కేటీఆర్ మీద అమెరికాలో కేస్ అయ్యే ఛాన్స్ ఉందా?

ఎరక్క పోయి కేటీఆర్ ఇరుకున్నారా? అమెరికాకు వచ్చి భారీ ర్యాలీలు చేయడం.. అదే తెలంగాణలో చేసినట్టు రెచ్చగొట్టే ప్రసంగాలు చేయడం.. ఇప్పుడు ఆయన పాలిట శాపంగా మారుతోందా? అంటే పరిణామాల అలానే అనిపిస్తున్నాయి. కేటీఆర్ ర్యాలీ, ఆయన చేసిన ప్రసంగం ఇప్పుడు అమెరికాలో చర్చనీయాంశమైంది. కేటీఆర్ మీద కేసు నమోదయ్యే అవకాశాలు కనిపిస్తున్నాయన్న అనుమానాలు వ్యక్తమవుతున్నాయి.

తెలంగాణ రాష్ట్ర ఏర్పాటు దినోత్సవ వేడుకలను అమెరికాలోని డల్లాస్‌లో ఘనంగా నిర్వహించారు. ఈ వేడుకల్లో పాల్గొన్న తెలంగాణ రాష్ట్ర ఐటీ, పురపాలక శాఖల మంత్రి కేటీఆర్ చేసిన కొన్ని వ్యాఖ్యలు ఇప్పుడు తీవ్ర చర్చనీయాంశంగా మారాయి. ట్రంప్ పరిపాలనలో వలస విధానాలపై కఠినంగా వ్యవహరిస్తున్న ప్రస్తుత పరిస్థితుల్లో, కేటీఆర్ వ్యాఖ్యలు ఆయనకు ఇబ్బందులు సృష్టిస్తాయా అనే సందేహాలు వ్యక్తమవుతున్నాయి.

-ట్రంప్ పరిపాలనలో కఠినమైన వలస విధానాలు:

ట్రంప్ ప్రభుత్వం అధికారంలోకి వచ్చినప్పటి నుండి అమెరికా వలస విధానాలు అనూహ్యంగా మారాయి. చిన్న చిన్న పొరపాట్లకు కూడా డిపోర్టేషన్లు జరుగుతున్నాయి. విద్యార్థులకు పార్కింగ్ టికెట్లపై కూడా నోటీసులు వస్తున్నాయని, నాన్-ఇమ్మిగ్రెంట్ స్టేటస్‌లో ఉన్నవారికి ట్రంప్ ప్రభుత్వం చుక్కలు చూపిస్తోందని పెద్ద ఎత్తున విమర్శలున్నాయి. యాంటీ-ఇమ్మిగ్రేషన్ పాలసీలను ట్రంప్ పెద్ద ఎత్తున అమలు చేస్తున్నారు. హెచ్1బీ వీసాల విషయంలో కూడా ఫిర్యాదుల సంఖ్య పెరిగి, అప్రూవల్స్ సులువుగా రావట్లేదని నివేదికలు చెబుతున్నాయి. ఇటువంటి కఠినమైన పరిస్థితుల్లో, కేటీఆర్ చేసిన వ్యాఖ్యలు ఎలాంటి ప్రభావం చూపుతాయో అనే ఆందోళన వ్యక్తమవుతోంది.

- కేటీఆర్ వ్యాఖ్యలు - వివాదం:

డల్లాస్‌లో జరిగిన తెలంగాణ ఆవిర్భావ దినోత్సవ సభలో కేటీఆర్ మాట్లాడుతూ.. తెలుగు రాష్ట్రాలు రెండు కాదని, మరో రాష్ట్రం డల్లాస్‌పురం అని అన్నారు. అంతేకాకుండా డల్లాస్ దగ్గరలో ఉన్న గుంటర్ అనే ప్రాంతాన్ని గుంటూరు అయిందని కూడా ఆయన పేర్కొన్నారు. ఈ వ్యాఖ్యలు అమెరికా సార్వభౌమత్వాన్ని దెబ్బతీసే విధంగా ఉన్నాయని పలువురు విశ్లేషకులు అభిప్రాయపడుతున్నారు. అమెరికాలో చదువుకుని, ఉద్యోగం చేసిన కేటీఆర్ కు అక్కడి నిబంధనలు, కఠినమైన వలస చట్టాలు తెలియవా అని సాధారణ ప్రజలు సైతం ప్రశ్నిస్తున్నారు. "జనాల ఉపులో ఏది పడితే అది మాట్లాడితే ఎలా?" అని కొందరు ప్రశ్నిస్తున్నారు.

-న్యాయ నిపుణుల అభిప్రాయాలు:

ఈ వ్యాఖ్యలపై న్యాయ నిపుణులు సైతం స్పందిస్తున్నారు. "అమెరికా ప్రజలు ఇలాంటి వ్యాఖ్యలకు ఎలా స్పందిస్తారు? మా దేశంలో మరో సందర్శకుడు వచ్చి మరో రాష్ట్రం అయిందని చెబితే ఎలా ఉంటుంది?" అని వారు ప్రశ్నిస్తున్నారు. న్యాయ నిపుణుల ప్రకారం, అమెరికా ప్రభుత్వం తలుచుకుంటే కేటీఆర్ వీసా రద్దయ్యే అవకాశం కూడా ఉందని చెబుతున్నారు. ఎవరో చెప్పారని ఇలాంటి అమెరికా వ్యతిరేక వ్యాఖ్యలు చేయడం సరికాదని వారు అభిప్రాయపడుతున్నారు. అంతేకాకుండా ఆ ర్యాలీలో పాల్గొన్న చాలా మంది మీద కూడా కేసులు పెట్టే అవకాశం ఉందని నిపుణులు పేర్కొంటున్నారు.

మొత్తంమీద కేటీఆర్ మీద అమెరికాలో కేసు నమోదైతే అది పెద్ద సంచలనం అవుతుందని, ఆయన వీసా కూడా రద్దయ్యే అవకాశం ఉందని న్యాయ నిపుణులు హెచ్చరిస్తున్నారు. ఇలాంటి సున్నితమైన విషయాలపై వ్యాఖ్యలు చేసేటప్పుడు జాగ్రత్తగా ఉండాలని, లేకపోతే అది తీవ్ర పరిణామాలకు దారితీయవచ్చని వారు సూచిస్తున్నారు. ట్రంప్ ప్రభుత్వ వలస విధానాలు కఠినంగా ఉన్న నేపథ్యంలో ఈ వ్యాఖ్యలు కేటీఆర్ కు నిజంగానే చిక్కులు తెచ్చిపెడతాయా అనేది చూడాలి.