ఆశ్చర్యం.. అనూహ్యం.. తెలంగాణలో టీడీపీకి ఈ విజయం

తెలంగాణ రాజకీయ యవనికపై ఒకప్పుడు వెలుగు వెలిగి.. కాలక్రమేణా కనుమరుగవుతుందనుకున్న తెలుగుదేశం పార్టీ ఖమ్మం గడ్డపై మళ్లీ తన ఉనికిని చాటుకుంది. ఉప ముఖ్యమంత్రి మల్లు భట్టి విక్రమార్క సొంత నియోజకవర్గమైన మధిర మున్సిపాలిటీలో అదీ ఆయన కంచుకోటగా భావించే 10వ వార్డులో టీడీపీ అభ్యర్థి బోడేపూడి రేవతి విజయం సాధించడం సామాన్యమైన విషయం కాదు. ఇది కేవలం ఒక వార్డు గెలుపు మాత్రమేనా లేక తెలంగాణలో పసుపు జెండా మళ్లీ రెపరెపలాడటానికి సంకేతమా అన్న చర్చకు ఈ ఫలితం గట్టి పునాది వేసింది.

కోటలో బీటలు.. పసుపు పార్టీ జోరు

మధిర ఫలితం అనూహ్యం అనడంలో సందేహం లేదు. అధికార కాంగ్రెస్ పార్టీలో అత్యంత కీలక నేతగా ఉన్న భట్టి విక్రమార్క ఇలాకాలో టీడీపీ జెండా పాతడం వెనుక లోతైన రాజకీయ కారణాలు ఉన్నాయి. ఉమ్మడి రాష్ట్ర కాలం నుంచీ ఖమ్మం జిల్లాలో టీడీపీకి బలమైన క్యాడర్ ఉంది. పార్టీ అగ్రనాయకత్వం ఆంధ్రప్రదేశ్‌పై దృష్టి పెట్టినప్పటికీ, క్షేత్రస్థాయిలో కార్యకర్తలు ఇంకా సజీవంగానే ఉన్నారని ఈ గెలుపు నిరూపించింది. హోరాహోరీగా సాగిన ఈ పోరులో గెలుపు వాకిట నిలవడం ద్వారా, తాము ‘ముగిసిపోయిన అధ్యాయం’ కాదని ఆ పార్టీ శ్రేణులు చాటిచెప్పాయి.

మారుతున్న సమీకరణాలు

తెలంగాణ రాష్ట్ర ఏర్పాటు తర్వాత బీఆర్ఎస్ దూకుడుకు తలొగ్గి, మెల్లగా ఏపీకే పరిమితమైన టీడీపీకి, ప్రస్తుత రాజకీయ పరిస్థితులు కొత్త ఊపిరిని ఇస్తున్నాయి. ఒకప్పుడు టీడీపీలో కీలకంగా పనిచేసిన రేవంత్ రెడ్డి ప్రస్తుతం ముఖ్యమంత్రిగా ఉండటం.. ఆయన నాయకత్వంలోని కాంగ్రెస్ ప్రభుత్వంపై బీఆర్ఎస్ చేస్తున్న విమర్శలు.. పరోక్షంగా టీడీపీకి స్పేస్ కల్పిస్తున్నాయనే విశ్లేషణలు ఉన్నాయి. ప్రధాన ప్రతిపక్షంగా ఉన్న బీఆర్ఎస్ ఇటీవల ఎదుర్కొంటున్న సవాళ్లు, క్యాడర్ చెల్లాచెదురు కావడం వంటివి టీడీపీ వంటి పాత శక్తులు మళ్లీ పుంజుకోవడానికి దారితీస్తున్నాయి.

సవాల్‌గా భవిష్యత్తు

అయితే ఈ ఒక్క విజయాన్నే ప్రాతిపదికగా తీసుకుని తెలంగాణ మొత్తం టీడీపీ పుంజుకుంటుందని చెప్పడం తొందరపాటే అవుతుంది. ఖమ్మం జిల్లాకు ఉన్న ప్రత్యేక రాజకీయ స్వభావం, అక్కడ టీడీపీకి ఉన్న పాత మూలాలు ఈ విజయానికి తోడయ్యాయి. రాష్ట్రవ్యాప్తంగా ఇదే ఫలితాన్ని పునరావృతం చేయాలంటే పార్టీ యంత్రాంగాన్ని మళ్లీ మొదటి నుంచి నిర్మించాల్సి ఉంటుంది.

మధిర గెలుపు టీడీపీకి ఒక టానిక్ లాంటిది. ఇది ఆ పార్టీ కార్యకర్తల్లో ఆత్మవిశ్వాసాన్ని నింపడమే కాకుండా రాబోయే స్థానిక సంస్థల ఎన్నికల్లో ఇతర పార్టీలకు ఒక హెచ్చరికగా నిలుస్తుంది. ఏది ఏమైనా తెలంగాణ రాజకీయాల్లో 'తృతీయ శక్తి' కోసం వెతుకులాట జరుగుతున్న తరుణంలో పాత మిత్రుడు మళ్లీ రేసులోకి రావడం ఆసక్తికర పరిణామం.