బ్రేకింగ్ : రేపు స్కూళ్లకు సెలవు? క్లారిటీ ఇదే

తెలంగాణ రాష్ట్రంలో విద్యాసంస్థల బంద్‌పై ఉత్కంఠ నెలకొంది. విద్యార్థి సంఘాలు బుధవారం (జూలై 23) రాష్ట్రవ్యాప్తంగా బంద్‌కు పిలుపునివ్వడంతో పలు స్కూళ్లు, కాలేజీలు ఇప్పటికే తమ విద్యార్థులకు సెలవు ప్రకటిస్తూ తల్లిదండ్రులకు మెసేజ్‌లు పంపాయి.

బంద్‌కు కారణం ఏమిటి?

ప్రభుత్వానికి తమ డిమాండ్లు తెలియజేయడానికి, విద్యా రంగాన్ని ప్రక్షాళన చేయాలని కోరుతూ విద్యార్థి సంఘాలు ఈ బంద్‌కు పిలుపునిచ్చాయి. వారి ప్రధాన డిమాండ్లు చూస్తే... ప్రభుత్వ స్కూళ్లు, కాలేజీల్లో అవసరమైన మౌలిక సదుపాయాలను కల్పించాలి. ప్రైవేట్ విద్యాసంస్థల ఫీజు వ్యవస్థపై కఠిన చర్యలు తీసుకోవాలి.ఉపకార వేతనాలు: విద్యార్థులకు సబ్సిడీ, ఉపకార వేతనాలు సకాలంలో అందించాలి.ఉద్యోగాల భర్తీ: బోధనా సిబ్బంది ఖాళీలను తక్షణమే భర్తీ చేయాలని డిమాండ్ చేశారు.

తల్లిదండ్రుల స్పందన

"రేపు బంద్ నేపథ్యంలో స్కూల్ బంద్ ఉంటుంది. విద్యార్థులు రావాల్సిన అవసరం లేదు" అంటూ తల్లిదండ్రుల ఫోన్లకు మెసేజ్‌లు వస్తున్నాయి. ఈ అకస్మాత్తు సెలవుపై మిశ్రమ స్పందన వ్యక్తమవుతోంది. కొందరు దీనిని స్వాగతించగా, మరికొందరు ఆందోళన వ్యక్తం చేస్తున్నారు. "చివరి నిమిషంలో సమాచారం ఇవ్వడం వల్ల ఏర్పడే అవాంతరాలపై యాజమాన్యాలు ముందుగానే స్పందించాలి" అని వారు అభిప్రాయపడుతున్నారు.

గత వారం ఆదివారం సాధారణ సెలవు, ఆపై సోమవారం బోనాల సందర్భంగా సెలవు ఇవ్వడంతో, మూడు రోజులు స్కూళ్లు మూతపడ్డాయి. ఇవాళ (మంగళవారం) స్కూళ్లు, కాలేజీలు తిరిగి తెరుచుకున్నాయి. ఈ నేపథ్యంలో రేపు (బుధవారం) బంద్ కారణంగా మళ్లీ విద్యాసంస్థలు మూతపడే అవకాశం ఉంది.

ఈ బంద్ ప్రభుత్వాన్ని ఎంతవరకు ప్రభావితం చేస్తుందో వేచి చూడాలి. అయితే, విద్యార్థులకు, తల్లిదండ్రులకు కలిగే అసౌకర్యాలను నివారించడానికి విద్యాసంస్థల యాజమాన్యాలు ముందస్తు చర్యలు తీసుకోవడం మంచి పరిణామం.