సాయికృష్ణ కేసులో కీలక పరిణామం.. సీఐ ఫ్రెండ్ అరెస్ట్.. సీబీఐ విచారణకు తల్లి..

తెలుగు రాష్ట్రాల్లో తీవ్ర సంచలనం సృష్టించిన సాయికృష్ణ లాకప్ డెత్ కేసు రోజురోజుకూ మరిన్ని కొత్త మలుపులు తిరుగుతోంది. ఈ కేసులో ఇప్పటికే ప్రధాన నిందితుడిగా ఉన్న సర్కిల్ ఇన్‌స్పెక్టర్ నాగరాజును అధికారులు అరెస్టు చేయగా తాజాగా ఆయన అత్యంత ఆప్తమిత్రుడు, సన్నిహితుడైన సురేష్‌ను ప్రత్యేక దర్యాప్తు బృందం అధికారులు అదుపులోకి తీసుకోవడం కలకలం రేపుతోంది. సాయికృష్ణ మరణం తర్వాత కేసును తారుమారు చేయడంలో సాక్ష్యాలను మాయం చేయడంలో సురేష్ కీలక పాత్ర పోషించినట్లు ప్రాథమిక విచారణలో తేలడంతో అధికారులు ఈ చర్య తీసుకున్నారు.

మృతదేహం మాయం.. సీఐతో సురేష్ చీకటి ఒప్పందాలు?

సిట్ అధికారుల దర్యాప్తు ప్రకారం.. సాయికృష్ణ లాకప్ డెత్ అనంతరం జరిగిన పరిణామాల్లో సురేష్ చాలా చురుగ్గా వ్యవహరించినట్లు తెలుస్తోంది. మృతదేహాన్ని గుట్టుచప్పుడు కాకుండా తరలించడం, స్టేషన్ పరిసరాల్లో ఆనవాళ్లను చెరిపివేయడంలో సీఐ నాగరాజుకు సురేష్ పూర్తిస్థాయిలో సహకరించినట్లు అధికారులు భావిస్తున్నారు. అసలు పోలీసు శాఖతో ఎలాంటి సంబంధం లేని ఒక సామాన్య వ్యక్తి అయిన సురేష్.. పోలీస్ అధికారిక వ్యవహారాల్లో ఎలా జోక్యం చేసుకున్నాడు? సీఐ నాగరాజుతో అతనికి ఉన్న వ్యక్తిగత, ఆర్థిక లావాదేవీలు ఏంటి? అనే కోణంలో సిట్ లోతుగా విచారిస్తోంది. కేసు బయటకు పొక్కకుండా ఉండేందుకు సాయికృష్ణ కుటుంబ సభ్యులతో సురేష్ రాయబారాలు నడిపినట్లు సమాచారం. ఎవరి ఆదేశాల మేరకు ఈ సెటిల్మెంట్లు చేయడానికి ప్రయత్నించాడు? బాధిత కుటుంబానికి ఎలాంటి హామీలు ఇచ్చాడు? అనే అంశాలపై అధికారులు సురేష్‌ను సుదీర్ఘంగా ప్రశ్నిస్తున్నారు.

సీబీఐ విచారణ కోరుతూ హైకోర్టులో తల్లి పిటిషన్

ఇదిలా ఉండగా ఈ కేసులో న్యాయం కోరుతూ సాయికృష్ణ తల్లి విజయలక్ష్మి ఆంధ్రప్రదేశ్ హైకోర్టును ఆశ్రయించడం మరో కీలక పరిణామంగా మారింది. ఈ కేసు దర్యాప్తును సీబీఐ కి అప్పగించాలని, ఆ విచారణను న్యాయస్థానమే స్వయంగా పర్యవేక్షించాలని ఆమె తన పిటిషన్‌లో కోరారు. ఈ సందర్భంగా విజయవాడ పోలీస్ కమిషనర్‌తో పాటు ఉన్నతాధికారులపై ఆమె సంచలన ఆరోపణలు చేశారు. "నా కుమారుడు అదృశ్యమైన విషయం ఉన్నతాధికారులకు ముందే తెలిసినా.. దాదాపు 40 రోజుల పాటు ఎలాంటి చర్యలు తీసుకోలేదు. నేను ఫిర్యాదు చేసిన 45 రోజుల తర్వాతే కేసు నమోదు చేశారు. ప్రస్తుతం జరుగుతున్న సిట్ దర్యాప్తు కేవలం ఉన్నతాధికారులను రక్షించే ప్రయత్నం మాత్రమే." అని సాయికృష్ణ తల్లి విజయలక్ష్మి పేర్కొన్నారు.

హెబియస్ కార్పస్ పిటిషన్‌ను నిర్వీర్యం చేయడానికే సీఐ నాగరాజు అరెస్టును ఒక కంటి తుడుపు చర్యగా చూపించారని, అసలు కుట్రను సిట్ దాచిపెడుతోందని ఆమె ఆరోపించారు. ఈ కేసులో పెద్దల ప్రమేయం ఉన్నందున కోర్టు పర్యవేక్షణలోనే సీబీఐ విచారణ జరగాలని విజ్ఞప్తి చేశారు.

సోమవారం హైకోర్టులో విచారణ

ఒకవైపు సిట్ విచారణలో సురేష్ అరెస్టుతో కొత్త విషయాలు వెలుగులోకి వస్తుండగా.. మరోవైపు బాధితుడి తల్లి సీబీఐ విచారణ కోరడం ఈ కేసును మరింత ఉత్కంఠభరితంగా మార్చింది. విజయలక్ష్మి దాఖలు చేసిన పిటిషన్‌పై హైకోర్టు సోమవారం విచారణ చేపట్టే అవకాశం ఉంది. న్యాయస్థానం ఎలాంటి నిర్ణయం తీసుకోబోతోంది? ఈ కేసులో మరికొందరు అధికారుల పేర్లు బయటకు రానున్నాయా? అనే అంశాలపై ప్రస్తుతం రాజకీయ, న్యాయ వర్గాల్లో తీవ్ర చర్చ నడుస్తోంది.