తలాఖ్ కాదు.. ఖులా.. క్రీడా జంట విడాకుల్లో బిగ్ ట్విస్ట్

ఆ జంట కలయిక క్రీడా ప్రపంచంలోనే కాదు.. మొత్తం ప్రపంచంలోనే సంచలనం.. పద్నాలుగేళ్లు సాగిన ఆ బంధం ఇప్పుడు తెగిపోవడం కూడా అంతే సంచలనంగా మారింది. ఇందులో అదొక్కటే కాదు.. అతడి రాసలీలలతో వేసారి ఆమెనే విడాకులు తీసుకుందనే చర్చ నడుస్తోంది. ఈ విషయాన్ని ఆమె తండ్రి కూడా ధ్రువీకరించాడు. ఇంతకూ ఏం జరిగిందంటే..?

సానియానే విసిగిపోయిందా?

భారత టెన్నిస్ స్టార్, హైదారాబాదీ సానియా మీర్జా, పాకిస్థాన్ క్రికెట్ జట్టు మాజీ కెప్టెన్ షోయబ్ మాలిక్ విడిపోయారనే వార్త ఇప్పుడు పెద్ద హాట్ టాపిక్. ఇందులో ఎవరు బాధ్యులు అన్నది అందరూ సెర్చ్ చేస్తున్నారు. సానియాతో విడిపోవడమే కాదు.. షోయబ్ మూడో వివాహం కూడా చేసుకున్నాడు. ఇది మరింత సంచలనం. అయితే, ముస్లిం సంప్రదాయం ప్రకారం షోయబ్ సానియాకు తలాఖ్ చెప్పాడా? లేదా? అనేది కూడా పరిశీలిస్తున్నారు. కానీ, ఈ జంట ఖులా ప్రకారం విడిపోయినట్లుగా సానియా తండ్రి ఇమ్రాన్ మీర్జా తెలిపాడు. ఖులా అనేది ఇస్లామిక్ న్యాయశాస్త్రం, దీని ద్వారా స్త్రీ తన భర్త నుంచి ఏకపక్షంగా విడాకులు తీసుకోవచ్చు. తలాఖ్ ప్రకారం మాత్రం భర్త విడాకులు ఇస్తాడు. ఖులాలో సరైన కారణం చూపుతూ.. కోర్టును విడాకులు కోరుతుంది మహిళ. వివాహ బంధం నుంచి వైదొలగినందుకు ఖులాలో మహిళ భరణం కూడా కోరవచ్చు. కాగా, షోయబ్ కు వివాహేతర సంబంధాలు ఉన్నట్లు తెలుస్తోంది. అతడి రాసలీలలు తెలిసి సానియా విడిపోయినట్లు స్పష్టమవుతోంది. తాజా పరిణామంపై షోయబ్ కుటుంబం చేసిన ప్రకటన కూడా దీనినే బలపరుస్తోంది.

కొన్ని నెలల కిందటనే విడాకులు..

షోయబ్-సానియా కొన్ని నెలల కిందటనే విడిపోయారని షోయబ్ కుటుంబం చెబుతోంది. దీనికి షోయబ్ కుటుంబం కూడా వ్యతిరేకంగానే ఉన్నట్లు సమాచారం. అంతేగాక.. పెళ్లికి వీరంతా దూరంగా ఉన్నట్లు తెలిసింది. 'సానియా వ్యక్తిగత వివరాలను ఎప్పుడూ బయటపెట్టలేదు. పబ్లిక్ లైఫ్ నకూ దూరంగానే ఉంది. ఇప్పుడు.. షోయబ్‌ కొత్త ప్రయాణం బాగుండాలని సానియా శుభాకాంక్షలు తెలిపింది' అని సోషల్ మీడియాలో ప్రకటించింది. కాగా, షోయబ్-సానియా విడిపోవడం ఇవీ స్పష్టమైన కారణాలు ఇవి అని బయటకు రాలేదు. కాకపోతే.. మాలిక్‌ వివాహేతర సంబంధాల గురించి పాక్ మీడియాలో కథలు కథలుగా చెబుతున్నారు.

వదిన సానియాకు షోయబ్ సోదరీమణుల బాసట..

సానియా-షోయబ్ విడివడడం షోయబ్ సోదరీణమణులకూ ఇష్టం లేదట. మాలిక్ కు వివాహేతర సంబంధాలు ఉన్నట్లు వారు అనుమానం వ్యక్తం చేశారు. కాగా, సానియా-షోయబ్ ఏడాది కిందటనే విడిపోతారని వార్తలు వచ్చాయి. ప్రస్తుతం వివాహం చేసుకున్న సనా జావేద్‌ కు షోయబ్ మాలిక్ పుట్టినరోజు శుభాకాంక్షలు తెలిపాడు. తాజా పరిణామాలతో ఇప్పుడది వైరల్ అవుతోంది. గత ఏడాది షోయబ్ తన ఇన్‌స్టా హ్యాండిల్‌ లో రెండు స్నాప్‌ షాట్‌ లతో పాటు "హ్యాపీ బర్త్‌డే బడ్డీ" అంటూ సనాతో ఉన్న ఫొటోను పోస్ట్ చేశాడు.