అమెరికాలో ఎస్బీఐ విస్తరణ.. టెక్సాస్లో కొత్త బ్రాంచ్ ప్రారంభం!
| అమెరికాలోని టెక్సాస్ రాష్ట్రం ఫ్రిస్కోలో ఎస్బీఐ కొత్త బ్యాంకు శాఖను ప్రారంభించింది. ఎస్బీఐ కాలిఫోర్నియా అనుబంధ సంస్థ రాష్ట్రం వెలుపల ఏర్పాటు చేసిన తొలి బ్రాంచ్ ఇదే. వ్యక్తిగత, వ్యాపార ఖాతాలు, రుణాలు, అంతర్జాతీయ నగదు బదిలీ సేవలను ఈ శాఖ అందించనుంది. దీంతో అమెరికాలో ఎస్బీఐ శాఖల సంఖ్య ఎనిమిదికి చేరింది.
అమెరికాలో నివసిస్తున్న భారతీయులకు స్టేట్ బ్యాంక్ ఆఫ్ ఇండియా (SBI) మరో సౌకర్యాన్ని అందుబాటులోకి తీసుకొచ్చింది. టెక్సాస్లోని ఫ్రిస్కో నగరంలో కొత్త బ్యాంకు శాఖను ప్రారంభించింది. అమెరికాలో ఎస్బీఐ కాలిఫోర్నియా అనుబంధ సంస్థ రాష్ట్రం వెలుపల ఏర్పాటు చేసిన తొలి బ్రాంచ్ ఇదే కావడం విశేషం.
డల్లాస్కు సమీపంలోని ఫ్రిస్కో ప్రస్తుతం ఐటీ నిపుణులు, భారతీయ ఉద్యోగులు, వ్యాపారవేత్తలకు ప్రధాన నివాస ప్రాంతంగా మారుతోంది. ఈ నేపథ్యంలో స్థానికంగా పెరుగుతున్న బ్యాంకింగ్ అవసరాలను దృష్టిలో పెట్టుకుని ఎస్బీఐ ఈ నిర్ణయం తీసుకుంది.
బ్రాంచ్ ప్రారంభోత్సవంలో ఎస్బీఐ ఛైర్మన్ చల్లా శ్రీనివాసులు శెట్టి, భారత కాన్సుల్ జనరల్ మంజునాథ్, ఫ్రిస్కో మేయర్ మార్క్ హిల్ పాల్గొన్నారు. వ్యక్తిగత డిపాజిట్లు, వ్యాపార ఖాతాలు, వాణిజ్య రుణాలు, అంతర్జాతీయ నగదు బదిలీ వంటి సేవలను ఈ శాఖ అందించనుంది.
అమెరికాలో ఉద్యోగాలు చేస్తున్న భారతీయులకు భారత్కు డబ్బు పంపడం, పొదుపు ఖాతాలను నిర్వహించడం మరింత సులభం కానుంది. అలాగే స్థానికంగా వ్యాపారాలు నిర్వహించే భారతీయ సంస్థలకు కూడా ఈ బ్రాంచ్ ఉపయోగపడుతుంది.
ఈ ప్రారంభంతో ఎస్బీఐ కాలిఫోర్నియా అనుబంధ సంస్థకు చెందిన అమెరికా శాఖల సంఖ్య ఎనిమిదికి చేరింది. ప్రపంచవ్యాప్తంగా 29 దేశాల్లో 245 విదేశీ కార్యకలాపాల కేంద్రాలను నిర్వహిస్తున్న ఎస్బీఐ.. అంతర్జాతీయ మార్కెట్లలో తన ఉనికిని మరింత బలోపేతం చేసుకుంటోంది.