పాము కాటు.. మంత్రగాళ్లను ఆశ్రయించిన తల్లిదండ్రులు.. చివరికి జరిగింది ఇదే..!

21వ శతాబ్దంలో ఉండి కూడా ఇంకా మూఢనమ్మకాలతో ప్రాణాలు పోతుండడం విచారకరం. వైద్యం అందుబాటులో ఉన్నా, మంత్రగాళ్ల మాయమాటలు నమ్మి కన్నకొడుకును నదిలో కట్టేసి ఉంచడం చూస్తుంటే అజ్ఞానం ఎంతటి ఘోరాలకు దారితీస్తుందో అర్థమవుతోంది. ఉత్తరప్రదేశ్‌లో జరిగిన ఈ హృదయవిదారక ఘటనపై పలువురు ఆవేదన వ్యక్తం చేస్తున్నారు.

పాము కాటు.. మంత్రగాళ్ల వల్ల నిండు ప్రాణం బలి!

ఒకవైపు టెక్నాలజీతో ప్రపంచం దూసుకుపోతుంటే.. మరోవైపు మూఢనమ్మకాలతో ప్రాణాలను గాలిలో దీపంలా మారుస్తున్నారు. పాము కరిస్తే వెంటనే ఆసుపత్రికి తీసుకెళ్లి 'యాంటీ వీనమ్' ఇప్పించాల్సింది పోయి, గంగానది ప్రవాహంలో ఉంచితే విషం దిగుతుందన్న పిచ్చి నమ్మకంతో 14 ఏళ్ల అమిత్ ప్రాణాలను తల్లిదండ్రులే బలిపశువును చేశారు. పీతంపూర్ గ్రామంలో జరిగిన ఈ ఉదంతం వింటే ఎవరికైనా ఒళ్లు గగుర్పుపొడుస్తుంది.

12 గంటల నరకయాతన!

అడంపూర్ పరిధిలోని అమిత్ అనే విద్యార్థికి పాము కరిచిన వెంటనే కుటుంబ సభ్యులు ఆందోళనకు గురయ్యారు. అయితే వారు డాక్టర్ దగ్గరకు వెళ్లే బదులు మంత్రగాళ్ల దగ్గరకు వెళ్లారు. మంత్రగాళ్ల సలహా మేరకు బాలుడిని ఒక చెక్కపై పడుకోబెట్టి కట్టేశారు. ఆ చెక్కను 12 గంటల పాటు గంగానది ప్రవాహ నీటిలో ఉంచారు. నీటి అలల తాకిడికి విషం కొట్టుకుపోతుందన్న వారి అజ్ఞానం, ఆ బాలుడికి కనీసం ఊపిరి కూడా అందకుండా చేసింది.

ఆసుపత్రికి వెళ్తే బతికేవాడు..

పాము కరిచినప్పుడు మొదటి గంట అత్యంత కీలకం. ఆ సమయంలో ఆసుపత్రికి తీసుకెళ్తే ప్రాణాలను కాపాడడం చాలా సులభం. కానీ అమిత్ విషయంలో 12 గంటల సమయాన్ని నదిలో వృథా చేశారు. పాము విషం శరీరం అంతా పాకి, అవయవాలు ఫెయిలై అమిత్ మరణించాడు. సకాలంలో యాంటీ వీనమ్ అంది ఉంటే, ఈరోజు ఆ బాలుడు స్కూల్‌కి వెళ్తూ ఉండేవాడు.

మంత్రగాళ్ల మోసం

గ్రామీణ ప్రాంతాల్లో ఇప్పటికీ పాము కాటుకు మంత్రాలు, తంత్రాలే విరుగుడు అని నమ్మేవారు చాలా మంది ఉన్నారనేందుకు ఈ ఘటనే నిదర్శనం.. మంత్రగాళ్లు తమ స్వార్థం కోసం ప్రజల అమాయకత్వాన్ని ఆసరాగా చేసుకొని ప్రాణాలతో చెలగాటం ఆడుతున్నారు. ఈ ఘటనలో కూడా మంత్రగాళ్లపై కఠిన చర్యలు తీసుకోవాలని పలువురు డిమాండ్ చేస్తున్నారు.

పాము కరిస్తే ఏం చేయాలంటే..

మంత్రగాళ్లను నమ్మద్దు.. పాము విషానికి మంత్రాలు విరుగుడు కాదు. కరిచిన చోట కదలికలు ఉంటే విషం వేగంగా రక్తంలో కలుస్తుంది. వెంటనే ప్రభుత్వ ఆసుపత్రికి తరలించి యాంటీ వీనమ్ ఇంజెక్షన్ ఇప్పించాలి. కాటు వేసిన చోట కోయడం లేదా రక్తాన్ని పీల్చడం వంటి పనులు చేయద్దు..

ఇకనైనా మేల్కొందాం!

దేవుడే కాపాడుతాడు.., అలల తాకిడికి విషం దిగుతుంది లాంటి పనులు చేయవద్దు. భక్తి ఉండటం తప్పు కాదు.. కానీ ప్రాణం పోతున్నప్పుడు దేవుడు కూడా వైద్యుడి రూపంలోనే కనిపిస్తాడన్న నిజాన్ని మర్చిపోవద్దు. అమిత్ మరణం ఆ కుటుంబానికి తీరని లోటు. ఇలాంటి మూఢనమ్మకాలపై గ్రామాల్లో విస్తృత అవగాహన కల్పించాల్సిన బాధ్యత ప్రభుత్వం, విద్యావంతులైన మనందరిపై ఉంది.