లండన్ లో ఇద్దరు తెలుగు విద్యార్థులను చిదిమేసిన ప్రమాదం

లండన్‌లో జరిగిన అగ్నిప్రమాదం ఇద్దరు తెలుగు విద్యార్థుల ప్రాణాలను బలిగొనడం తీవ్ర విషాదాన్ని మిగిల్చింది. విదేశాల్లో ఉన్న తెలుగు కుటుంబాలకు ఈ ఘటన హృదయ విదారకంగా మారింది.

దక్షిణ లండన్‌లోని క్రోయిడన్ ప్రాంతంలో ఫిబ్రవరి 23న ఈ అగ్నిప్రమాదం చోటుచేసుకుంది. ఒక అద్దె ఇంటిలో నివసిస్తున్న ముగ్గురు భారతీయ విద్యార్థుల్లో ఇద్దరు మృతిచెందగా.. మరో విద్యార్థి తీవ్ర గాయాలతో ఆస్పత్రిలో చికిత్స పొందుతున్నాడు. ఈ ఘటనతో స్థానికంగా నివసిస్తున్న భారతీయులు.. ముఖ్యంగా తెలుగు సమాజం దిగ్భ్రాంతికి గురైంది.

మరణించిన వారిని తెలంగాణలోని నిజామాబాద్‌కు చెందిన కామినేని సాయి శ్రీకర్ (26), ఆంధ్రప్రదేశ్‌లోని కాకినాడకు చెందిన గంటి అభిషేక్ (28)గా గుర్తించారు. వీరిద్దరూ ఉన్నత విద్య కోసం లండన్‌కు వెళ్లి అక్కడ చదువులు కొనసాగిస్తున్నారు. మంచి భవిష్యత్తు కోసం విదేశాలకు వెళ్లిన ఈ యువకులు అనూహ్యంగా అగ్నిప్రమాదంలో మృతి చెందడం వారి కుటుంబాలను విషాదంలో ముంచేసింది.

అగ్నిప్రమాదం జరిగిన వెంటనే ముగ్గురు విద్యార్థులను క్రోయిడన్ యూనివర్సిటీ ఆస్పత్రికి తరలించారు. అయితే సాయి శ్రీకర్ పరిస్థితి అత్యంత విషమంగా ఉండడంతో వైద్యులు అతడిని బ్రెయిన్ డెడ్‌గా ప్రకటించారు. కుటుంబ సభ్యులు ఆయన మృతదేహాన్ని భారత్‌కు తరలించాలని కోరుతున్నారు. హైదరాబాద్‌లో ఇంజినీరింగ్ పూర్తి చేసిన శ్రీకర్, ఉన్నత విద్య కోసం లండన్ వెళ్లినట్టు సమాచారం.

మరోవైపు గంటి అభిషేక్ పొగ కారణంగా ఊపిరాడక మృతి చెందినట్లు తెలుస్తోంది. అగ్ని ప్రమాదంలో ఇంటంతా పొగ వ్యాపించడంతో అతను ఊపిరి ఆడక మృతి చెందాడు. మూడో విద్యార్థి ప్రస్తుతం ఆస్పత్రిలో చికిత్స పొందుతున్నాడు. అతని ఆరోగ్య పరిస్థితి గురించి వైద్యులు నిరంతరం పర్యవేక్షిస్తున్నారు.

ఈ ఘటనపై స్థానిక పోలీసులు దర్యాప్తు ప్రారంభించారు. అగ్నిప్రమాదానికి గల కారణాలపై విచారణ కొనసాగుతోంది. ఇంట్లో విద్యుత్ లోపం వల్లా, లేక ఇతర కారణాల వల్లా ఈ ప్రమాదం జరిగిందా అన్నది అధికారులు పరిశీలిస్తున్నారు.

విదేశాల్లో చదువుల కోసం వెళ్లే విద్యార్థుల భద్రతపై ఈ ఘటన మళ్లీ ప్రశ్నలు లేవనెత్తుతోంది. ముఖ్యంగా అద్దె ఇళ్లలో ఫైర్ సేఫ్టీ ప్రమాణాలు పాటించకపోవడం, ఎమర్జెన్సీ సదుపాయాలు లేకపోవడం వంటి అంశాలు ప్రమాదాలకు దారి తీస్తున్నాయి. ఈ నేపథ్యంలో విదేశాలకు వెళ్లే విద్యార్థులు భద్రతా చర్యలపై మరింత జాగ్రత్తగా ఉండాలని నిపుణులు సూచిస్తున్నారు.

ఇద్దరు తెలుగు విద్యార్థుల మృతితో వారి కుటుంబాల్లోనే కాకుండా రెండు తెలుగు రాష్ట్రాల్లోనూ విషాద ఛాయలు అలుముకున్నాయి. వారి మృతదేహాలను స్వదేశానికి తీసుకురావడానికి ప్రభుత్వం సహాయం చేయాలని కుటుంబ సభ్యులు కోరుతున్నారు. ఈ విషాద ఘటనకు సంబంధించి భారత రాయబార కార్యాలయం కూడా స్పందించి, అవసరమైన సహాయం అందించేందుకు ముందుకొచ్చినట్లు సమాచారం.

ఈ ఘటన మరోసారి విదేశాల్లో నివసించే భారతీయ విద్యార్థుల భద్రతపై చర్చను తెరపైకి తీసుకువచ్చింది. మంచి భవిష్యత్తు కోసం వెళ్లిన యువజీవితాలు ఇలాంటి ప్రమాదాలకు బలవడం అందరినీ కలచివేస్తోంది.