ప్రకృతి విలయతాండవం.. మళ్లీ ల్యాండ్‌స్లైడ్.. దూసుకొచ్చిన మృత్యువు

కేరళలోని పర్యాటక ప్రాంతం వయనాడ్ జిల్లాలో మరోసారి ప్రకృతి విలయతాండవం సృష్టించింది. గత రాత్రి నుంచి ఎడతెరిపి లేకుండా కురుస్తున్న భారీ వర్షాల కారణంగా మంగళవారం ఉదయం అనక్కంపొయిల్–కల్లాడి సొరంగం నిర్మాణ ప్రాంతంలో భారీ కొండచరియలు విరిగిపడ్డాయి. కల్లాడిలోని మీనాక్షి వంతెన సమీపంలో చోటుచేసుకున్న ఈ ఘోర ప్రమాదంలో ఇద్దరు కార్మికులు మృతి చెందినట్లు అధికారులు ధృవీకరించారు. శిథిలాల కింద మరో 30 మంది వరకు చిక్కుకున్నట్లు సమాచారం రావడంతో సహాయక బృందాలు యుద్ధ ప్రాతిపదికన రక్షణ చర్యలు చేపట్టాయి.

యుద్ధప్రాతిపదికన సహాయక చర్యలు

ప్రమాదం జరిగిన వెంటనే స్థానికులు, అగ్నిమాపక సిబ్బంది, పోలీసులు ఘటనాస్థలికి చేరుకుని సహాయక చర్యలు ప్రారంభించారు. అనంతరం ఎన్డీఆర్ఎఫ్ బృందాలు రంగంలోకి దిగాయి. శిథిలాల కింద చిక్కుకున్న పలువురు కార్మికులను రక్షించి, సురక్షితంగా బయటకు తీసి సమీప ఆసుపత్రులకు తరలించారు. అయితే ఎడతెరిపి లేకుండా కురుస్తున్న భారీ వర్షం, ప్రమాద స్థలంలో పేరుకుపోయిన బురద, కొండ ప్రాంతంలోని క్లిష్ట పరిస్థితులు సహాయక చర్యలకు తీవ్ర ఆటంకంగా మారుతున్నాయి. ఇంకా పలువురు అదృశ్యంగా ఉన్నట్లు అధికారులు పేర్కొంటున్నారు.

హై అలర్ట్ ప్రకటించిన యంత్రాంగం

ప్రమాదం సంభవించిన ప్రాంతానికి సమీపంలో దాదాపు 100 మంది నివసిస్తున్నట్లు అధికారులు గుర్తించారు. మరిన్ని కొండచరియలు విరిగిపడే ప్రమాదం పొంచి ఉండటంతో వారందరినీ అప్రమత్తం చేసి తక్షణమే సురక్షిత ప్రాంతాలకు తరలించారు. జిల్లా యంత్రాంగం పరిస్థితిని నిరంతరం పర్యవేక్షిస్తోంది. ప్రజలు అత్యవసరమైతే తప్ప ఇళ్ల నుంచి బయటకు రావద్దని, ముఖ్యంగా నదులు, వాగులు, కొండ ప్రాంతాలకు వెళ్లకుండా జాగ్రత్తలు తీసుకోవాలని స్పష్టం చేశారు.

ఈ ప్రమాదం కారణంగా మలప్పురం–వయనాడ్ ప్రధాన రహదారిపై రాకపోకలు పూర్తిగా నిలిచిపోయాయి. రహదారిపై భారీ రాళ్లు, మట్టి పేరుకుపోవడంతో వాహనాలు ఎక్కడికక్కడే ఆగిపోయాయి. మరోవైపు మీనాక్షి వంతెన వద్ద నది ప్రమాదకర స్థాయిలో ఉప్పొంగి ప్రవహిస్తుండటంతో అధికారులు ఆ ప్రాంతంలో హై అలర్ట్ ప్రకటించారు.

ముఖ్యమంత్రి అత్యవసర సమీక్ష

ఘటనపై సమాచారం అందుకున్న వెంటనే రాష్ట్ర ముఖ్యమంత్రి వీడీ సతీశన్ అత్యవసర సమావేశం నిర్వహించారు. సహాయక చర్యలను వేగవంతం చేయాలని, శిథిలాల కింద చిక్కుకున్న ప్రతి ఒక్కరిని వీలైనంత త్వరగా రక్షించాలని సంబంధిత అధికారులకు స్పష్టమైన ఆదేశాలు జారీ చేశారు. ముఖ్యమంత్రి ఆదేశాల మేరకు రాష్ట్ర మంత్రులు అనిల్ కుమార్, సిద్దిఖీ వెంటనే వయనాడ్‌కు బయల్దేరి పరిస్థితిని ప్రత్యక్షంగా పరిశీలిస్తున్నారు.

మళ్లీ గుర్తొచ్చిన 2024 నాటి చేదు జ్ఞాపకాలు

వయనాడ్‌లో కొండచరియలు విరిగిపడటం ఇదే మొదటిసారి కాదు. గతంలో 2024లో ముండక్కై, చూర్‌మాలా ప్రాంతాల్లో సంభవించిన భారీ కొండచరియల విపత్తు దేశవ్యాప్తంగా కలకలం రేపింది. ఆ దుర్ఘటనలో వందలాది ఇళ్లు నేలమట్టం కాగా, అధికారిక లెక్కల ప్రకారం 298 మంది ప్రాణాలు కోల్పోయారు. ఆ చేదు జ్ఞాపకాలు, విషాదం నుంచి స్థానికులు ఇంకా పూర్తిగా కోలుకోకముందే.. మరోసారి ఇదే జిల్లాలో ఇలాంటి ప్రమాదం చోటుచేసుకోవడం స్థానిక ప్రజలను తీవ్ర భయాందోళనలకు గురిచేస్తోంది.

ప్రస్తుతం భారీ వర్షాలు కొనసాగుతున్న నేపథ్యంలో కేరళ ప్రభుత్వం తీవ్ర అప్రమత్తత ప్రకటించింది. సహాయక చర్యలు ముమ్మరంగా సాగుతుండగా, శిథిలాల కింద ఉన్నవారిని క్షేమంగా బయటకు తీసుకురావడమే ప్రస్తుతం తమ మొదటి ప్రాధాన్యతని రెస్క్యూ టీమ్స్ వెల్లడించాయి.