టిక్టాక్ డీల్ పై ట్రంప్ సంతకం.. అమెరికాకు కొత్త విజయమా?
అమెరికాలో టిక్టాక్ భవిష్యత్తుపై నెలల తరబడి నడిచిన అనిశ్చితికి ముగింపు లభించింది. అమెరికా అధ్యక్షుడు డొనాల్డ్ ట్రంప్ ఒక కీలక నిర్ణయం తీసుకున్నారు.;
అమెరికాలో టిక్టాక్ భవిష్యత్తుపై నెలల తరబడి నడిచిన అనిశ్చితికి ముగింపు లభించింది. అమెరికా అధ్యక్షుడు డొనాల్డ్ ట్రంప్ ఒక కీలక నిర్ణయం తీసుకున్నారు. టిక్టాక్ అమెరికాలో కొనసాగడానికి అనుమతిస్తూ షరతులు విధించిన ఎగ్జిక్యూటివ్ ఆర్డర్ పై ఆయన సంతకం చేశారు. ఈ నిర్ణయం టిక్టాక్ వినియోగదారులతో పాటు.. అమెరికన్ కంపెనీలకు కూడా పెద్ద ఉపశమనం కలిగించింది.
*$14 బిలియన్ విలువైన డీల్
ఈ డీల్ మొత్తం విలువ సుమారు 14 బిలియన్ డాలర్లుగా అంచనా వేయబడింది. ఉపాధ్యక్షుడు జె.డి. వాన్స్ ఈ అంచనాను వెల్లడించినప్పటికీ, అసలు కొనుగోలు ధరను మాత్రం గోప్యంగా ఉంచారు. డీల్ ప్రకారం, టిక్టాక్ను యాజమాన్యం చేస్తున్న చైనా కంపెనీ బైట్డ్యాన్స్ కి కేవలం 20 శాతం మాత్రమే వాటా మిగులనుంది. మిగిలిన వాటా అమెరికన్ ఇన్వెస్టర్లు, టెక్ దిగ్గజ కంపెనీల ఆధీనంలోకి వెళ్తుంది.
* షీ జిన్పింగ్తో ట్రంప్ చర్చ
ఈ ఒప్పందం కుదరడానికి ముందు ట్రంప్ చైనా అధ్యక్షుడు షీ జిన్పింగ్తో చర్చ జరిపినట్లు వెల్లడించారు. “నేను షీ జిన్పింగ్తో చాలా మంచి సంభాషణ జరిపాను. ఆయన పట్ల నాకు గౌరవం ఉంది. ఆయనకూ నాపట్ల గౌరవం ఉందని ఆశిస్తున్నాను. టిక్టాక్ గురించి మేము మాట్లాడాం. ఆయన ఈ డీల్కు గ్రీన్ సిగ్నల్ ఇచ్చారు,” అని ట్రంప్ తెలిపారు.
* అమెరికన్ కంపెనీలకే పెద్ద పాత్ర
టిక్టాక్కి అమెరికాలో కొత్త రూపాన్ని ఇవ్వబోతున్నవారు ప్రముఖ అమెరికన్ ఇన్వెస్టర్లు. ముఖ్యంగా లారీ ఎల్లిసన్ నేతృత్వంలోని ఒరాకిల్ ఈ వ్యవహారంలో కీలక పాత్ర పోషించనుంది. ట్రంప్ మాటల్లో “ఇది ఇప్పుడు అమెరికన్ ఇన్వెస్టర్లు, అమెరికన్ కంపెనీలు నడపబోతున్నాయి. ఇవి గొప్ప కంపెనీలు, గొప్ప ఇన్వెస్టర్లు. యువత కూడా దీన్ని బలంగా కోరుకున్నారు. ఒరాకిల్ టిక్టాక్కి భద్రత, సేఫ్టీ, టెక్నాలజీ పరంగా ప్రధాన భూమిక పోషించబోతోంది ” అని పేర్కొన్నారు.
చైనా ప్రభావం తగ్గనుంది
ఈ ఒప్పందం వల్ల టిక్టాక్పై చైనా కంపెనీ బైట్డ్యాన్స్ నియంత్రణ గణనీయంగా తగ్గనుంది. ఇప్పటి వరకు టిక్టాక్ ప్రత్యేకతగా నిలిచిన అల్గొరిథంపై చైనా ఆధిపత్యం ఉండేది. కానీ కొత్త డీల్ ప్రకారం ఆ కంట్రోల్ అమెరికన్ ఇన్వెస్టర్ల చేతుల్లోకి వెళ్తుంది. దీంతో అమెరికా యువత వినియోగించే డేటా, భద్రతా అంశాలు ఇకపై అమెరికన్ సంస్థల ఆధ్వర్యంలో ఉండనున్నాయి.
మేక్ అమెరికా గ్రేట్ అగేన్ ప్రచారానికి బూస్ట్
టిక్టాక్ డీల్ను ట్రంప్ తన “మేక్ అమెరికా గ్రేట్ అగేన్ (MAGA)” ప్రచారంలో మరో విజయంగా చూపిస్తున్నారు. చైనాపై ఆధిపత్యం తగ్గించి, అమెరికన్ కంపెనీలకు పెద్ద అవకాశాలు కల్పించడం ద్వారా, ట్రంప్ తన వ్యూహాత్మక విజయాలను అమెరికన్ ఓటర్ల ముందు ఉంచాలని భావిస్తున్నారు.
యువతలో సంతోషం
అమెరికాలో టిక్టాక్ వినియోగదారులు ప్రధానంగా యువతే. వీరంతా ఈ డీల్ కోసం ఎదురుచూశారు. టిక్టాక్ నిషేధం వస్తుందనే భయం నెలల తరబడి వారిలో కనిపించింది. ఇప్పుడు ట్రంప్ ఆర్డర్తో ఆ ఆందోళన తొలగిపోయింది. అమెరికన్ కంపెనీల ఆధ్వర్యంలో యాప్ మరింత భద్రతతో నడుస్తుందని వారు విశ్వసిస్తున్నారు.
మొత్తం మీద, టిక్టాక్పై ట్రంప్ తీసుకున్న ఈ నిర్ణయం ఒకవైపు అమెరికన్ ఇన్వెస్టర్లకు లాభదాయకం కాగా, మరోవైపు చైనాపై ఆధిపత్యం తగ్గించడంలో ఒక పెద్ద అడుగుగా నిలిచింది. ప్రపంచవ్యాప్తంగా ప్రజాదరణ పొందిన ఈ యాప్ ఇప్పుడు అమెరికా నియంత్రణలోకి వెళ్తుండడం గ్లోబల్ టెక్ రాజకీయాల్లో కీలక పరిణామంగా మారింది.