సిద్దాంత పరంగానే కేసీఆర్ తో యుద్ధం.. తండ్రి స్థానంపై సంచలన వ్యాఖ్యలు..
ఒకే కుటుంబానికి చెందిన ఇద్దరు రాజకీయ దిగ్గజాల మధ్య సిద్ధాంతపరమైన విభేదాలు రావడం ప్రజాస్వామ్యంలో ఆసక్తికరమైన పరిణామమే.;
ఒకే కుటుంబానికి చెందిన ఇద్దరు రాజకీయ దిగ్గజాల మధ్య సిద్ధాంతపరమైన విభేదాలు రావడం ప్రజాస్వామ్యంలో ఆసక్తికరమైన పరిణామమే. తన తండ్రిపై చేసిన విమర్శలకు సంబంధించి బీఆర్ఎస్ నాయకురాలు కవిత ఇచ్చిన స్పష్టత, వ్యక్తి గత బంధానికి, రాజకీయ పోరాటానికి మధ్య ఉన్న సన్నని గీతను గుర్తు చేస్తోంది. తెలంగాణ రాజకీయాల్లో ప్రస్తుతం కవిత వ్యాఖ్యలు పెద్ద చర్చకు దారితీశాయి. తన తండ్రి, మాజీ ముఖ్యమంత్రి కేసీఆర్ ను ఆమె వ్యతిరేకిస్తున్నారా? అన్న వార్తలకు ఈ ప్రెస్ మీట్ ద్వారా ఆమె ముగింపు పలికారు. రాజకీయంగా ఎంతటి యుద్ధం నడుస్తున్నా, వ్యక్తిగతంగా తండ్రి పట్ల తనకున్న ప్రేమాభిమానాలు ఎప్పటికీ మారవని ఆమె స్పష్టం చేశారు.
తండ్రిగా గౌరవం
కవిత తన వ్యాఖ్యల్లో వ్యక్తిగత బంధానికి అత్యంత ప్రాముఖ్యత ఇచ్చారు. ‘నా తండ్రి లేకపోతే నాకు జన్మ లేదు. ఆయనను నేను ఎప్పటికీ వ్యతిరేకించను’ అని పేర్కొంటూనే, తండ్రిగా ఆయనను ఎప్పుడూ గౌరవంగా చూస్తానని చెప్పారు. తాను ఎత్తిచూపింది కేవలం ఒక రాజకీయ నాయకుడి వైఫల్యాన్ని మాత్రమేనని, బీఆర్ఎస్ బాస్ గా ఆయన తీసుకున్న నిర్ణయాలను మాత్రమే విమర్శించానని స్పష్టం చేశారు.
రాజకీయంగా ‘యుద్ధం’
రాజకీయాల్లో విమర్శలు, ప్రతివిమర్శలు సహజమని, కానీ అవి కుటుంబ సంబంధాలను దెబ్బతీయకూడదని ఆమె అభిప్రాయపడ్డారు. రాజకీయంగా మాత్రమే ఇద్దరి మధ్య యుద్ధం నడుస్తుందని, ప్రజా సమస్యల పరిష్కారం విషయంలో అభిప్రాయ భేదాలు ఉండడం సాధారణమేనని పేర్కొన్నారు. తాను వ్యతిరేకించింది రాజకీయ నాయకుడైన కేసీఆర్ ను, బీఆర్ఎస్ పార్టీ విధానాలనే తప్ప, కన్న తండ్రిని కాదని ఆమె నొక్కి చెప్పారు.
కుటుంబ రాజకీయాల్లో నవ శకం?
తెలుగు రాష్ట్రాల్లో వారసత్వ రాజకీయాలు బలంగా ఉన్న నేపథ్యంలో, కవిత వైఖరి కొత్త చర్చకు నాంది పలికింది. తండ్రి నీడలో ఎదగడమే కాకుండా.., తప్పు జరిగినప్పుడు ప్రశ్నించే ధైర్యం ఉండాలని ఆమె తన చర్యల ద్వారా చూపిస్తున్నారు. రాజకీయాల్లో ప్రత్యర్థులుగా ఉన్నప్పటికీ, ఇంట్లో తండ్రి-కూతుళ్లుగానే ఉంటామన్న ఆమె వ్యాఖ్యలు ప్రస్తుత రాజకీయ నేతలకు ఒక సందేశంగా నిలుస్తున్నాయి.
కవిత ఈ వివరణతో కేసీఆర్ కుటుంబంలో విభేదాలు ఉన్నాయన్న ఊహాగానాలకు తెరపడింది. ఒక నాయకురాలిగా తన బాధ్యతను నిర్వర్తిస్తూనే, కూతురిగా తండ్రికి ఇవ్వాల్సిన గౌరవాన్ని ఇవ్వడం ఆమె పరిణతి ఉందో చెప్తోంది. రాజకీయ చదరంగంలో ఎత్తులు, పైఎత్తులు ఎలా ఉన్నా, రక్త సంబంధాలు ఎప్పుడూ పవిత్రంగానే ఉంటాయని ఈ ఘటన నిరూపిస్తోంది.