బీఆర్ఎస్ 'రిలోడెడ్'.. 27న కేసీఆర్ కొత్త టీమ్ ప్రకటన.. సీనియర్లు + యువత + మహిళలు.. ఇదేనా సక్సెస్ ఫార్ములా?

జగిత్యాల గర్జనతో గులాబీ శ్రేణుల్లో కొత్త ఉత్సాహం నింపిన కేసీఆర్ ఇప్పుడు పార్టీని సమూలంగా ప్రక్షాళన చేసే పనిలో పడ్డారు. ఏప్రిల్ 27న పార్టీ ఆవిర్భావ దినోత్సవం సందర్భంగా రాబోయే ఈ ‘బీఆర్ఎస్ 2.0’ ప్లాన్ రాజకీయంగా చాలా ప్రాధాన్యత సంతరించుకుంది. పాత తరం అనుభవం, కొత్త తరం వేగాన్ని కలగలిపి కేసీఆర్ రూపొందిస్తున్న ఈ కొత్త టీమ్ వ్యూహం ఏంటి..? ఎలా ఉండబోతోంది చూద్దాం.. తెలంగాణ రాజకీయాల్లో మరోసారి తన మార్క్ చాటుకోవడానికి కేసీఆర్ సిద్ధం అయ్యారు. జగిత్యాల బహిరంగ సభకు వచ్చిన అశేష జనవాహిని చూశాక, పార్టీ క్యాడర్‌లో భరోసా నింపాలంటే సంస్థాగత మార్పులు తప్పనిసరని గుర్తించారు. ఏప్రిల్ 27న బీఆర్ఎస్ ఆవిర్భావ దినోత్సవం నాటికి పార్టీకి కొత్త రూపునిచ్చే దిశగా అడుగులు వేస్తున్నారు. కేవలం పైస్థాయిలోనే కాకుండా, గ్రామం నుంచి రాష్ట్ర స్థాయి వరకు పార్టీ యంత్రాంగాన్ని యుద్ధ ప్రాతిపదికన సిద్ధం చేయడమే ఈ ‘కొత్త టీమ్’ ప్రధాన ఉద్దేశ్యం.

అనుభవం వర్సెస్ ఉత్సాహం!

కేసీఆర్ ఈసారి కమిటీల ఏర్పాటులో ఒక పక్కా బ్యాలెన్స్‌ను పాటించబోతున్నారు. పార్టీ కోసం మొదటి నుంచి పనిచేసిన సీనియర్ నేతలను కేవలం సలహాదారులకే పరిమితం చేయకుండా, వారికి జిల్లాల వారీగా కీలక బాధ్యతలు అప్పగించనున్నారు. జీవన్ రెడ్డి వంటి నేతల చేరికతో సీనియర్ల విభాగాన్ని మరింత బలోపేతం చేస్తున్నారు. సోషల్ మీడియాలో యాక్టివ్‌గా ఉంటూ, ప్రభుత్వ వ్యతిరేకతను ప్రజల్లోకి తీసుకెళ్లగల యువ నేతలకు, మహిళా నాయకులకు ఈసారి కమిటీల్లో 33 శాతం నుంచి 50 శాతం వరకు చోటు కల్పించబోతున్నట్లు సమాచారం.

కేటీఆర్, హరీష్ రావుకు ‘డ్యూయల్’ రోల్!

పార్టీలో రామలక్ష్మణుల్లా భావించే కేటీఆర్, హరీష్ రావుకు ఈసారి మరింత స్పష్టమైన బాధ్యతలు ఉండబోతున్నాయి. నగర ప్రాంతాల్లో పట్టు పెంచుకోవడం, సోషల్ మీడియా వ్యూహాలు, ఐటీ/పట్టణ ఓటర్లను ఆకర్షించే బాధ్యతలను కేటీఆర్ పర్యవేక్షించనున్నారు. గ్రామీణ ప్రాంతాల్లో పార్టీ కేడర్‌ను సమన్వయం చేయడం, క్షేత్రస్థాయిలో ప్రభుత్వ వైఫల్యాలపై పోరాటాలను నడిపించడం, రైతు విభాగాలను బలోపేతం చేయడం హరీష్ రావుకు అప్పగించనున్నట్లు తెలుస్తోంది.

సభ్యత్వ నమోదు కమిటీల విధివిధానాలు

మేలో భారీ స్థాయిలో సభ్యత్వ నమోదు కార్యక్రమం చేపట్టాలని కేసీఆర్ నిర్ణయించారు. ఈసారి సభ్యత్వ నమోదును పూర్తిగా డిజిటలైజ్ చేసి, ప్రతి కార్యకర్త డేటాను అధిష్టానం వద్ద ఉంచుకోనుంది. మేలో సభ్యత్వం పూర్తయ్యాక, జూన్ నాటికి గ్రామ కమిటీల నుంచి రాష్ట్ర కమిటీ వరకు వరుసగా నియామకాలు జరగనున్నాయి. దీనివల్ల కింది స్థాయి కార్యకర్తలకు తాము పార్టీలో గుర్తింపు పొందుతున్నామనే భావన కలుగుతుంది.

ఆవిర్భావ దినోత్సవం..

ఏప్రిల్ 27న పార్టీ ఆవిర్భావ దినోత్సవం సందర్భంగా కేసీఆర్ కొన్ని సంచలన నిర్ణయాలు ప్రకటించే అవకాశం ఉంది. ప్రభుత్వంపై నిఘా పెట్టేందుకు, ప్రతి శాఖలోని వైఫల్యాలను ఎండగట్టేందుకు 'షాడో కేబినెట్' తరహాలో నిపుణుల కమిటీలను వేయవచ్చు. తెలంగాణ అస్తిత్వంతో పాటు, జాతీయ స్థాయిలో బీఆర్ఎస్ పాత్రపై మరింత స్పష్టత ఇచ్చే అవకాశం ఉంది.

జగిత్యాల సభ కేసీఆర్ కు 'బూస్టర్ డోస్' లా పనిచేసింది. హైకోర్టులో కాళేశ్వరం కేసులో లభించిన ఊరట కూడా ఆయనకు మరింత బలాన్నిచ్చింది. ఇప్పుడు ఈ కొత్త టీమ్ ద్వారా పార్టీని మళ్లీ గ్రామ స్థాయిలోకి తీసుకెళ్లగలిగితే, రాబోయే స్థానిక సంస్థల ఎన్నికల్లో బీఆర్ఎస్ సత్తా చాటే అవకాశం ఉంది. ‘కారు’ ఇంజిన్‌ను మళ్లీ రిపేర్ చేసి, కొత్త టైర్లు వేసి రోడ్డు మీదకు తీసుకురావడానికి కేసీఆర్ చేస్తున్న ఈ ప్రయత్నం ఎంతవరకు ఫలిస్తుందో వేచి చూడాలి.