యుద్ధాలతో సంబంధం లేని ప్రాంతాలు.. మూడోది వచ్చినా ఇక్కడ సేఫ్!

గత కొంతకాలంగా ప్రపంచంలో ఏదో ఒక మూల ఉద్రిక్త పరిస్థితులు నెలకొంటూనే ఉన్న సంగతి తెలిసిందే. ఉదాహరణకు సుమారు మూడేళ్లుగా అవిరామంగా సాగుతోన్న ఉక్రెయిన్ - రష్యా యుద్ధం.. 2023 అక్టోబర్ నుంచి జరుగుతున్న ఇజ్రాయెల్ – హమాస్ వార్.. ఈ క్రమంలో తాజాగా ముగిసినట్లు చెబుతోన్న ఇజ్రాయెల్ - ఇరాన్ మధ్య దాడులు! ఈ సమయంలో మూడో ప్రపంచయుద్ధం వస్తే..? అయినప్పటికీ ఉన్నంతలో సేఫ్ గా ఉండే ప్రాంతాల విషయం తెరపైకి వచ్చింది.

అవును... ఇటీవల కాలంలో పలుదేశాల మధ్య జరుగుతున్న యుద్ధాలు, ఉద్రిక్త పరిస్థితుల వేళ మూడో ప్రపంచయుద్ధానికి సంబంధించిన చర్చలు విపరీతంగా జరుగుతున్నాయి. ఈ క్రమంలో ఒకవేళ నిజంగానే.. ఏ రెండు దేశాల వల్ల మూడో ప్రపంచ యుద్ధానికి తెరలేచినా.. ఆయా దేశాలకు చెందిన మిత్రదేశాలన్నీ ఈ యుద్ధంలో పాల్గొనే అవకాశాలు పుష్కలంగా ఉంటాయి. అప్పుడు అది భారీగా విస్తరించే అవకాశం ఉంది.

ఈ నేపథ్యంలో... ఆయా దేశాల్లోని భౌగోళిక, రాజకీయ స్థితిగతులు.. సైనిక తటస్థత, స్థిరమైన పరిస్థితుల కారణంగా సురక్షితమైన ప్రాంతాలుగా గుర్తింపు పొందిన వాటి వివరాలను ‘ది మెట్రో’ తెలిపింది. అవేమిటనేది ఇప్పుడు చూద్దామ్..!

అంటార్కిటికా: అణు యుద్ధం జరిగితే అంటార్కిటికా అత్యంత సురక్షితమైన ప్రదేశాలలో ఒకటి కావచ్చు. ఇక్కడ యుద్ధాలు జరిగే అవకాశం చాలా తక్కువ లేదా అస్సలు లేదని అంటున్నారు. అదనంగా 5.4 మిలియన్ చదరపు మైళ్ల విస్తీర్ణంలో ఉన్న దాని విస్తారమైన భూమి ఎంతోమంది ఆశ్రయం పొందేందుకు తగినంత స్థలాన్ని అందిస్తుంది.

ఐస్లాండ్: ఐస్లాండ్ కూడా యుద్ధ సమయాల్లో మరొక సురక్షితమైన స్వర్గధామం కావచ్చు. అత్యంత శాంతియుత దేశాలలో ఒకటిగా చాలా ఏళ్లుగా టాప్ ప్లేస్ లో గుర్తింపు పొందిన ఈ దేశం పూర్తి స్థాయి యుద్ధంలో ఎప్పుడూ పాల్గొనలేదు. దేశ భౌగోళిక స్థానం యుద్ధాలకు తక్కువ అవకాశమిస్తుంది.

దక్షిణాఫ్రికా: మూడవ ప్రపంచ యుద్ధం జరిగినప్పుడు సురక్షితమైన ప్రదేశంగా మారే అవకాశం ఉన్న జాబితాలో దక్షిణాఫ్రికా కూడా ఉంది. సమృద్ధిగా ఆహార వనరులు, సారవంతమైన భూమి, మంచినీటి లభ్యతతో ఇది స్వయం సమృద్ధికి బలమైన అవకాశాలను అందిస్తుంది. అంతేకాకుండా.. దక్షిణాఫ్రికా ఆధునిక మౌలిక సదుపాయాలు కూడా కీలక పాత్ర పోషిస్తాయి.

ఫిజి: మారుమూల ద్వీప దేశం అయ్యిన ఫిజి.. దాని పొరుగున ఉన్న ఆస్ట్రేలియా నుండి సుమారు 2,700 మైళ్ల దూరంలో ఉంది. సైనిక ఉనికితో, ఫిజి వ్యూహాత్మక ప్రాముఖ్యతను కలిగి ఉంది. ఇదే సమయంలో... గ్లోబల్ పీస్ ఇండెక్స్‌ - 2025లో కూడా టాప్ లో ఉంది. అదేవిధంగా... గొప్ప సహజ వనరులను కలిగి ఉంది.

చిలీ: 4,000 మైళ్ల కంటే ఎక్కువ విస్తీర్ణంలో ఉన్న దక్షిణ అమెరికా దేశమైన చిలీ.. మాస్కో - మాడ్రిడ్ మధ్య వ్యూహాత్మక లింక్‌ గా వ్యవహరించే సామర్థ్యాన్ని కలిగి ఉంది. ఈ ప్రాంతం మానవ మనుగడకు అవసరమైన విభిన్న పంటలు, సహజ వనరులతో సమృద్ధిగా ఉంది. దక్షిణ అమెరికాలోని అత్యంత అభివృద్ధి చెందిన ప్రాంతాలలో చిలీ ఒకటిగా నిలిచింది.

న్యూజిలాండ్: మూడవ ప్రపంచ యుద్ధం భయం వెంటాడుతున్న సమయంలో.. ప్రజలు తప్పించుకోవడానికి వెళ్లే దేశాలలో న్యూజిలాండ్ కూడా ఒకటి కావచ్చు. గ్లోబల్ పీస్ ఇండెక్స్‌ లో రెండవ స్థానంలో ఉన్న ఈ దేశం.. ప్రపంచ సంఘర్షణలలో తటస్థంగా ఉండటంలో దీర్ఘకాల రికార్డును కలిగి ఉంది. ఒక నివేదిక ప్రకారం.. ఈ దేశం రాడార్ జాబితాలో లేదు!

టువాలు: హవాయి - ఆస్ట్రేలియా మధ్య సగం దూరంలో ఉన్న టువాలు ద్వీపంలో కేవలం 11,000 జనాభా మాత్రమే ఉంది. ఇక్కడి మౌలిక సదుపాయాలు పరిమితంగా ఉన్నప్పటికీ.. వనరులు యుద్ధ పరిస్థితులకు తావులేనివిధంగా ఉన్నాయి.

స్విట్జర్లాండ్: చాలా కాలంగా శాంతి, తటస్థతతో ముడిపడి ఉన్న స్విట్జర్లాండ్.. అణు సంఘర్షణను ఎదుర్కొనే అతికొద్ది దేశాలలో ఒకటిగా పరిగణించబడుతుంది. రెండవ ప్రపంచ యుద్ధం నుండి ఏ యుద్ధాలలోనూ ఇది పాల్గొనలేదు. దీనికి.. దాని పర్వత ప్రాంతంతో పాటు, బలమైన సహజ రక్షణను కలిగి ఉంది.

గ్రీన్‌ ల్యాండ్: ప్రపంచంలోనే అతిపెద్ద ద్వీపం, డెన్మార్క్ భూభాగం అయిన గ్రీన్‌ ల్యాండ్ లో కేవలం 56,000 జనాభా మాత్రమే ఉంటారు. దాని మారుమూల స్థానం, రాజకీయ తటస్థత కారణంగా ఇక్కడ సంఘర్షణలకు ఆస్కారం చాలా తక్కువని చెబుతారు.

ఇండోనేషియా: ఇది చిన్న దేశమైనప్పటికీ.. ప్రపంచ సంఘర్షణలలో ఎటువైపూ పొత్తు పెట్టుకోదనే పేరు సంపాదించుకుంది. ఈ దేశం నిరంతరం ప్రపంచ శాంతికి ప్రాధాన్యతనిస్తూ, తటస్థ విదేశాంగ విధానాన్ని అనుసరిస్తుంది. దేశ స్వతంత్ర వైఖరి, భౌగోళిక రాజకీయ స్థానం మొదలైనవి ఈ దేశాన్ని ప్రపంచ సంఘర్షణలవైపు చూసేలా చేయనివ్వవు.