సౌదీ ఆధిపత్యానికి చెక్! ఒపెక్ నుండి బయటకు యూఏఈ.. గ్లోబల్ ఆయిల్ మార్కెట్‌లో కొత్త సమీకరణాలు.

ప్రపంచ చమురు రాజకీయాల్లో ఒక సంచలనాత్మక పరిణామం చోటుచేసుకుంది. చమురు ఉత్పత్తి దేశాల కూటమి (ఓపెక్) నుంచి వైదొలగాలని యునైటెడ్ అరబ్ ఎమిరేట్స్ (యూఏఈ) తీసుకున్న నిర్ణయం అంతర్జాతీయ మార్కెట్లను ఒక్కసారిగా కుదిపేసింది. ఈ నిర్ణయం ఆకస్మికంగా అనిపించినప్పటికీ గత కొంతకాలంగా అబుదాబీలో గూడుకట్టుకున్న అసంతృప్తికి ఇది పరాకాష్టగా విశ్లేషకులు భావిస్తున్నారు.

కూటమిపై అసహనం.. నిర్ణయం వెనుక అసలు కారణాలు

ఒపెక్ కూటమిలో సౌదీ అరేబియా తర్వాత అత్యంత కీలకమైన దేశం యూఏఈ. అయితే కూటమి విధించిన కఠినమైన ఉత్పత్తి కోటాల వల్ల తన పూర్తి సామర్థ్యాన్ని వినియోగించుకోలేకపోతున్నామన్నది యూఏఈ ప్రధాన ఫిర్యాదు. యూఏఈ తన చమురు ఉత్పత్తి సామర్థ్యాన్ని పెంచుకోవడానికి భారీగా పెట్టుబడులు పెట్టింది. కానీ ధరలను నియంత్రించే క్రమంలో ఉత్పత్తిని తగ్గించాలన్న సౌదీ అరేబియా ఆధిపత్య ధోరణి యూఏఈ ఆర్థిక ప్రయోజనాలకు గొడ్డలిపెట్టుగా మారింది. తన ఆర్థిక వ్యవస్థను మరింత విస్తరించుకోవాలని భావిస్తున్న అబుదాబీ, కూటమి ఆంక్షలు లేకుండా గ్లోబల్ మార్కెట్‌లో తన వాటాను పెంచుకోవాలని లక్ష్యంగా పెట్టుకుంది. ప్రాంతీయ ఉద్రిక్తతలు, ముఖ్యంగా ఇరాన్‌తో ఉన్న విభేదాలు యూఏఈ నిర్ణయాన్ని ప్రభావితం చేశాయి. ఇజ్రాయెల్‌తో సంబంధాలు మెరుగుపరుచుకున్న తరుణంలో ఒపెక్‌లో ఇరాన్ ప్రభావాన్ని యూఏఈ సహించలేకపోతోంది. ఇటీవలే రువైస్ రిఫైనరీ, ఫుజైరా పోర్టు వంటి కీలక ప్రాంతాలపై జరిగిన దాడులు భద్రతాపరమైన ఆందోళనలను పెంచాయి.

గ్లోబల్ మార్కెట్‌పై ప్రభావం.. "సెంట్రల్ బ్యాంక్" బలహీనపడుతుందా?

ప్రపంచ చమురు విపణిని నియంత్రించే "సెంట్రల్ బ్యాంక్" వంటి ఒపెక్ నుంచి మూడో అతిపెద్ద ఉత్పత్తిదారు బయటకు రావడం కూటమి ఉనికికే ముప్పుగా పరిణమించే అవకాశం ఉంది. యూఏఈ స్వతంత్రంగా ఉత్పత్తిని పెంచితే మార్కెట్లోకి అదనపు చమురు వస్తుంది. ఇది ప్రారంభంలో కొంత అస్థిరతకు దారితీసినప్పటికీ దీర్ఘకాలంలో అంతర్జాతీయ మార్కెట్‌లో ముడి చమురు ధరలు తగ్గేందుకు దోహదపడుతుంది. ఇతర దేశాలు కూడా యూఏఈ బాటలోనే నడిస్తే చమురు ధరలపై ఒపెక్ నియంత్రణ పూర్తిగా తగ్గిపోయే ప్రమాదం ఉంది.

భారత్‌కు లభించనున్న భారీ ప్రయోజనాలు

యూఏఈ నిర్ణయం వల్ల అత్యధికంగా లబ్ధి పొందే దేశాల్లో భారత్ ముందు వరుసలో ఉంది. దీనికి గల ప్రధాన కారణాలు ఇక్కడ ఉన్నాయి.. భారత్ తన చమురు అవసరాల్లో 85 శాతం దిగుమతుల ద్వారానే తీర్చుకుంటుంది. ప్రస్తుతం రోజుకు 58 లక్షల బ్యారెళ్లను వినియోగిస్తుండగా, అందులో 6.2 లక్షల బ్యారెళ్లు యూఏఈ నుంచే వస్తున్నాయి. యూఏఈ ఉత్పత్తి పెంచి ధరలు తగ్గిస్తే, భారత విదేశీ మారక ద్రవ్యం ఆదా అవ్వడమే కాకుండా దేశీయంగా పెట్రోల్, డీజిల్ ధరలు తగ్గుతాయి.

ప్రస్తుతం చమురు రవాణాకు అత్యంత కీలకమైన హర్మూజ్ జలసంధి వద్ద తరచూ ఉద్రిక్తతలు చోటుచేసుకుంటున్నాయి. అయితే యూఏఈ తన ఫుజైరా పోర్టు ద్వారా చమురు ఎగుమతులు పెంచితే ఈ జలసంధితో పనిలేకుండానే భారత్‌కు సరఫరా కొనసాగుతుంది. ఇది యుద్ధ సమయాల్లో కూడా చమురు సరఫరాకు ఆటంకం లేకుండా చేస్తుంది. యూఏఈ నిర్ణయం కేవలం ఒక దేశ నిష్క్రమణ మాత్రమే కాదు.. ఇది ప్రపంచ ఇంధన మ్యాప్‌లో కొత్త శకానికి ఆరంభం. ఇది వినియోగదారు దేశాలకు, ముఖ్యంగా భారత్ వంటి వేగంగా అభివృద్ధి చెందుతున్న ఆర్థిక వ్యవస్థలకు గొప్ప అవకాశం.

మొత్తానికి యూఏఈ తీసుకున్న ఈ సాహసోపేత నిర్ణయం గ్లోబల్ మార్కెట్లలో కొత్త సమీకరణాలకు దారి తీస్తోంది. చమురు రాజకీయాల్లో సౌదీ అరేబియా ఏకఛత్రాధిపత్యానికి ఇది చెక్ పెట్టడమే కాకుండా దిగుమతి దేశాలకు ఆర్థిక ఊరటనిచ్చే పరిణామంగా కనిపిస్తోంది.