పవన్ కళ్యాణ్ కు తీవ్ర అస్వస్థత.. శస్త్రచికత్స.. కోలుకోవడానికి చాలా కాలం..

ఆంధ్రప్రదేశ్ ఉప ముఖ్యమంత్రి, జనసేన పార్టీ అధ్యక్షుడు పవన్ కళ్యాణ్ ఆరోగ్య సమస్యల కారణంగా శస్త్రచికిత్స చేయించుకోవాల్సి రావడం రాష్ట్ర రాజకీయ వర్గాల్లో ఆందోళన కలిగించింది. గత కొద్ది నెలలుగా ఆరోగ్యపరమైన ఇబ్బందులతో బాధపడుతున్న ఆయన శుక్రవారం ఉదయం ఆకస్మికంగా అస్వస్థతకు గురైనట్లు అధికారిక వర్గాలు వెల్లడించాయి.

శుక్రవారం ఉదయం పాలనాపరమైన విషయాలపై అధికారులతో సమావేశమై చర్చిస్తున్న సమయంలో పవన్ కళ్యాణ్ అకస్మాత్తుగా అస్వస్థతకు లోనయ్యారు. వెంటనే అప్రమత్తమైన సిబ్బంది, వ్యక్తిగత వైద్యుల సూచన మేరకు ఆయనను సమీపంలోని ఆసుపత్రికి తరలించారు. అక్కడ వైద్యులు సమగ్ర పరీక్షలు నిర్వహించగా, ఆయన ఆరోగ్య పరిస్థితిని అంచనా వేయడానికి ఎం.ఆర్.ఐ. సహా పలు పరీక్షలు చేశారు. పరీక్షల ఫలితాలను పరిశీలించిన అనంతరం శస్త్రచికిత్స అవసరమని వైద్యులు నిర్ణయించినట్లు డిప్యూటీ సీఎం కార్యాలయం తెలిపింది.

ఈ క్రమంలో శనివారం సాయంత్రం పవన్ కళ్యాణ్‌కు విజయవంతంగా శస్త్రచికిత్స నిర్వహించినట్లు జనసేన పార్టీ అధికారికంగా ప్రకటించింది. సర్జరీ అనంతరం ఆయన ఆరోగ్య పరిస్థితి ప్రస్తుతం స్థిరంగా ఉందని, వైద్యుల పర్యవేక్షణలో ఉన్నారని సమాచారం. అయితే పూర్తి కోలుకోవడానికి కొంత సమయం పట్టే అవకాశం ఉందని వైద్యులు స్పష్టం చేసినట్లు పార్టీ వర్గాలు పేర్కొన్నాయి.

వైద్యులు ఇచ్చిన సూచనల ప్రకారం.. పవన్ కళ్యాణ్ కనీసం వారం నుంచి పది రోజులపాటు పూర్తిగా విశ్రాంతి తీసుకోవాల్సి ఉంటుంది. ఆ తర్వాతే ఆయన మళ్లీ అధికారిక కార్యక్రమాల్లో పాల్గొనే అవకాశం ఉందని వెల్లడించారు. దీర్ఘకాలికంగా కూడా ఆరోగ్యంపై ప్రత్యేక శ్రద్ధ అవసరమని, కఠినమైన పనిభారం తగ్గించుకోవాలని వైద్యులు సూచించినట్లు తెలుస్తోంది.

ఈ ఘటన నేపథ్యంలో రాష్ట్ర రాజకీయ వర్గాల్లో చర్చలు మొదలయ్యాయి. ముఖ్యంగా ప్రభుత్వ కార్యక్రమాలు, పార్టీ కార్యకలాపాలపై తాత్కాలిక ప్రభావం పడే అవకాశం ఉందని విశ్లేషకులు అభిప్రాయపడుతున్నారు. ఇదిలా ఉండగా పవన్ కళ్యాణ్ త్వరగా కోలుకోవాలని వివిధ రాజకీయ పార్టీల నేతలు, కూటమి భాగస్వాములు, జనసేన కార్యకర్తలు, అభిమానులు ఆకాంక్షిస్తున్నారు.

సోషల్ మీడియా వేదికలపై కూడా ఆయన ఆరోగ్యం గురించి అభిమానులు ఆరా తీస్తూ “గెట్ వెల్ సూన్” సందేశాలతో మద్దతు వ్యక్తం చేస్తున్నారు. అభిమానుల ప్రార్థనలు, శుభాకాంక్షల మధ్య పవన్ కళ్యాణ్ త్వరలోనే కోలుకుని ప్రజా సేవలో తిరిగి చురుకుగా పాల్గొంటారని పార్టీ నాయకులు ఆశాభావం వ్యక్తం చేస్తున్నారు.