ఏఐ ఫీచర్లకు భారీ ధర..! యాపిల్ ఉత్పత్తులు కొనాలంటే ఇక జేబుకు చిల్లు తప్పదా?

టెక్నాలజీ దిగ్గజం యాపిల్ తన ప్రీమియం వ్యూహంతో వినియోగదారులపై మోపిన తాజా భారం మార్కెట్లో ప్రకంపనలు సృష్టిస్తోంది. ఆర్టిఫిషియల్ ఇంటెలిజెన్స్ (ఏఐ) యుగంలో అడుగుపెడుతున్న వేళ.. యాపిల్ ఉత్పత్తుల ధరలు ఒక్కసారిగా ఆకాశాన్నంటాయి.

ప్రపంచవ్యాప్తంగా ప్రీమియం టెక్నాలజీ బ్రాండ్‌గా గుర్తింపు పొందిన యాపిల్, తన గ్యాడ్జెట్ల ధరలను గణనీయంగా పెంచేసింది. ముఖ్యంగా మ్యాక్‌బుక్‌లు, ఐప్యాడ్‌ల ధరలు ఏకంగా రూ.25,000 నుండి లక్ష రూపాయల వరకు పెరగడం వినియోగదారులను విస్మయానికి గురిచేస్తోంది. అంతర్జాతీయంగా మెమరీ, స్టోరేజ్ చిప్‌ల సరఫరా వ్యయం పెరగడమే దీనికి ప్రధాన కారణమని కంపెనీ చెబుతున్నప్పటికీ.. దీని వెనుక ఒక బలమైన వ్యూహాత్మక కారణం ఉందని మార్కెట్ నిపుణులు విశ్లేషిస్తున్నారు.

ఏఐ యుగంలో ప్రీమియం డివైజ్‌లకే ప్రాధాన్యం

ప్రస్తుతం టెక్ ప్రపంచాన్ని శాసిస్తున్న ఆర్టిఫిషియల్ ఇంటెలిజెన్స్ (ఏఐ) ఫీచర్లపై కంపెనీలు భారీగా పెట్టుబడులు పెడుతున్నాయి. యాపిల్ సైతం తన సొంత O[ ఎకోసిస్టమ్‌ను మరింత బలోపేతం చేసే దిశగా అడుగులు వేస్తోంది. దీనికోసం అధిక ర్యామ్ , అత్యంత వేగవంతమైన స్టోరేజ్, శక్తివంతమైన ఎం-సిరీస్ చిప్‌లతో కూడిన డివైజ్‌లను మార్కెట్లోకి తీసుకొస్తోంది. ఈ అత్యాధునిక హార్డ్‌వేర్ ఖర్చులు పెరగడంతో పాటు, ఏఐ రీసెర్చ్ అండ్ డెవలప్‌మెంట్ కోసం పెట్టిన పెట్టుబడుల భారాన్ని కూడా కంపెనీ ఈ ధరల రూపంలో వినియోగదారులపైకి నెడుతోందని నిపుణులు అభిప్రాయపడుతున్నారు.

ఏ ఉత్పత్తి ధర ఎంత పెరిగింది?

తాజా మార్పుల ప్రకారం యాపిల్ ప్రధాన ఉత్పత్తుల ధరల వివరాలు ఇలా ఉన్నాయి. మ్యాక్‌బుక్ ఎయిర్ ధర రూ.30,000 పెరిగి రూ.1,49,900కు చేరింది. మ్యాక్‌బుక్ ప్రో (ఎం5, 16జీబీ ర్యామ్) ఏకంగా రూ.70,000 పెరిగి రూ.2,39,900 అయింది. ఐప్యాడ్ ఎయిర్ (ఎం4) ధర రూ.25,000 పెరిగి రూ.89,900కు చేరుకుంది. కొన్ని హై-ఎండ్ కాన్ఫిగరేషన్‌లలో ధరల పెరుగుదల దాదాపు రూ.1 లక్ష వరకు ఉండటం గమనార్హం.

విద్యార్థులు, క్రియేటర్లపై తీవ్ర ప్రభావం

యాపిల్ మ్యాక్‌బుక్‌లు, ఐప్యాడ్‌లను కేవలం విలాసవంతమైన వస్తువులుగా కాకుండా.. విద్యార్థులు, వీడియో ఎడిటర్లు, గ్రాఫిక్ డిజైనర్లు, సాఫ్ట్‌వేర్ డెవలపర్లు తమ వృత్తిపరమైన అవసరాల కోసం ఎక్కువగా కొనుగోలు చేస్తుంటారు. తాజా ధరల పెరుగుదల ఈ వర్గాలపై మోయలేని ఆర్థిక భారంగా మారనుంది. ముఖ్యంగా మధ్యతరగతి విద్యార్థులు, ఫ్రీలాన్సర్లు ఇకపై విద్యా రుణాలు లేదా నో-కాస్ట్ ఈఎంఐ ఆప్షన్లపై ఎక్కువగా ఆధారపడాల్సిన పరిస్థితి ఏర్పడుతోంది.

ఇక ఐఫోన్ల వంతా?

మ్యాక్‌బుక్‌లు, ఐప్యాడ్‌ల రేట్లు చూస్తుంటే త్వరలోనే రాబోయే కొత్త ఐఫోన్ల ధరలు కూడా ఇదే రీతిలో షాక్ ఇవ్వబోతున్నాయని టెక్ విశ్లేషకులు అంచనా వేస్తున్నారు. సరికొత్త హార్డ్‌వేర్ మార్పులు, ఇన్-బిల్ట్ ఏఐ ఫీచర్లు, పెరుగుతున్న ఉత్పత్తి వ్యయాల కారణంగా రాబోయే ఐఫోన్ మోడళ్ల ధరలు గతంలో కంటే చాలా భారీగా ఉండే అవకాశం ఉంది.

యాపిల్ అందించే ప్రీమియం టెక్నాలజీ, బ్రాండ్ విలువను సొంతం చేసుకోవాలంటే వినియోగదారులు ఇకపై తమ జేబులకు భారీగా చిల్లు పెట్టుకోవాల్సిందే. ఏఐ యుగంలో అత్యుత్తమ ఫీచర్లు అందించాలనే యాపిల్ ఆశయం ఎంత వేగంగా దూసుకుపోతుందో.. సామాన్యుడికి ఈ ఉత్పత్తులు అంతగా దూరమవుతున్నాయనే విమర్శలు మార్కెట్లో వ్యక్తమవుతున్నాయి.