మినాబ్ 168: విమానం నిండా పసిపిల్లల జ్ఞాపకాలు.. రక్తంతో తడిసిన బ్యాగుల సాక్షిగా ఇరాన్ శాంతి ప్రయాణం!

యుద్ధం అంటే కేవలం దేశాల మధ్య సరిహద్దు గొడవలు కాదు.. అది ఆరిపోని వేల కుటుంబాల కన్నీటి వ్యధ. ప్రస్తుతం ఇరాన్ ప్రతినిధులు అమెరికాతో శాంతి చర్చల కోసం ఇస్లామాబాద్‌కు బయల్దేరిన తీరు చూస్తుంటే.. ప్రపంచం ఒక్కసారిగా మూగబోయింది. రాజకీయ చర్చల కంటే మిన్నగా.. యుద్ధం మిగిల్చిన రక్తపు మరకలను అంతర్జాతీయ వేదికపై ప్రదర్శిస్తూ ఇరాన్ చేసిన ఈ ప్రయాణం ప్రతి ఒక్కరిని కన్నీరు పెట్టిస్తోంది.

ఖాళీ సీట్లు.. నిశ్శబ్ద రోదనలు..

సాధారణంగా ప్రతినిధులు ప్రయాణించే విమానాల్లో సందడి ఉంటుంది. కానీ ఈ విమానంలో మాత్రం భయంకరమైన నిశ్శబ్దం ఆవరించింది. విమానంలోని ప్రతి ఖాళీ సీటులో ఫిబ్రవరి 28న జరిగిన మిస్సైల్ దాడుల్లో అన్యాయంగా ప్రాణాలు కోల్పోయిన పసిపిల్లల ఛాయాచిత్రాలను ఉంచారు. ఆ సీట్లపై రక్తంతో తడిసిన స్కూల్ బ్యాగులు, చిన్నారి పాదరక్షలు, వాడిపోయిన పూలు నివాళిగా అర్పించారు. తమ పిల్లలు రేపు తిరిగి వస్తారని ఆశగా ఎదురుచూసిన తల్లిదండ్రుల ఆవేదన ఆ సీట్లలో ప్రతిబింబించింది.

ఈ ప్రత్యేక విమానానికి “మినాబ్ 168” అని నామకరణం చేయడం వెనుక ఒక విషాదకరమైన లెక్క ఉంది. ఆ భయంకరమైన దాడిలో అసువులు బాసిన చిన్నారుల సంఖ్యను ఇది ప్రపంచానికి గుర్తు చేస్తోంది. ఇరాన్ పార్లమెంట్ స్పీకర్ మొహమ్మద్ బాఘేర్ ఖలీబాఫ్ సోషల్ మీడియాలో ఈ దృశ్యాలను పంచుకుంటూ "విమానంలో నా సహచరులు, మినాబ్ 168" అని పేర్కొనడం, ఆ దేశం ఎంతటి వేదనను అనుభవిస్తోందో చాటిచెప్పింది.

మినాబ్ పాఠశాల.. ఆగిపోయిన పసిప్రాణాలు

గత ఫిబ్రవరి 28న ఇస్లామిక్ రివల్యూషనరీ గార్డ్ కార్ప్స్ (ఐఆర్.జీసీ) స్థావరాలను లక్ష్యంగా చేసుకుని అమెరికా ప్రయోగించిన తోమహక్ క్షిపణులు దారి తప్పి మినాబ్ ప్రాంతంలోని ఒక పాఠశాలపై పడ్డాయి. ఆ మారణహోమంలో సుమారు 160 మందికి పైగా చిన్నారులు.. తమ విధిని నిర్వర్తిస్తున్న 14 మంది ఉపాధ్యాయులు క్షణాల్లో ప్రాణాలు కోల్పోయారు. ఆటపాటలతో సందడిగా ఉండాల్సిన పాఠశాల ప్రాంగణం శ్మశానవాటికగా మారింది. ఈ ఘటన యుద్ధం ఎంతటి విచక్షణారహితమైనదో చెప్పడానికి నిలువెత్తు సాక్ష్యంగా నిలిచింది.

ఉత్కంఠ రేపుతున్న శాంతి చర్చలు

ఇజ్రాయెల్-లెబనాన్ మధ్య నెలకొన్న ఉద్రిక్తతలు.. అమెరికా హెచ్చరికల నేపథ్యంలో పాకిస్థాన్ వేదికగా జరగనున్న ఈ చర్చలపై ప్రపంచం దృష్టి సారించింది. ఇరాన్ ప్రతినిధుల భద్రత దృష్ట్యా.. శత్రువులను మభ్యపెట్టడానికి ఏకకాలంలో పలు డీకాయ్ విమానాలను గాల్లోకి పంపినట్లు సమాచారం. ఇరాన్ ప్రతినిధుల విమానానికి భద్రతగా పాకిస్థాన్ యుద్ధ విమానాలు వెన్నంటి ఉండటం ఈ చర్చల ప్రాముఖ్యతను తెలియజేస్తోంది. యుద్ధం విజేతలను నిర్ణయించదు.. కేవలం ఎవరు మిగిలారో మాత్రమే నిర్ణయిస్తుంది.

శాంతి చర్చల బల్ల దగ్గరకు వెళ్లేముందు ఇరాన్ తన దేశ చిన్నారుల రక్తపు గుర్తులను వెంట తీసుకెళ్లడం ఒక బలమైన సందేశం. రాజకీయ ప్రయోజనాల కోసం సాగే ఈ ఆధిపత్య పోరులో బలి అవుతున్నది నిరపరాధులైన సామాన్యులేనని ఈ ప్రయాణం గుర్తు చేస్తోంది. ఇస్లామాబాద్‌లో జరిగే ఈ చర్చలు కేవలం అధికారిక ఒప్పందాలతో ముగిసిపోతాయా? లేక మినాబ్ 168 లాంటి విషాదాలు పునరావృతం కాకుండా అడ్డుకుంటాయా? అనేది వేచి చూడాలి. ఏది ఏమైనా ఆ ఖాళీ సీట్లు.. ఆ రక్తపు సంచులు మానవత్వపు మనస్సాక్షిని నిలదీస్తూనే ఉంటాయి.