ద్రవిడ కోటలో మారుతున్న 'ముఖచిత్రం'.. సిద్ధం చేస్తున్న అధికారులు..

తమిళనాట ఒక శకం ముగిసి, మరో శకం మొదలయ్యే సమయం ఆసన్నమైంది. సినిమా వెండితెరపై కోట్లాది మందిని అలరించిన కథానాయకుడు, నిజ జీవితంలో ప్రజా నాయకుడిగా తన ప్రస్థానాన్ని ప్రారంభించబోతున్నారు. దశాబ్దాల తరబడి ద్రవిడ సిద్ధాంతాలతో వేళ్లూనుకున్న రాజకీయ కోటలో కొత్త గళం వినబడడం, అది ఏకంగా అధికారాన్ని కైవసం చేసుకునే స్థాయికి చేరడం సాధారణ విషయం కాదు. మార్పు కోరుకున్న తమిళ తంబీల తీర్పుతో చెన్నై నడిబొడ్డున ఉన్న సెయింట్ జార్జ్ ఫోర్ట్ సరికొత్త అతిథి కోసం సిద్ధమవుతోంది. నిన్నటి వరకు అధికారం చలాయించిన వారు నిష్క్రమిస్తుండగా, కొత్త ఆశలు, ఆశయాలతో మరో నాయకుడు అడుగు మోపుతున్న వేళ రాష్ట్ర రాజకీయాలు ఆసక్తికరంగా మారాయి.

స్టాలిన్ రాజీనామా..

తమిళనాడు అసెంబ్లీ ఎన్నికల ఫలితాల్లో డీఎంకే పరాజయం కావడంతో సీఎం పదవికి ఎంకే స్టాలిన్ రాజీనామా చేశారు. నిన్న రాత్రి గవర్నర్ రాజేంద్ర విశ్వనాథ్ అర్లేకర్ ను కలిసి తన రాజీనామా లేఖ సమర్పించారు. రాష్ట్ర ప్రజల తీర్పు గౌరవిస్తున్నామని, బలమైన ప్రతిపక్షంగా పోరాటం కొనసాగుతుందని ఆయన ప్రకటించారు. గవర్నర్ ఆయన రాజీనామా ఆమోదించి, కొత్త ప్రభుత్వం ఏర్పడే వరకు ఆపద్ధర్మ సీఎంగా కొనసాగాలని కోరారు. స్టాలిన్ పదవీకాలం ముగియడంతో ద్రవిడ రాజకీయాల్లో డీఎంకే ఆధిపత్యానికి ప్రస్తుతం విరామం పడింది.

విజయ్ ఆధ్వర్యంలో కొత్త ప్రభుత్వం

నటుడు, తమిళగ వెట్రి కళగం (టీవీకే) అధినేత విజయ్ అఖండ విజయం సాధించిన తర్వాత ప్రభుత్వ ఏర్పాటుకు సన్నాహాలు మొదలుపెట్టారు. అసెంబ్లీలో మెజారిటీ సీట్లు సాధించిన సింగిల్ లార్జెస్ట్ పార్టీగా తమకు ప్రభుత్వ ఏర్పాటుకు అవకాశం ఇవ్వాలని గవర్నర్‌ను కోరారు. తమిళనాడులోని 234 స్థానాలకు గానూ టీవీకే 108 స్థానాలను కైవసం చేసుకొని రికార్డు సృష్టించింది. ద్రవిడ పార్టీల గుత్తాధిపత్యాన్ని బద్దలు కొడుతూ విజయ్ సాధించిన ఈ విజయం అసాధారణమైనదిగా రాజకీయ విశ్లేషకులు అభిప్రాయపడుతున్నారు. ఆయన సీఎంగా ప్రమాణ స్వీకారం చేసే తేదీపై ఉత్కంఠత నెలకొంది.

సెక్రటేరియట్‌లో మారుతున్న దృశ్యాలు

ముఖ్యమంత్రి రాజీనామాతో సచివాలయంలోని సీఎం ఛాంబర్ లో అధికారులు మార్పులు చేపడుతున్నారు. స్టాలిన్‌కు సంబంధించిన వ్యక్తిగత వస్తువులు, ఆయన చిత్రపటాలు, డీఎంకే నాయకుల ఫోటోలను అధికారులు అక్కడి నుంచి తొలగిస్తున్నారు. కొత్త ముఖ్యమంత్రి విజయ్ బాధ్యతలు స్వీకరించడానికి వీలుగా గదిని సిద్ధం చేస్తున్నారు. సాధారణంగా ఏ రాష్ట్రంలోనైనా ప్రభుత్వం మారినప్పుడు జరిగే ఈ తంతు, ఇప్పుడు తమిళనాడు సెక్రటేరియట్‌లో ప్రత్యక్షంగా కనిపిస్తోంది. కొత్త నాయకుడి అభిరుచులకు అనుగుణంగా ఛాంబర్ ను తీర్చిదిద్దే పనిలో అధికారులు నిమగ్నమయ్యారు.

ప్రజాస్వామ్యంలో సహజమైన మార్పు

ప్రజాస్వామ్య వ్యవస్థలో గెలుపు ఓటములు సహజం. ఒక ప్రభుత్వం వెళ్లడం, మరో ప్రభుత్వం రావడం అనేది రాజ్యాంగబద్ధమైన ప్రక్రియ. తమిళనాడు ప్రజలు ఈసారి మార్పు వైపు మొగ్గు చూపడంతో విజయ్ కి అద్భుతమైన అవకాశం లభించింది. యువత, మహిళల ఓట్లు ఆయనను అధికార పీఠంపై కూర్చోబెట్టాయి. ఎన్నికల ప్రచారంలో ఇచ్చిన హామీలను విజయ్ ఎలా నెరవేరుస్తారు. పాలనలో తనదైన ముద్ర ఎలా వేస్తారనేది అందరినీ వేధిస్తున్న ప్రశ్న. సినిమా హీరోగా లక్షలాది మంది అభిమానులను గెలుచుకున్న విజయ్, ఇప్పుడు పాలకుడిగా ప్రజల మనసులను ఎలా గెలుచుకుంటారో వేచి చూడాలి.