600 ఎకరాలు, 200 రకాలు..కోట్లల్లో ఆదాయం, వేల మందికి ఉపాధి..

ఒకప్పుడు కాలుష్యంతో సమస్యలు ఎదుర్కొన్న రిలయన్స్ సంస్థ.. ఆ సమస్యనే ఒక అవకాశంగా మార్చుకుంది. వందల ఎకరాల్లో మామిడి చెట్లను పెంచి, వందల రకాల పండ్లను పండిస్తూ, ప్రకృతికి తమ వంతు చేయూతనందిస్తోంది. ఈ తోట కేవలం ఆదాయాన్ని మాత్రమే కాదు, పర్యావరణాన్ని కాపాడుతూ, చుట్టుపక్కల రైతులకు కొత్త దారులు చూపిస్తోంది. అత్యాధునిక వ్యవసాయ పద్ధతులను అవలంబిస్తూ, నాణ్యమైన మామిడి పండ్లను ప్రపంచానికి అందిస్తోంది. నీతా అంబానీనే స్వయంగా పర్యవేక్షిస్తుండడం విశేషం.

అంబానీ వారి మామిడి తోట ఆసియాలోనే అతి పెద్దదట. ఎకరాల కొద్దీ విస్తరించి, వందల రకాల మామిడి పండ్లను పండిస్తూ, కోట్లల్లో ఆదాయం తెచ్చిపెడుతోంది. ఇంతకీ ఈ ప్రత్యేకమైన తోట ఎక్కడ ఉంది? దీని వెనుక ఉన్న కథ ఏమిటి? రిలయన్స్ సంస్థ దీన్ని ఎందుకు ప్రారంభించింది? వివరంగా ఈ కథనంలో తెలుసుకుందాం.

గుజరాత్‌లోని జామ్‌నగర్‌లో రిలయన్స్ ఇండస్ట్రీస్ నిర్వహిస్తున్న 'ధీరూభాయ్ అంబానీ లఖీబాగ్ అమ్రాయీ' మామిడి తోట ఆసియాలోనే అతి పెద్దదిగా గుర్తింపు పొందింది. సుమారు 600 ఎకరాల్లో విస్తరించి ఉన్న ఈ తోటలో లక్షా ముప్పై వేలకు పైగా మామిడి చెట్లు ఉన్నాయి. ఇక్కడ దాదాపు 200 రకాల మామిడి పండ్లను పండిస్తారు. ప్రతి సంవత్సరం ఈ తోట నుండి 600 టన్నుల మామిడి పండ్లు దిగుబడి వస్తాయి. రిలయన్స్ సంస్థ ఈ పండ్లన్నింటినీ ఆన్‌లైన్‌లోనూ, తమ స్టోర్ల ద్వారా దేశ విదేశాలకు ఎగుమతి చేస్తూ భారీగా ఆదాయం పొందుతోంది.

ఈ తోట ఏర్పాటు వెనుక ఒక ఆసక్తికరమైన కథ ఉంది. 1997లో జామ్‌నగర్‌లోని రిలయన్స్ చమురు శుద్ధి కర్మాగారం వల్ల కాలుష్యం పెరిగిపోయింది. కాలుష్య నియంత్రణ మండలి నిబంధనలకు అనుగుణంగా చర్యలు తీసుకోవాల్సిన పరిస్థితి ఏర్పడింది. అప్పుడు రిలయన్స్ యాజమాన్యం ఒక వినూత్నమైన ఆలోచన చేసింది. అదే ఈరోజు వారికి ప్రత్యేక గుర్తింపును తెచ్చిపెట్టింది. ఒకప్పుడు బీడు భూమిగా ఉన్న ప్రాంతాన్ని మామిడి తోటగా మార్చారు.ఇప్పుడు ఈ తోట ఏకంగా వంద కోట్ల రూపాయలకు పైగా టర్నోవర్‌ను అందుకుంటోంది. అంతేకాదు, చుట్టుపక్కల ప్రాంతాల వారికి కూడా ఉపాధి కల్పిస్తోంది.

ఈ తోటలో కేసర్, ఆల్ఫోన్సో, రత్న, సింధు, నీలమ్, ఆమ్రపాలి వంటి మన దేశీయ రకాలతో పాటు టామీ అట్కిన్స్, కెంట్, లిలీ, మాయా వంటి విదేశీ రకాలు కూడా ఉన్నాయి. లక్షల సంఖ్యలో చెట్లను పెంచుతూ, డీశాలినేషన్ (నీటిలోని లవణాలు తొలగించడం), డ్రిప్ ఇరిగేషన్ (బిందు సేద్యం), ఫెర్టిగేషన్ (ఎరువులను నీటి ద్వారా అందించడం), వాటర్ హార్వెస్టింగ్ (వాన నీటిని నిల్వ చేయడం) వంటి అత్యాధునిక వ్యవసాయ పద్ధతులను ఇక్కడ ఉపయోగిస్తారు. రసాయన ఎరువులు, క్రిమిసంహారక మందులు వాడకుండా ప్రత్యేక శ్రద్ధ తీసుకోవడం వల్లనే ఇక్కడ పండే ప్రతి పండు ఎంతో రుచిగా ఉంటుంది.

ఈ తోట ఇప్పుడు రైతులకు, శాస్త్రవేత్తలకు పరిశోధనా కేంద్రంగా కూడా మారింది. రిలయన్స్ సంస్థ ప్రతి సంవత్సరం లక్షకు పైగా మామిడి మొక్కలను స్థానిక రైతులకు పంచిపెడుతూ, ఆధునిక వ్యవసాయ పద్ధతులపై శిక్షణ ఇస్తోంది. తద్వారా ఆ ప్రాంతంలో పచ్చదనాన్ని పెంచడానికి సహాయం చేస్తోంది. ఈ ప్రత్యేకమైన మామిడి తోటను నీతా అంబానీ స్వయంగా పర్యవేక్షిస్తుండటం విశేషం. వేసవిలో ఈ తోట ప్రపంచవ్యాప్తంగా పర్యాటకులను ఆకర్షిస్తోంది.