ట్రంప్, బైడెన్‌లను లేపేద్దామనుకున్నాడు.. పాక్ వ్యాపారి కథలో మలుపులెన్నో!

అంతర్జాతీయ రాజకీయాల్లో గూఢచర్యం, ప్రతీకారం, గ్లోబల్ శక్తుల పోటీ... ఇవి కొత్త విషయాలు కావు. కానీ ఒక పాకిస్థాన్ వ్యాపారి పేరు అమెరికా అధ్యక్షుల హత్య కుట్ర కేసులో వినిపించడం మాత్రం ప్రపంచవ్యాప్తంగా చర్చనీయాంశమైంది. ఇరాన్ టాప్ కమాండర్ ఖాసీం సులేమాని హత్యకు ప్రతీకారంగా అమెరికా కీలక రాజకీయ నేతలను లక్ష్యంగా చేసుకున్న కుట్రలో పాకిస్థాన్ వ్యాపారి ఆసిఫ్ మర్చంట్ కీలక పాత్ర పోషించాడని అమెరికా న్యాయస్థానం తేల్చింది. ఈ కేసు వెనుక ఉన్న రాజకీయాలు, గూఢచర్యం, అంతర్జాతీయ ఉద్రిక్తతలు ఇప్పుడు ప్రపంచ దృష్టిని ఆకర్షిస్తున్నాయి.

సులేమాని హత్యతో మొదలైన ప్రతీకారం

2020లో అమెరికా డ్రోన్ దాడిలో ఇరాన్‌కు చెందిన ప్రముఖ సైనిక అధికారి ఖాసీం సులేమాని హతమయ్యాడు. అప్పటి అమెరికా అధ్యక్షుడు డొనాల్డ్ ట్రంప్ ఆ ఆపరేషన్‌కు ఆదేశాలు ఇచ్చినట్లు వెల్లడైంది. దీంతో ఇరాన్–అమెరికా మధ్య ఉద్రిక్తతలు తీవ్ర స్థాయికి చేరాయి. సులేమాని మరణానికి ప్రతీకారం తీర్చుకుంటామని ఇరాన్ నేతలు అప్పుడే ప్రకటించారు. ఆ ప్రకటనలే ఇప్పుడు ఈ హత్య కుట్ర కేసుకు నేపథ్యంగా మారాయి.

కుట్రలో పాక్ వ్యాపారి

ఈ కేసులో ప్రధాన నిందితుడిగా నిలిచింది పాకిస్థాన్ వ్యాపారి ఆసిఫ్ మర్చంట్. అమెరికా దర్యాప్తు సంస్థల ప్రకారం అతడికి ఇరాన్‌తో సంబంధాలున్నాయి. ముఖ్యంగా ఇరాన్‌కు చెందిన ఇస్లామిక్ రెవెల్యూషనరీ గార్డ్ కార్ప్స్ (ఐఆర్.జీసీ ) వద్ద శిక్షణ పొందినట్లు విచారణలో తేలింది.

2024లో అమెరికాకు వచ్చిన ఆసిఫ్, ప్రముఖ రాజకీయ నేతల హత్య కోసం కిరాయి హంతకులను ఏర్పాటు చేయాలని ప్రయత్నించాడు. అయితే అతడు సంప్రదించిన వ్యక్తి అసలు హంతకుడు కాకుండా అండర్‌కవర్‌లో పనిచేస్తున్న అమెరికా అధికారి కావడం కేసులో కీలక మలుపుగా మారింది.

లక్ష్యంగా ట్రంప్, బైడెన్, హేలీ

విచారణలో ఆసిఫ్ చేసిన వ్యాఖ్యలు అమెరికా రాజకీయ వర్గాలను కుదిపేశాయి. అమెరికా మాజీ అధ్యక్షుడు జోబిడెన్, అధ్యక్షుడు ట్రంప్, అలాగే రిపబ్లికన్ నేత నిక్కి హేలీ వంటి ప్రముఖులు ఈ కుట్రలో లక్ష్యంగా ఉన్నారని అతడు చెప్పినట్లు కోర్టు వెల్లడించింది. అయితే అసలు టార్గెట్ ఎవరో తనకు పూర్తిగా తెలియదని కూడా అతడు పేర్కొన్నాడు. ఈ ప్రణాళిక వెనుక ఉన్న అసలు ఆదేశాలు ఇరాన్ నుంచి వచ్చాయని అమెరికా అధికారులు అనుమానిస్తున్నారు.

అరెస్ట్‌కు దారితీసిన గూఢచర్యం

అమెరికా నిఘా సంస్థలు ఆసిఫ్ కదలికలను కొంతకాలంగా గమనిస్తున్నాయి. 2024 అధ్యక్ష ఎన్నికల సమయంలో పెన్సిల్వేనియాలో ట్రంప్‌పై జరిగిన హత్యాయత్నానికి ఒకరోజు ముందు అండర్‌కవర్ అధికారి ఇచ్చిన సమాచారంతో పోలీసులు ఆసిఫ్‌ను అరెస్టు చేశారు. పాకిస్థాన్‌కు పారిపోవడానికి విమానం ఎక్కడానికి సిద్ధమవుతుండగా అతడిని అదుపులోకి తీసుకున్నారు. తరువాత విచారణలో అతడి కుట్ర వివరాలు బయటపడ్డాయి.

ఇరాన్ ఖండన

ఈ ఆరోపణలపై ఇరాన్ మాత్రం స్పష్టంగా ఖండన తెలిపింది. తమకు ఈ కుట్రతో ఎలాంటి సంబంధం లేదని అధికారికంగా ప్రకటించింది. అయినప్పటికీ అమెరికా న్యాయస్థానం ఆసిఫ్‌పై ఉన్న ఆరోపణలు బలంగా ఉన్నాయని పేర్కొంటూ అతడిని దోషిగా తేల్చింది. ఈ కేసులో అతడికి జీవిత ఖైదు పడే అవకాశం ఉందని తెలుస్తోంది.

అంతర్జాతీయ రాజకీయాల్లో కొత్త ఉద్రిక్తత?

ఈ కేసు ఒక వ్యక్తి కథగా కనిపించినా దీని వెనుక పెద్ద జియోపాలిటికల్ కథ ఉందని నిపుణులు చెబుతున్నారు. సులేమాని హత్య తర్వాత ఇరాన్–అమెరికా మధ్య పెరిగిన ఉద్రిక్తతలు ఇంకా తగ్గలేదనే సంకేతాలు ఇది ఇస్తోంది. అంతేకాదు, అమెరికా ఎన్నికల సమయంలో విదేశీ శక్తులు జోక్యం చేసుకునే ప్రమాదం ఎంత ఉందో కూడా ఈ ఘటన మరోసారి గుర్తుచేసింది.

ఒక వ్యాపారి కథగా మొదలైన ఈ ఘటన… ఇప్పుడు అంతర్జాతీయ రాజకీయాల్లో పెద్ద చర్చగా మారింది.