త్రిషకు షాక్ ఇచ్చిన తమిళనాడు సీఎం విజయ్

తమిళనాడు రాజకీయాల్లో సరికొత్త శకం ఆరంభమైంది. దశాబ్దాల కాలంగా కొనసాగుతున్న ద్రావిడ దిగ్గజాల ఆధిపత్యానికి గండి కొడుతూ 'తమిళగ వెట్రి కళగం' (టీవీకే) అధినేత సి. జోసెఫ్ విజయ్ ముఖ్యమంత్రిగా పగ్గాలు చేపట్టారు. అయితే ప్రమాణస్వీకారం చేసిన తొలిరోజే ఆయన చేసిన వ్యాఖ్యలు ఇప్పుడు రాష్ట్రవ్యాప్తంగా పెను సంచలనాన్ని సృష్టిస్తున్నాయి. ముఖ్యంగా సినీ నటి త్రిష కృష్ణన్ చుట్టూ జరుగుతున్న రాజకీయ ప్రచారానికి చెక్ పెడుతూ "ప్రభుత్వంలో నేనే ఏకైక పవర్ సెంటర్" అని విజయ్ ప్రకటించడం హాట్ టాపిక్‌గా మారింది.

అట్టహాసంగా ప్రమాణస్వీకారోత్సవం

చెన్నైలోని జవహర్‌లాల్ నెహ్రూ ఇండోర్ స్టేడియం వేదికగా జరిగిన ఈ చారిత్రాత్మక వేడుకలో గవర్నర్ రాజేంద్ర విశ్వనాథ్ అర్లేకర్.. విజయ్‌తో ముఖ్యమంత్రిగా ప్రమాణం చేయించారు. విజయ్‌తో పాటు మరో తొమ్మిది మంది మంత్రులు కూడా బాధ్యతలు స్వీకరించారు. ఈ కార్యక్రమానికి లోక్‌సభ ప్రతిపక్ష నేత రాహుల్ గాంధీతో పాటు పలువురు జాతీయ, ప్రాంతీయ నేతలు హాజరై విజయ్‌కు శుభాకాంక్షలు తెలిపారు. స్టేడియం వెలుపల వేలాది మంది అభిమానుల కోలాహలంతో చెన్నై నగరం సందడిగా మారింది.

త్రిషకు షాక్.. విజయ్ క్లారిటీ!

ఈ వేడుకలో అందరి దృష్టిని ఆకర్షించిన మరో అంశం.. ప్రముఖ నటి త్రిష కృష్ణన్, ఆమె తల్లికి కేటాయించిన ప్రత్యేక సీట్లు. విజయ్ కుటుంబ సభ్యుల సరసన త్రిష కూర్చోవడంతో రాబోయే రోజుల్లో ఆమె ప్రభుత్వంలో కీలక పాత్ర పోషిస్తారని లేదా పార్టీలో ఆమె ప్రాధాన్యత పెరుగుతుందనే ప్రచారం జోరందుకుంది. అయితే ముఖ్యమంత్రి విజయ్ తన ప్రసంగంలో ఈ ఊహాగానాలకు బ్రేక్ వేశారు. "మిత్రులైనా, శత్రువులైనా అందరికీ ఒకే చట్టం వర్తిస్తుంది. ఈ ప్రభుత్వంలో టీవీకే పార్టీలో ఒకే అధికార కేంద్రం ఉంటుంది. రెండో పవర్ సెంటర్‌కు ఇక్కడ తావు లేదు" అని విజయ్ కుండబద్దలు కొట్టారు.

విజయ్ చేసిన ఈ 'పవర్ సెంటర్' వ్యాఖ్యలు నేరుగా త్రిషను ఉద్దేశించి చేసినవి కాకపోయినా ఆమె రాజకీయ ప్రవేశంపై జరుగుతున్న చర్చలకు మాత్రం ఇది గట్టి కౌంటర్ అని విశ్లేషకులు భావిస్తున్నారు. బంధుప్రీతికి, బయటి వ్యక్తుల జోక్యానికి తన పాలనలో ఆస్కారం ఉండదని ఆయన స్పష్టం చేశారు.

ఆరు దశాబ్దాల ఆధిపత్యానికి ముగింపు

తమిళనాడులో దాదాపు 60 ఏళ్లుగా డీఎంకే , ఏఐఏడీఎంకే మధ్యే అధికారం మారుతూ వచ్చింది. ఈ రెండు పార్టీల కోటను బద్దలు కొడుతూ విజయ్ నేతృత్వంలోని టీవీకే అధికారంలోకి రావడం ఒక అద్భుతమని రాజకీయ పండితులు అభివర్ణిస్తున్నారు. 234 స్థానాలున్న అసెంబ్లీలో 120 మంది ఎమ్మెల్యేల మద్దతుతో విజయ్ ప్రభుత్వాన్ని ఏర్పాటు చేశారు. వీరికి కాంగ్రెస్, సీపీఐ, సీపీఎం, వీసీకే, ఐయూఎంఎల్ వంటి పార్టీలు మద్దతు ప్రకటించడంతో విజయ్ బలం పెరిగింది.

మే 13న విశ్వాస పరీక్ష

ప్రమాణస్వీకారం ముగిసిన వెంటనే ప్రభుత్వం తన మెజార్టీని నిరూపించుకోవాలని గవర్నర్ సూచించారు. దీని ప్రకారం మే 13వ తేదీలోపు అసెంబ్లీలో విజయ్ ప్రభుత్వం విశ్వాస పరీక్షను ఎదుర్కోనుంది. మెజార్టీ మార్కును సునాయాసంగా దాటుతామని టీవీకే వర్గాలు ధీమా వ్యక్తం చేస్తున్నాయి.

మొత్తానికి ముఖ్యమంత్రిగా పగ్గాలు చేపట్టిన తొలిరోజే తనదైన శైలిలో పాలనా ముద్ర వేయడానికి విజయ్ సిద్ధమయ్యారు. "ఒకే పవర్ సెంటర్" అనే నినాదంతో త్రిషతోపాటు ఆయన తన మంత్రులకు, కార్యకర్తలకు.. సన్నిహితులకు బలమైన హెచ్చరిక పంపినట్లయింది. మరి ఈ 'దళపతి' మార్క్ పాలన తమిళనాడు భవిష్యత్తును ఎలా మారుస్తుందో వేచి చూడాలి.