యూట్యూబ్‌లో కీలక మార్పులు: కంటెంట్ క్రియేటర్లు తప్పక తెలుసుకోవాల్సిన విషయాలివీ

ప్రపంచవ్యాప్తంగా కోట్లాది మంది కంటెంట్ క్రియేటర్లకు జీవనాధారంగా మారిన యూట్యూబ్, తన మానిటైజేషన్ విధానంలో కీలక మార్పులు తీసుకురానుంది. జూలై 15, 2025 నుంచి అమల్లోకి రానున్న ఈ కొత్త నిబంధనలు, ప్రధానంగా అసలైన ఒరిజినల్ కంటెంట్‌ను ప్రోత్సహించడం లక్ష్యంగా రూపొందించబడ్డాయి.

- మార్పుల వెనుక ఉద్దేశ్యం

ఇటీవలి కాలంలో యూట్యూబ్‌లో AI-జనరేటెడ్ కంటెంట్, రీపర్పస్డ్ వీడియోలు, తక్కువ ఒరిజినాలిటీ ఉన్న వీడియోల సంఖ్య గణనీయంగా పెరిగింది. దీనివల్ల అసలైన కంటెంట్‌ను రూపొందించడానికి కష్టపడుతున్న క్రియేటర్లకు అన్యాయం జరుగుతోందని యూట్యూబ్ గుర్తించింది. ఈ అసమానతను సరిదిద్దడానికి, నాణ్యమైన కంటెంట్‌కు ప్రాధాన్యత ఇవ్వడానికి యూట్యూబ్ ఈ తాజా మార్గదర్శకాలను ప్రవేశపెట్టింది.

- నిషేధిత కంటెంట్‌గా పరిగణించబడేవి ఏవి?

కొత్త నిబంధనల ప్రకారం ఈ కంటెంట్ నిషేధితమైనవిగా పరిగణించబడతాయి. ఏఐ సహాయంతో తయారైన కంటెంట్ ను కేవలం టూల్స్‌పై ఆధారపడి, ఎటువంటి అంతర్లీన విలువ లేకుండా రూపొందించిన వీడియోలను నిషేధిత కంటెంట్ గా యూట్యూబ్ గుర్తిస్తుంది.. మరొకరి వీడియోలను కట్ చేసి రీపోస్ట్ చేయడం.. ఇతరుల కంటెంట్‌ను ఎడిట్ చేసి, స్వంత కంటెంట్‌గా తిరిగి అప్‌లోడ్ చేయడం... తక్కువ ప్రమాణాలు కలిగిన వాయిస్ ఓవర్‌లు, లూప్ చేసిన ఫుటేజ్‌లు.. నాణ్యత లేని వాయిస్ ఓవర్‌లతో, లేదా ఒకే ఫుటేజ్‌ను పదేపదే ఉపయోగించి చేసే వీడియోలకు ఇక నిషేధిత కంటెంట్ గా పరిగణించబడుతుంది. కాపీ చేసిన స్క్రిప్ట్‌లు, డైలాగులు.. వేరే వారి స్క్రిప్ట్‌లు లేదా డైలాగులను యథాతథంగా వాడటం నిషేధం. బెరుకు పెట్టిన టెంప్లేట్స్ ఆధారంగా రూపొందించిన వీడియోలు.. సాధారణ టెంప్లేట్‌లను ఉపయోగించి, ఎటువంటి సృజనాత్మకత లేకుండా చేసిన వీడియోలను నిషేధిస్తారు.

- డీమానిటైజేషన్ అంటే ఏమిటి?

కొత్త నిబంధనలను ఉల్లంఘించిన ఛానెల్స్‌ను యూట్యూబ్ డీమానిటైజ్ చేస్తుంది. అంటే ఆ ఛానెల్స్‌పై ప్రసారమయ్యే ప్రకటనల ద్వారా వచ్చే ఆదాయం నిలిపివేయబడుతుంది. దీని ప్రధాన ఉద్దేశ్యం, అసలైన కంటెంట్‌ను తయారు చేసే వారిని ప్రోత్సహించడం.. ప్లాట్‌ఫామ్‌లో నాణ్యతను పెంచడం లక్ష్యంగా యూట్యూబ్ ముందుకెళుతుంది..

- మానిటైజేషన్ కొనసాగాలంటే క్రియేటర్లు ఏమి చేయాలి?

క్రియేటర్లు తమ మానిటైజేషన్‌ను కొనసాగించుకోవడానికి కింది నియమాలను పాటించాలి. తమ స్వంత స్క్రిప్ట్‌లు, వాయిస్ ఓవర్‌లు, వీడియో ఫుటేజ్‌ను ఉపయోగించాలి. యూట్యూబ్ కమ్యూనిటీ గైడ్‌లైన్స్‌ను తప్పనిసరిగా పాటించాలి. కాపీరైట్ హక్కులు ఉన్న కంటెంట్‌ను ఉపయోగించకుండా జాగ్రత్తగా ఉండాలి.

- క్రియేటర్లకు సూచనలు

యూట్యూబ్ క్రియేటర్లు ఈ మార్పులకు తగినట్లుగా తమ వ్యూహాలను మార్చుకోవాలి. తమ కథనాల్లో వైవిధ్యం , క్రియేటివిటీ ఉండేలా చూసుకోవాలి. AI టూల్స్‌ను కేవలం సహాయంగా మాత్రమే వాడాలి, వాటిపై పూర్తిగా ఆధారపడకూడదు. ఇతర ఛానెల్స్ వీడియోలను కాపీ చేయకుండా యూనిక్ కంటెంట్ తయారుచేయాలి.

ఈ మార్పులు యూట్యూబ్‌లో నాణ్యత గల కంటెంట్‌కు ప్రాధాన్యం కల్పించే దిశగా ఒక ముందడుగు. అసలైన కంటెంట్‌ను సృష్టించే ప్రతి యూట్యూబర్‌కు ఇది ఒక మంచి అవకాశంగా మారుతుంది. మిగతా వారు కొత్త మార్గదర్శకాలను పూర్తిగా అర్థం చేసుకుని, మార్పులకు తగినట్లు తమ ప్రణాళికలు మార్చుకోవడం చాలా ముఖ్యం. జూలై 15 నుంచి కొత్త రూల్స్ అమల్లోకి వస్తున్నాయి. మీ కంటెంట్ ఇప్పుడు మరింత జాగ్రత్తగా ప్లాన్ చేయండి!