యూకే వీసా దరఖాస్తుల్లో భారీ తగ్గుదల: విద్యార్థులపై తీవ్ర ప్రభావం

యూకే వీసా దరఖాస్తుల సంఖ్యలో భారీ పతనం నమోదైంది. మార్చి 2025తో ముగిసిన సంవత్సరంలో కేవలం 772,200 దరఖాస్తులు మాత్రమే రాగా, అంతకు ముందు ఏడాది మార్చి 2024తో ముగిసిన సంవత్సరానికి 1.24 మిలియన్ల దరఖాస్తులు వచ్చాయి. ఇది 37 శాతానికి పైగా తగ్గుదల. నికర వలసలను తగ్గించడమే లక్ష్యంగా యూకే ప్రభుత్వం ప్రవేశపెట్టిన కొత్త ఇమ్మిగ్రేషన్ నిబంధనలు ఈ తగ్గుదలకు ప్రధాన కారణమని విశ్లేషకులు భావిస్తున్నారు.

ఈ భారీ తగ్గుదల నేపథ్యంలోనూ యష్ దుబాల్ వంటి నిపుణులు మాత్రం ప్రస్తుతం దరఖాస్తు చేసుకోవడానికి మంచి సమయం అని సూచిస్తున్నారు. ముఖ్యంగా స్కిల్డ్ వర్కర్ వీసాకు దరఖాస్తు చేసుకునే వారికి ఇది అనుకూల సమయం అని, ఈ వీసా జారీపై ఎలాంటి పరిమితి లేదని వారు పేర్కొంటున్నారు.

వీసా దరఖాస్తుల్లో తగ్గుదల విద్యార్థి వీసాలపైనా స్పష్టంగా కనిపిస్తోంది. స్పాన్సర్డ్ స్టడీ వీసా కోసం దరఖాస్తు చేసుకున్న వారి సంఖ్య 417,000గా నమోదైంది, ఇది అంతకు ముందు ఏడాదితో పోలిస్తే 11 శాతం తక్కువ. సాధారణంగా ఆగస్టు, డిసెంబర్ నెలల్లో దరఖాస్తులు ఎక్కువగా ఉండే సీజనల్ ట్రెండ్స్ ఇంకా ఉన్నప్పటికీ, జనవరి 2024లో ప్రవేశపెట్టిన కొత్త నిబంధనలు, ముఖ్యంగా విద్యార్థుల డిపెండెంట్లను తీసుకెళ్లడాన్ని పరిమితం చేయడం, దరఖాస్తుల సంఖ్యను మరింతగా ప్రభావితం చేసింది.

అయితే అన్ని వీసా కేటగిరీలలో తగ్గుదల కనిపించలేదు. ఫిబ్రవరి 2022 , ఆగస్టు 2023 మధ్య హెల్త్ అండ్ కేర్ వర్కర్ వీసా దరఖాస్తులు విపరీతంగా పెరిగాయి. కేర్ వర్కర్లను షార్టేజ్ ఆక్యుపేషన్ లిస్ట్‌లో చేర్చడం దీనికి ప్రధాన కారణం.

మొత్తం మీద చూసుకుంటే యూకే ప్రభుత్వం తీసుకున్న కఠినమైన ఇమ్మిగ్రేషన్ చర్యల కారణంగా గతంతో పోలిస్తే వలస లేదా ఉన్నత విద్య కోసం యూకేను ఎంచుకునే వారి సంఖ్య గణనీయంగా తగ్గుతోంది. ఇది యూకే యొక్క లేబర్ మార్కెట్ , విద్యా రంగంపై దీర్ఘకాలంలో ఎలాంటి ప్రభావం చూపుతుందో వేచి చూడాలి.