మొత్తానికి మేలుకున్న కెనడా: 41 ఏళ్ల తర్వాత ఎయిరిండియా పేలుడు వెనుక ‘ఖలిస్థానీ’ హస్తం ఉందంటూ అంగీకారం

ఎట్టకేలకు కెనడా ప్రభుత్వానికి జ్ఞానోదయం అయింది. కాలచక్రం అలా తిరిగి తిరిగి.. 41 ఏళ్లు దాటిన తర్వాత గానీ వారికి ఒక ‘పరమ సత్యం’ బోధపడలేదు. 1985లో ప్రపంచాన్ని వణికించిన ఎయిరిండియా ఫ్లైట్ 182 (కనిష్క) పేలుడు ఘోరకలి వెనుక ఉన్నది మరెవరో కాదు, సాక్షాత్తూ ‘ఖలిస్థానీ ఉగ్రవాదులే’ అని కెనడా ఎట్టకేలకు అధికారికంగా అంగీకరించింది. 329 మంది అమాయకులను పొట్టనబెట్టుకున్న ఈ ఘోర ఉగ్రదాడికి ఖలిస్థానీ తీవ్రవాద సంస్థలే బాధ్యులని, వారు కెనడా భూభాగాన్ని తమ విధ్వంసకర లీలావినోదాలకు వేదికగా వాడుకున్నారని కెనడా ప్రభుత్వం ఒక అధికారిక ప్రకటనలో ముక్తసరిగా ఒప్పుకుంది.

పాపం భారత్ దశాబ్దాలుగా మొత్తుకుంటూనే ఉంది.. “అయ్యా కెనడా బాబూ! మీ దేశంలో ఖలిస్థానీ ఉగ్రవాదులు హాయిగా ఆశ్రయం పొందుతున్నారు. అక్కడి నుంచే భారత్‌కు వ్యతిరేకంగా స్కెచ్‌లు వేస్తున్నారు, కాస్త చూసుకోండి” అని. కానీ గతంలో కెనడా పాలకులు మాత్రం.. “అయ్యో, వాళ్లా? వాళ్లు కేవలం శాంతియుత నిరసనకారులు, మా దేశంలో అందరికీ భావప్రకటన స్వేచ్ఛ ఉంది” అంటూ చేతులు నలుపుకున్నారు. ఇన్నాళ్లకు, ఓ 41 ఏళ్ల సుదీర్ఘ ‘పరిశోధన’ తర్వాత గానీ వారికి అసలు విషయం అర్థం కాలేదన్నమాట!

చరిత్రలోనే అత్యంత ఘోరమైన దాడి.. కానీ గుర్తించడానికి నాలుగు దశాబ్దాలు

ఒక్కసారి ఫ్లాష్‌బ్యాక్‌లోకి వెళ్తే.. 1985 జూన్ 23న మాంట్రియల్ నుంచి ముంబైకి బయలుదేరిన ఎయిరిండియా ఫ్లైట్ 182, అట్లాంటిక్ మహాసముద్రంపై ప్రయాణిస్తున్న సమయంలో బాంబు పేలుడుతో గాల్లోనే ముక్కలైంది. విమానంలో ఉన్న 329 మంది ప్రయాణికులు, సిబ్బంది జలసమాధి అయ్యారు. విచిత్రం ఏంటంటే.. చనిపోయిన వారిలో అత్యధిక శాతం మంది కెనడా పౌరులే. ఇది కెనడా చరిత్రలోనే అత్యంత ఘోరమైన ఉగ్రదాడి. అయినా సరే ఓటు బ్యాంకు రాజకీయాలు, అంతర్గత సమీకరణాల వల్ల కావచ్చు.. ఉగ్రవాదులను ఉగ్రవాదులు అని పిలవడానికి కెనడాకు ఇంత కాలం పట్టింది. “ఆలస్యంగానైనా నిజం ఒప్పుకున్నారు, సంతోషం. కానీ ఈ 41 ఏళ్లలో ఆ ఉగ్రవాద ముఠాలు కెనడాలో ఎంతగా వేళ్లు ఊనుకున్నాయో గమనించారా?” అంటూ ఇప్పుడు సోషల్ మీడియాలో నెటిజన్లు గట్టిగానే కౌంటర్లు వేస్తున్నారు.

ఇరు దేశాల సంబంధాల ‘ఉద్రిక్తత’ తెచ్చిన మార్పు?

ఇటీవలి కాలంలో భారత్-కెనడా మధ్య సంబంధాలు ఎంత ‘హాట్ హాట్’గా సాగుతున్నాయో అందరికీ తెలిసిందే. ఖలిస్థానీ అంశంపై భారత్ గట్టిగా నిలదీయడం, దౌత్యపరమైన ఒత్తిడి పెంచడంతో కెనడాకు రూటు మార్చక తప్పలేదు. బహుశా అందుకే.. “మేం ఉగ్రవాదాన్ని ఏ రూపంలోనూ సహించం, మా భూభాగాన్ని హింసకు వాడుకోనివ్వం” అంటూ ఇప్పుడు లెక్చర్లు ఇస్తోంది.

భద్రతా నిపుణుల అభిప్రాయం ప్రకారం..

భారత్ ఇన్నాళ్లుగా చెప్తున్న ఆరోపణలు వంద శాతం నిజమని కెనడా అంగీకారంతో తేలిపోయింది. ఇకనైనా ఇరు దేశాల మధ్య ఉగ్రవాద నిర్మూలనకు సరైన సహకారం అందుతుందని ఆశించవచ్చు. కెనడా వీధుల్లో స్వేచ్ఛగా తిరుగుతున్న ఖలిస్థానీ ముఠాలపై ఇకనైనా అక్కడి ప్రభుత్వం కఠిన చర్యలు తీసుకుంటుందో లేదో చూడాలి.

ఇకనైనా యాక్షన్ ఉంటుందా.. అంతా పేపర్లకే పరిమితమా?

అధికారికంగా తప్పు ఒప్పుకోవడం ఒక ఎత్తైతే, క్షేత్రస్థాయిలో చర్యలు తీసుకోవడం ఇంకో ఎత్తు. ఇప్పటికైనా కెనడా ప్రభుత్వం కేవలం ప్రకటనలతో సరిపెట్టకుండా, తమ దేశంలో ఆశ్రయం పొందుతున్న తీవ్రవాద ముఠాల ఆటకట్టించడానికి గట్టి చర్యలు తీసుకుంటే మంచిది. లేదంటే ఈ ‘అంగీకారాలు’ కేవలం రికార్డు పుస్తకాల్లో పేజీలను నింపడానికి మాత్రమే పనికొస్తాయి. చూద్దాం 41 ఏళ్ల తర్వాత మేల్కొన్న కెనడా.. ఇకనైనా స్పీడు పెంచుతుందో లేదో!