అమెరికా - చైనా మధ్య వాణిజ్య యుద్ధం.. భారత్ ఒక గొప్ప అవకాశం

అమెరికా అధ్యక్షుడు డొనాల్డ్ ట్రంప్ ఇతర దేశాలపై విధిస్తున్న ప్రతీకార సుంకాలు ప్రపంచ వాణిజ్యానికి పెను సవాలుగా మారాయి. ముఖ్యంగా చైనాపై ఆయన తీసుకుంటున్న కఠిన చర్యలు అంతర్జాతీయంగా తీవ్ర ఆందోళన కలిగిస్తున్నాయి. ఈ సంక్లిష్ట పరిస్థితుల్లో భారత్ - చైనా దేశాలు ఎలా వ్యవహరించాలనే అంశంపై భిన్నాభిప్రాయాలు వ్యక్తమవుతున్నాయి.

తాజాగా, చైనా విదేశాంగ రాయబారి యు జుంగ్ చేసిన వ్యాఖ్యలు ఈ అంశానికి మరింత ప్రాధాన్యతను సంతరించుకున్నాయి. అమెరికా విధిస్తున్న సుంకాలను సమర్థంగా ఎదుర్కోవడానికి భారత్ - చైనా కలిసి రావాలని ఆయన బహిరంగంగా పిలుపునిచ్చారు. ఇరు దేశాల మధ్య నెలకొన్న బలమైన వాణిజ్య సంబంధాలు పరస్పర ప్రయోజనకరమని ఆయన నొక్కి చెప్పారు. ఒకవేళ రెండు దేశాలు ఏకతాటిపై నిలిస్తే, అమెరికా విధిస్తున్న అధిక సుంకాలను సమర్థవంతంగా ఎదుర్కోవచ్చని ఆయన ఆశాభావం వ్యక్తం చేశారు.

అయితే అమెరికా అధ్యక్షుడు ట్రంప్ మాత్రం చైనాకు తనదైన శైలిలో హెచ్చరికలు జారీ చేశారు. అమెరికాపై చైనా విధిస్తున్న సుంకాలను తక్షణమే రద్దు చేయాలని ఆయన ఆదేశించారు. కానీ, చైనా ఈ ఆదేశాలను పట్టించుకోకపోవడంతో ట్రంప్ మరింత ఆగ్రహానికి గురయ్యారు. తన మాటను నిలబెట్టుకుంటూ చైనాపై అదనంగా 50 శాతం సుంకాలు విధించారు. దీంతో అమెరికా విధించిన మొత్తం టారిఫ్ల భారం ఏకంగా 104 శాతానికి చేరుకుంది. ఈ పరిణామం ప్రపంచ వాణిజ్య వర్గాల్లో కలకలం రేపుతోంది.

మరోవైపు భారతీయ ఆర్థిక నిపుణులు ఈ సంక్షోభాన్ని తమదైన కోణంలో విశ్లేషిస్తున్నారు. భారతీయ రిజర్వ్ బ్యాంక్ (RBI) మాజీ గవర్నర్ రఘురామ్ రాజన్ ఈ అంశంపై కీలక వ్యాఖ్యలు చేశారు. ట్రంప్ అనుసరిస్తున్న టారిఫ్ల విధానం దీర్ఘకాలంలో అమెరికా ఆర్థిక వ్యవస్థకే నష్టం కలిగిస్తుందని ఆయన స్పష్టం చేశారు. అంతేకాకుండా, అమెరికా - చైనా మధ్య నెలకొన్న ఈ వాణిజ్య యుద్ధాన్ని భారత్ ఒక గొప్ప అవకాశంగా మలుచుకోవచ్చని ఆయన సూచించారు. వ్యూహాత్మకంగా వ్యవహరిస్తే భారత్ కు గణనీయమైన లాభం చేకూరుతుందని ఆయన అభిప్రాయపడ్డారు. చైనా మాయలో పడి ఆ దేశం చెప్పినట్టు భారత్ చేతులు కలపవద్దని.. అమెరికాతోనే సయోధ్య కుదుర్చుకుంటే బెటర్ అని సూచించారు. చైనా జిత్తుల మారి వ్యూహాల్లో భారత్ బలికావద్దని తెలిపారు.

ఈ మేరకు రఘురామ్ రాజన్ భారత ప్రభుత్వానికి కొన్ని కీలక సూచనలు చేశారు. అమెరికా, చైనా, జపాన్ వంటి ప్రధాన ఆర్థిక శక్తులతో చర్చలు జరపాలని ఆయన సూచించారు. ముఖ్యంగా, చైనా నుండి తమ కార్యకలాపాలను తరలించాలని చూస్తున్న అంతర్జాతీయ కంపెనీలను ఆకర్షించడం ద్వారా భారత్ లబ్ధి పొందగలదని ఆయన పేర్కొన్నారు. అంతేకాకుండా దిగుమతులపై విధిస్తున్న టారిఫ్లను క్రమంగా తగ్గించడం కూడా భారత ఆర్థిక వ్యవస్థకు మేలు చేస్తుందని రఘురామ్ రాజన్ అభిప్రాయపడ్డారు. దీనివల్ల దేశీయంగా ఉత్పత్తి పెరిగే అవకాశం ఉంటుందని ఆయన విశ్లేషించారు.

ట్రంప్ తీసుకున్న ఈ తాజా చర్యలతో ప్రపంచ ఆర్థిక వ్యవస్థలో తీవ్రమైన అనిశ్చితి నెలకొంది. చైనా ఈ పరిణామాలపై ఎలా స్పందిస్తుందో వేచి చూడాల్సి ఉంది. ఈ వాణిజ్య యుద్ధం ఎటువైపు దారి తీస్తుందోనని ప్రపంచవ్యాప్తంగా ఆర్థికవేత్తలు ఆందోళన వ్యక్తం చేస్తున్నారు. ఒకవైపు చైనా, భారత్ కలిసి పోరాడాలని పిలుపునిస్తుంటే, మరోవైపు భారత్ మాత్రం ఈ సంక్లిష్ట పరిస్థితిని తమకు అనుకూలంగా మార్చుకునేందుకు ప్రయత్నాలు చేస్తోంది. రానున్న రోజుల్లో ఈ పరిణామాలు ఎలాంటి మలుపులు తిరుగుతాయో వేచి చూడాలి. అయితే, ఈ సమయంలో భారత్ తీసుకునే వ్యూహాత్మక నిర్ణయాలు దేశ ఆర్థిక భవిష్యత్తును నిర్దేశిస్తాయనడంలో సందేహం లేదు.