ప్లేయర్లలో ఒకరైన టేలర్ ఫ్రిట్జ్ ను ఓడించి నిషేశ్ చరిత్ర సృష్టించాడు.

వరుస టైబ్రేకర్లలో అదిరిపోయే ఆట తీరు!

పారిస్‌లో జరిగిన ఫ్రెంచ్ ఓపెన్ తొలి రౌండ్ మ్యాచ్‌లో నిషేశ్ బసవరెడ్డి అద్భుత ప్రదర్శన కనబరిచారు. అమెరికాకే చెందిన ప్రపంచ 7వ సీడ్ ఆటగాడు టేలర్ ఫ్రిట్జ్‌తో జరిగిన హోరాహోరీ పోరులో నిషేశ్ ఎక్కడా బెదరలేదు. మొదటి రెండు సెట్లను వరుసగా టైబ్రేకర్లలో 7-6(5), 7-6(5) తో కైవసం చేసుకుని ఫ్రిట్జ్‌పై ఒత్తిడి పెంచాడు.

ఆ తర్వాత మూడో సెట్‌ను 6-7(9) తో తృటిలో చేజార్చుకున్నప్పటికీ.. నాల్గో సెట్‌లో పుంజుకున్న తీరు అమోఘం. ప్రత్యర్థికి కోలుకునే అవకాశం ఇవ్వకుండా 6-1 తో సెట్‌తో పాటు మ్యాచ్‌ను సొంతం చేసుకున్నాడు. ఈ గెలుపు నిషేశ్ కెరీర్‌లోనే అతిపెద్ద విజయంగా నిలిచింది.

నెల్లూరు మూలాలు.. అమెరికాలో జననం

నిషేశ్ బసవరెడ్డి విజయం వెలుగులోకి రావడంతో అతని నేపథ్యంపై అందరిలోనూ ఆసక్తి నెలకొంది. నిషేశ్ తల్లిదండ్రులు సాయి ప్రసన్న, మురళీకృష్ణ బసవరెడ్డి దంపతులు ఆంధ్రప్రదేశ్‌లోని నెల్లూరు జిల్లాకు చెందినవారు. వారు ఉపాధి నిమిత్తం అమెరికాకు వలస వెళ్లగా.. 2005లో కాలిఫోర్నియాలో నిషేశ్ జన్మించాడు. చిన్నప్పటి నుంచే టెన్నిస్‌పై మక్కువ పెంచుకున్న అతడు.. ప్రస్తుతం అమెరికా తరఫున అంతర్జాతీయ టోర్నీల్లో ప్రాతినిధ్యం వహిస్తున్నాడు.

వేగంగా దూసుకొస్తున్న 'భవిష్యత్తు స్టార్'

టెన్నిస్ సర్క్యూట్‌లో నిషేశ్ కొత్తేమీ కాదు. గత కొంతకాలంగా నిలకడైన ప్రదర్శనతో దూసుకుపోతున్నాడు.ఏటీపీ టాప్-100 ర్యాంకింగ్స్‌లో స్థానం సంపాదించి అందరి దృష్టిని ఆకర్షించాడు. టెన్నిస్ లెజెండ్ నోవాక్ జొకోవిచ్ వంటి ప్లేయర్‌తో తలపడిన అనుభవం నిషేశ్ సొంతం. ఒత్తిడి సమయాల్లో ప్రశాంతంగా ఉండటం, పదునైన డ్రాప్ షాట్లు, వేగవంతమైన సర్వీస్‌లు నిషేశ్ ప్రత్యేకత.

ఫ్రెంచ్ ఓపెన్ హిస్టరీలో అరుదైన రికార్డు

ప్రపంచ 7వ సీడ్ ఆటగాడైన టేలర్ ఫ్రిట్జ్‌ను ఓడించడం ద్వారా నిషేశ్ బసవరెడ్డి ఒక అరుదైన రికార్డును తన పేరిట లిఖించుకున్నాడు. ఫ్రెంచ్ ఓపెన్ చరిత్రలో టాప్-10 ఆటగాడిని ఓడించిన అత్యంత పిన్న వయస్కుడైన అమెరికన్ యువ ఆటగాడిగా నిషేశ్ నిలిచాడు.

సోషల్ మీడియాలో నెటిజన్ల ప్రశంసలు

అమెరికా జెండా కింద ఆడుతున్నప్పటికీ.. తెలుగు మూలాలు ఉన్న కుర్రాడు కావడంతో రెండు తెలుగు రాష్ట్రాలతో పాటు దేశవ్యాప్తంగా టెన్నిస్ అభిమానులు నిషేశ్‌పై ప్రశంసలు కురిపిస్తున్నారు. ప్రస్తుతం సోషల్ మీడియాలో నిషేశ్ బసవరెడ్డి పేరు ట్రెండింగ్‌లో ఉంది. ప్రపంచ టెన్నిస్ వేదికపై భారతీయుల సత్తాను చాటిన మరో గ్లోబల్ స్టార్ దొరికాడంటూ నెటిజన్లు ఆనందం వ్యక్తం చేస్తున్నారు.